Ũhoro Mwega Ũrĩa Waandĩkirũo nĩ Mathayo 28:1-20
28 Thutha wa Thabatũ, rĩrĩa gwathererũkaga mũthenya wa mbere wa kiumia, Mariamu Mũmagidali marĩ na Mariamu ũcio ũngĩ magĩthiĩ kũrora mbĩrĩra.+
2 Na rĩrĩ, nĩ kwagĩĩte na gĩthingithia kĩnene, tondũ mũraika wa Jehova* nĩ aaikũrũkĩte kuuma igũrũ na akagaragaria ihiga rĩrĩa rĩahingĩte mbĩrĩra, na nĩrĩo aaikarĩire.+
3 Nake aahaanaga o ta rũheni, nacio nguo ciake ikerũha o ta mbarabu.+
4 Nao arangĩri makĩinaina mũno na makĩhaana ta andũ akuũ nĩ ũndũ wa kũmwĩtigĩra.
5 No mũraika akĩra atumia acio atĩrĩ: “Mũtigetigĩre, nĩ gũkorũo nĩ njũĩ mũracaria Jesu ũrĩa ũroragĩirũo mũtĩ-inĩ.+
6 Ndarĩ haha, nĩ gũkorũo nĩ ariũkĩtio, o ta ũrĩa ooigĩte.+ Ũkai muone harĩa arakomete.
7 Mũcoke mũthiĩ na ihenya mwĩre arutwo ake atĩ nĩ ariũkĩtio kuuma kũrĩ arĩa akuũ na nĩ egũthiĩ mbere yanyu Galili.+ Na nĩ mũkũmuona kũu. Na atĩrĩrĩ, nĩ ndamwĩra maũndũ macio.”+
8 Nĩ ũndũ ũcio, makiuma hau mbĩrĩra-inĩ* na ihenya marĩ na guoya na gĩkeno kĩnene, magĩteng’era kwĩra arutwo ake ũhoro ũcio.+
9 Na rĩrĩ, Jesu agĩtũngana nao akĩmoria: “Mũrĩ ega?” Nao makĩmũkuhĩrĩria, makĩmũnyita magũrũ na makĩmũinamĩrĩra.
10 Nake Jesu akĩmeera ũũ: “Mũtigetigĩre! Thiĩi mũkeere ariũ a Awa mathiĩ Galili, na nĩ mekũnyona kũu.”
11 Na rĩrĩa atumia acio maathiaga, arangĩri amwe+ magĩthiĩ itũũra-inĩ na makĩmenyithia anene a athĩnjĩri-Ngai maũndũ marĩa mothe meekĩkĩte.
12 Na rĩrĩa maagomanire hamwe na athuri na makĩarĩrĩria ũhoro ũcio, makĩhe arangĩri acio icunjĩ nyingĩ cia betha
13 makĩmeera: “Muuge ũũ: ‘Arutwo ake mokire ũtukũ tũrĩ toro na maiya mwĩrĩ wake.’+
14 Na ngavana angĩigua ũhoro ũcio, nĩ tũkũmũtaarĩria* na kwoguo mũtirabatara kũmaka.”
15 Nĩ ũndũ ũcio makĩoya icunjĩ icio cia betha na magĩka o ũrĩa meerirũo, na ũhoro ũcio nĩ ũtheremetio mũno gatagatĩ-inĩ ka Ayahudi nginyagia ũmũthĩ ũyũ.
16 No rĩrĩ, arutwo arĩa 11 magĩthiĩ Galili+ kĩrĩma-inĩ kũrĩa Jesu aabangĩte macemanie.+
17 Rĩrĩa maamuonire, makĩmũinamĩrĩra, no amwe ao maarĩ na nganja.
18 Jesu akĩmakuhĩrĩria na akĩmeera ũũ: “Nĩ heetwo wathani wothe kũrĩa igũrũ o na gũkũ thĩ.+
19 Nĩ ũndũ ũcio-rĩ, thiĩi mũgatue andũ arutwo kuuma ndũrĩrĩ-inĩ ciothe,+ mũkĩmabatithagia+ thĩinĩ wa rĩĩtwa rĩa Ithe witũ, na rĩa Mũriũ, na rĩa roho mũtheru,
20 mũkĩmarutaga kũrũmia maũndũ marĩa mothe ndĩmwathĩte.+ Na rĩrĩ, nĩ ndĩkoragwo hamwe na inyuĩ mĩthenya yothe nginya ithirĩro rĩa mũtabarĩre wa maũndũ.”*+
Tũũhoro twa magũrũ-inĩ
^ Rora Ũhoro Muongerere A5.
^ Kana “mbĩrĩra-inĩ ya kĩririkano.”
^ Ũkk., “nĩ tũkũmũiguithia.”
^ Kana “mahinda.” Rora Ũthathaũri wa Ciugo.
