Ndari 23:1-30
23 Balaamu agĩcoka akĩra Balaki atĩrĩ: “Njakĩra igongona mũgwanja haha,+ na ũhaarĩrie ndegwa mũgwanja na ndũrũme mũgwanja.”
2 O rĩo Balaki agĩka o ta ũguo Balaamu aamwĩrire. Na Balaki na Balaamu makĩruta igongona rĩa ndegwa ĩmwe na ndũrũme ĩmwe igũrũ rĩa o kĩgongona.+
3 Balaamu agĩcoka akĩra Balaki ũũ: “Ikara haha hakuhĩ na igongona rĩaku rĩa njino, na niĩ nyambe thiĩ. Na hihi Jehova nĩ ekũnyumĩrĩra. Na ũrĩa wothe ekũnguũrĩria nĩ ngũkwĩra.” Nĩ ũndũ ũcio agĩthiĩ karĩma igũrũ.
4 Ngai agĩkiumĩrĩra Balaamu,+ nake Balaamu akĩmwĩra atĩrĩ: “Nĩ thondekire igongona mũgwanja ibangĩtwo mĩhari, na ndaruta igongona rĩa ndegwa ĩmwe na ndũrũme ĩmwe igũrũ rĩa o kĩgongona.”
5 Nake Jehova agĩĩkĩra ciugo ici kanua-inĩ ka Balaamu:+ “Coka kũrĩ Balaki, na ũũ nĩguo wagĩrĩirũo kũmwĩra.”
6 Agĩgĩcoka na agĩkora Balaki na anene othe a Moabi marũgamĩte hakuhĩ na igongona rĩake rĩa njino.
7 Agĩcoka akiuga ciugo ici na njĩra ya thimo:+
“Balaki mũthamaki wa Moabi nĩ andehete kuuma Aramu,+Kuuma irĩma-inĩ cia irathĩro:
‘Ũka ũnumĩre Jakubu.
Ĩni, ũka ũũkĩrĩre Isiraeli.’+
8 Ingĩkĩhota atĩa kũruma arĩa Ngai atarumĩte?
Na ingĩkĩhota atĩa gũũkĩrĩra arĩa Jehova atokĩrĩire?+
9 Rĩrĩa ndũgamĩte igũrũ rĩa ndwaro cia mahiga nĩ ndĩramona,O na ndĩ tũrĩma-inĩ nĩ ndĩramona.
Andũ acio maikaraga marĩ oiki;+Matiĩtaraga hamwe na ndũrĩrĩ.+
10 Nũũ ũngĩhota gũtara Jakubu na atariĩ o ta rũkũngũ rwa thĩ+Kana ahote gũtara o na gĩcunjĩ kĩmwe harĩ inya kĩa Isiraeli?
Reke ngue gĩkuũ o ta kĩa andũ arũngĩrĩru,Na marigĩrĩrio makwa marotuĩka o ta mao.”
11 Nake Balaki akĩra Balaamu ũũ: “Nĩ atĩa wanjĩka? Ngũrehire ũrume thũ ciakwa, na rĩu gũtirĩ ũndũ weka tiga gũcirathima.”+
12 Nake akĩmũcokeria atĩrĩ: “Na githĩ ndiagĩrĩirũo kuuga o kĩrĩa Jehova ekĩrĩte kanua-inĩ gakwa?”+
13 Nake Balaki akĩmwĩra atĩrĩ: “Ndagũthaitha ũũke tũthiĩ handũ hangĩ, handũ ũkũhota kũmona. Ũkuona o amwe ao tu; ndũkũmona othe. Na ũnumĩre andũ acio ũrĩ hau.”+
14 Nĩ ũndũ ũcio akĩmũtwara werũ-inĩ wa Zofimu, gacũmbĩrĩ ga Pisiga,+ na agĩaka igongona mũgwanja na akĩruta igongona rĩa ndegwa ĩmwe na ndũrũme ĩmwe igũrũ rĩa o kĩgongona.+
15 Nake Balaamu akĩra Balaki atĩrĩ: “Ikara haha hakuhĩ na igongona rĩaku rĩa njino na niĩ ngacemanie Nake haarĩa.”
16 Nake Jehova akiumĩrĩra Balaamu na agĩĩkĩra ciugo ici kanua-inĩ gake:+ “Coka kũrĩ Balaki, na ũũ nĩguo wagĩrĩirũo kũmwĩra.”
