Ũhoro Mwega Ũrĩa Waandĩkirũo nĩ Mathayo 18:1-35
-
Ngerekano ya ngombo ĩrĩa ĩtoohanĩire (21-35)
18 Hĩndĩ o ĩyo arutwo a Jesu magĩũka harĩ we makĩmũũria atĩrĩ: “Nũũ kũna mũnene gũkĩra arĩa angĩ Ũthamaki-inĩ wa igũrũ?”+
2 Nĩ ũndũ ũcio, agĩta kaana agĩkarũgamia gatagatĩ-inĩ kao
3 agĩcoka akiuga: “Ngũmwĩra atĩrĩ o ma, mũngĩaga kũgarũrũka* mũhaane ta twana,+ gũtirĩ hĩndĩ mũkaaingĩra Ũthamaki-inĩ wa igũrũ.+
4 Kwoguo-rĩ, mũndũ o wothe ũkwĩnyihia o ta kaana gaka, nĩwe mũnene gũkĩra arĩa angĩ Ũthamaki-inĩ wa igũrũ;+
5 na mũndũ o wothe wamũkagĩra kaana kamwe ta gaka nĩ ũndũ wa rĩĩtwa rĩakwa nĩ anyamũkagĩra o na niĩ.
6 No ũrĩa wothe ũhĩngaga ũmwe wa aya matariĩ ta twana arĩa marĩ na wĩtĩkio harĩ niĩ, nĩ kaba ohererũo ihiga rĩa gĩthĩi ngingo rĩrĩa rĩthiũrũrũkagio nĩ ndigiri na aikio iria kũrĩa kũriku arikĩre kuo.+
7 “Kaĩ thĩ ĩrĩ na haaro nĩ ũndũ wa mĩhĩnga ĩrĩa ĩrĩ thĩinĩ wayo-ĩ! Hatarĩ nganja no mũhaka mĩhĩnga ĩyo yũke, no mũndũ ũrĩa ũrehaga mũhĩnga kaĩ arĩ na haaro-ĩ!
8 Kwoguo, angĩkorũo guoko kana kũgũrũ gwaku nĩ kũrakũhĩngithia, gũtinie ũgũte gũkweherere.+ Nĩ kaba ũgaatonya muoyo-inĩ ũrĩ kĩonje kana ũgĩthuaga gũkĩra ũgaaikio mwaki-inĩ wa tene na tene ũrĩ na moko meerĩ kana magũrũ meerĩ.+
9 Ningĩ, angĩkorũo riitho rĩaku nĩ rĩrakũhĩngithia, rĩkũũre ũrĩte rĩkweherere. Nĩ kaba ũkaaingĩra muoyo-inĩ ũrĩ na riitho rĩmwe gũkĩra ũgaaikio thĩinĩ wa mwaki wa Jehanamu* ũrĩ na maitho meerĩ.+
10 Mwĩmenyererei mũtikananyarare ũmwe wa aya matariĩ ta twana, nĩ ũndũ ngũmwĩra atĩ araika ao nĩ monaga ũthiũ wa Awa ũrĩa ũrĩ igũrũ hĩndĩ ciothe.+
11 *——
12 “Hihi mũgwĩciria atĩa? Mũndũ angĩkorũo na ng’ondu 100, na ĩmwe yacio yũre-rĩ,+ githĩ ndangĩtiga icio 99 irĩma-inĩ na athiĩ agacarie ĩyo ĩmwe yũrĩte?+
13 Na angĩmĩona, ngũmwĩra na ma atĩrĩ, angĩkena nĩ ũndũ wayo gũkĩra icio 99 itekũũrĩte.
14 Ũguo noguo Awa* ũrĩa ũrĩ igũrũ atangĩenda o na ũmwe wa aya matariĩ ta twana ore.+
15 “Makĩria ma ũguo-rĩ, mũrũ wa Ithe wanyu angĩkwĩhĩria, thiĩ ũmuonie rĩhia rĩake* mũrĩ o inyuerĩ.+ Angĩkũigua-rĩ, nĩ mwacokanwo na mũrũ wa Ithe wanyu.+
16 No angĩaga gũkũigua, thiĩ na mũndũ ũmwe kana erĩ, nĩguo kũgerera ũira wa* andũ erĩ kana atatũ, maũndũ mothe mamenyeke wega.+
17 Angĩaga kũmaigua-rĩ, ĩra kĩũngano. Na angĩaga kũigua o na nginya kĩũngano, nĩ atuĩke o ta mũndũ wa ndũrĩrĩ+ kana mwĩtia wa mbeca cia igooti harĩ wee.+
18 “Ngũmwĩra atĩrĩ na ma, maũndũ marĩa mothe mũkooha gũkũ thĩ magaakorũo marĩ mohe kũrĩa igũrũ, na maũndũ marĩa mothe mũkoohora gũkũ thĩ magaakorũo marĩ mohore kũrĩa igũrũ.
19 Ningĩ ngũmwĩra atĩrĩ na ma, andũ erĩ gatagatĩ-inĩ kanyu gũkũ thĩ mangĩkarĩkanĩra mahoe igũrũ rĩa ũndũ o wothe wa bata, nĩ makaahingĩrio nĩ Awa ũrĩa ũrĩ igũrũ.+
20 Nĩ gũkorũo harĩa andũ erĩ kana atatũ macemanĩtie hamwe nĩ ũndũ wa rĩĩtwa rĩakwa,+ o na niĩ ngoragwo ho gatagatĩ-inĩ kao.”
21 Nake Petero agĩũka akĩmũũria atĩrĩ: “Mwathani, mũrũ wa Ithe witũ agĩrĩire kũnjĩhĩria maita maigana o ngĩmuohagĩra? Hihi nĩ nginya maita mũgwanja?”
22 Jesu akĩmũcokeria ũũ: “Ngũkwĩra atĩrĩ, ti nginya maita mũgwanja, ĩndĩ nĩ nginya maita 77.+
23 “Nĩ ũndũ ũcio Ũthamaki wa igũrũ no ũhaananio na mũthamaki ũmwe ũrĩa weendaga gũtara mathabu na ngombo ciake.
24 Rĩrĩa aambĩrĩirie gũtara mathabu, hakĩrehwo ngombo ĩmwe yarĩ na thiirĩ wake wa taranda 10,000.*
25 No tondũ ndĩarĩ na ũhoti wa kũrĩha thiirĩ ũcio, mwathi wayo agĩathana ngombo ĩyo yendio hamwe na mũtumia wayo na ciana ciayo na indo iria ciothe yarĩ nacio nĩguo thiirĩ ũcio ũrĩhwo.+
26 Nĩ ũndũ ũcio, ngombo ĩyo ĩkĩĩgũithia thĩ ĩkĩmũinamĩrĩra, ĩkiugaga atĩrĩ, ‘Ndagũthaitha ũngirĩrĩrie, na nĩ ngũkũrĩha thiirĩ waku ũrĩa wothe ndĩ naguo.’
27 Nĩ ũndũ ũcio mwathi wa ngombo ĩyo akĩringwo nĩ tha, akĩmĩrekereria na akĩmĩrekera thiirĩ ũrĩa yarĩ naguo.+
28 No ngombo ĩyo ĩgĩthiĩ ĩgĩkora ĩmwe ya ngombo iria ingĩ yarĩ na thiirĩ wayo wa dinari* 100, ĩkĩmĩnyita na ĩkĩambĩrĩria kũmĩita, ĩkiugaga atĩrĩ, ‘Ndĩha thiirĩ wakwa wothe ũrĩa ũrĩ naguo.’
29 Nayo ngombo ĩyo ĩkĩĩgũithia thĩ ĩkĩambĩrĩria kũmĩthaitha, ĩkĩmĩraga atĩrĩ, ‘Ndagũthaitha ũngirĩrĩrie, na nĩ ngũkũrĩha thiirĩ waku.’
30 O na kũrĩ ũguo, ĩkĩrega, na ĩgĩthiĩ ĩkĩmĩikithia njera nginya rĩrĩa ĩkaarĩha thiirĩ ũcio.
31 Rĩrĩa ngombo iria ingĩ cioonire ũguo, ikĩigua kĩeha mũno, na igĩthiĩ ikĩra mwathi wao ũrĩa wothe gwekĩkĩte.
32 Nake mwathi wayo agĩta ngombo ĩyo akĩmĩra: ‘Wee ngombo ĩno njũru, rĩrĩa ũũthaithire nĩ ngũrekeire thiirĩ waku wothe.
33 Githĩ o nawe ndũkwagĩrĩirũo nĩ kũiguĩra ngombo ĩrĩa ĩngĩ tha o ta ũrĩa ngũiguĩrĩire tha?’+
34 Nĩ ũndũ wa kũrakara, mwathi wayo akĩmĩneana kũrĩ arangĩri a njera nginya rĩrĩa ĩkaarĩha thiirĩ ũrĩa wothe yarĩ naguo.
35 Ũguo noguo o na inyuĩ, mũngĩaga kuohagĩra ariũ a Ithe wanyu kuuma ngoro,+ o nake Awa ũrĩa ũrĩ igũrũ ndarĩmuohagĩra.”+
Tũũhoro twa magũrũ-inĩ
^ Kana “gũcenjia.”
^ Rora Ũthathaũri wa Ciugo.
^ Rora Ũhoro Muongerere A3.
^ Kana hihi, “Ithe wanyu.”
^ Ũkk., “ũmũrũithie.”
^ Ũkk., “kanua ka.”
^ Taranda 10,000 cia betha ciaiganaine na dinari 60,000,000. Rora Ũhoro Muongerere B14.
^ Rora Ũhoro Muongerere B14.