17 Agĩgĩthiĩ kũrĩ we na akĩmũkora etereire hau hakuhĩ na igongona rĩake rĩa njino, na anene a Moabi maarĩ hamwe nake. Balaki akĩmũũria ũũ: “Jehova oiga atĩa?”
18 Nake akiuga ciugo ici na njĩra ya thimo:+
“Ũkĩra, wee Balaki na ũthikĩrĩrie.
Ta thikĩrĩria, wee mũrũ wa Ziporu.
19 Ngai ti mũndũ atĩ aheenanie,+O na kana mũrũ wa mũndũ atĩ ericũkwo.+
Rĩrĩa oiga ũndũ-rĩ, na githĩ to nginya awĩke?
Rĩrĩa aria-rĩ, githĩ to nginya ahingie ũndũ ũcio?+
20 Atĩrĩrĩ, njĩrĩtwo ndathime;Na rĩu We nĩ arathimana,+ na ndingĩhota kũgarũra ũndũ ũcio.+
21 Ndakiragĩrĩria kuona hinya o wothe wa ũgo ũgĩũkĩrĩra Jakubu,Na ndetĩkagĩria thĩna o na ũmwe ũkore Isiraeli.
Jehova Ngai wao arĩ hamwe nao,+Na nĩ atũũgĩrĩtio mũno o ta mũthamaki gatagatĩ-inĩ kao.
22 Ngai nĩ kũmaruta aramaruta Misiri.+
Atariĩ o ta hĩa cia ndegwa ya gĩthaka harĩ o.+
23 Nĩ gũkorũo gũtirĩ imenyithia cia maũndũ moru ma ũragũri igũũkĩrĩra Jakubu,+O na kana ũragũri o wothe ũũkĩrĩre Isiraeli.+
Na ihinda-inĩ rĩrĩ no kwĩrũo ũũ ũhoro-inĩ wĩgiĩ Jakubu na Isiraeli:
‘Ta rora ũrĩa Ngai ekĩte!’
24 Gĩkĩ nĩ kĩrĩndĩ gĩkwarahũka o ta mũrũthi,Na o ta mũrũthi, nĩkĩo gĩkwĩrũgamia.+
Gĩtigũkoma o nginya rĩrĩa kĩrĩrĩa kĩrĩa kĩhĩtĩteNa kĩnyue thakame ya kĩrĩa kĩũragĩte.”
25 Nake Balaki akĩra Balaamu atĩrĩ: “Angĩkorũo ndũngĩhota kũmũruma, o na kũrathima ndwagĩrĩirũo kũmũrathima.”
26 Balaamu agĩcokeria Balaki atĩrĩ: “Githĩ ndikwĩrire ũũ, ‘Ngwĩka ũrĩa wothe Jehova ekuuga’?”+
27 Nake Balaki akĩra Balaamu atĩrĩ: “Ndagũthaitha ũũke ngũtware handũ hangĩ. Hihi nĩ ũgũkorũo ũrĩ ũndũ mwĩtĩkĩrĩku maitho-inĩ ma Ngai ũrĩa wa ma ũnumĩre Isiraeli ũrĩ hau.”+
28 Nĩ ũndũ ũcio Balaki agĩtwara Balaamu gacũmbĩrĩ ga Peori, kũrĩa kũng’etheire Jeshimoni.*+
29 Balaamu agĩcoka akĩra Balaki atĩrĩ: “Njakĩra igongona mũgwanja haha, na ũhaarĩrie ndegwa mũgwanja na ndũrũme mũgwanja.”+
30 Balaki agĩgĩka o ta ũguo Balaamu amwĩrire, na akĩruta igongona rĩa ndegwa ĩmwe na ndũrũme ĩmwe igũrũ rĩa o kĩgongona.
Tũũhoro twa magũrũ-inĩ
^ Kana hihi, “werũ.”
