Ndari 6:1-27
6 Jehova agĩthiĩ na mbere kwaria na Musa, akĩmwĩra ũũ:
2 “Aria na Aisiraeli ũmeere atĩrĩ, ‘Mũndũrũme kana mũtumia angĩĩhĩta mwĩhĩtwa wa mwanya wa gũtũũra arĩ Mũnaziri*+ harĩ Jehova,
3 agĩrĩirũo gwĩthema ndibei na indo ingĩ iria ingĩtũma mũndũ arĩĩo. Ndagĩrĩirũo kũnyua thiki ya ndibei kana thiki ya kĩndũ o gĩothe kĩngĩtũma mũndũ arĩĩo.+ Ndagĩrĩirũo kũnyua kĩndũ gĩthondeketwo na thabibũ, o na kana arĩe thabibũ, irĩ cia mũgethano* kana irĩ nyũmithie.
4 Matukũ-inĩ mothe marĩa egũkorũo arĩ Mũnaziri ndagĩrĩirũo kũrĩa kĩndũ o gĩothe kiumanĩte na mũthabibũ, kuuma thabibũ njĩthĩ o nginya makoni.
5 “‘Matukũ-inĩ mothe marĩa egũkorũo arĩ Mũnaziri, gũtirĩ rwenji rwagĩrĩire kũhĩtũkĩra mũtwe-inĩ wake.+ Arĩikaraga arĩ mũtheru na njĩra ya kũreka njuĩrĩ ya mũtwe wake ĩkũre o nginya matukũ ma wĩyamũrĩri wake harĩ Jehova mathire.
6 Ndagĩrĩirũo gũkuhĩrĩria mũndũ* mũkuũ matukũ-inĩ mothe marĩa arĩkoragwo amũrĩtwo nĩ ũndũ wa Jehova.
7 O na ithe kana nyina kana mũrũ wa nyina kana mwarĩ wa nyina angĩkua, ndagĩrĩirũo gwĩthahia,+ tondũ rũũri rwa gũkorũo arĩ Mũnaziri harĩ Ngai wake rũrĩ mũtwe-inĩ wake.
8 “‘Arĩkoragwo arĩ mũtheru harĩ Jehova matukũ-inĩ mothe marĩa arĩkoragwo arĩ Mũnaziri.
9 Ĩndĩ mũndũ angĩkua gĩkuũ kĩa hinahi arĩ hakuhĩ na Mũnaziri ũcio+ na athahie njuĩrĩ ĩyo ĩrũgamĩrĩire wĩyamũrĩri wake harĩ Ngai-rĩ,* no mũhaka enje mũtwe wake+ mũthenya ũrĩa agaakorũo agĩĩtheria. Agĩrĩirũo kũmĩenja mũthenya wa mũgwanja.
10 Na mũthenya wa kanana, agĩrĩirũo gũtwara ndutura igĩrĩ kana njui igĩrĩ cia ndirahũgĩ kũrĩ mũthĩnjĩri-Ngai mũromo-inĩ wa hema ya gũtũnganwo.
11 Nake mũthĩnjĩri-Ngai akahaarĩria ĩmwe ĩrĩ igongona rĩa mehia nayo ĩyo ĩngĩ ĩrĩ igongona rĩa njino na arute igongona rĩa kũhumbĩra mehia nĩ ũndũ wa mehia macio ma mũndũ ũcio+ makonainie na mũndũ ũcio mũkuũ. Thutha ũcio agĩrĩirũo gwĩtheria mũtwe mũthenya o ro ũcio.
12 No mũhaka eyamũre rĩngĩ harĩ Jehova nĩ ũndũ wa matukũ make ma gũkorũo arĩ Mũnaziri, na nĩ agĩrĩirũo gũtwara gatũrũme karĩ mwaka-inĩ wako wa mbere karĩ igongona rĩa mahĩtia. O na kũrĩ ũguo, matukũ macio ma mbere matirĩtaragwo tondũ nĩ eethahirie arĩ Mũnaziri.
13 “‘Na rĩrĩ, ũyũ nĩguo watho wĩgiĩ Mũnaziri: Rĩrĩa aniina matukũ make ma gũkorũo arĩ Mũnaziri,+ arĩrehagwo mũromo-inĩ wa hema ya gũtũnganwo.
14 Hau nĩho arĩtwaraga igongona rĩake harĩ Jehova, na nĩrĩo rĩrĩ: gatũrũme kamwe gatarĩ na kaũgũ karĩ mwaka-inĩ wako wa mbere ka igongona rĩa njino,+ kamwatĩ kamwe gatarĩ na kaũgũ karĩ mwaka-inĩ wako wa mbere ka igongona rĩa mehia,+ ndũrũme ĩmwe ĩtarĩ na kaũgũ ya igongona rĩa ũiguano,+
15 gĩkabu kĩa mĩgate ya gĩthiũrũrĩ* ĩtarĩ mĩkĩre ndawa ya kũimbia ĩthondeketwo na mũtu mũhinyu ũtukanĩtio na maguta, tũmĩgate tũceke tũtekĩrĩtwo ndawa ya kũimbia tũhakĩtwo maguta, na igongona rĩacio rĩa mũtu,+ hamwe na magongona ma cio ma ndibei.+
16 Mũthĩnjĩri-Ngai agĩrĩirũo gũcitwara mbere ya Jehova na arute igongona rĩa mehia rĩa mũndũ ũcio na igongona rĩa njino rĩa mũndũ ũcio.
17 Arĩrutaga ndũrũme ĩyo ĩrĩ igongona rĩa ũiguano harĩ Jehova hamwe na gĩkabu kĩu kĩa mĩgate ĩtarĩ mĩkĩre ndawa ya kũimbia, ningĩ mũthĩnjĩri-Ngai akaruta igongona rĩarĩo rĩa mũtu+ na igongona rĩarĩo rĩa ndibei.
18 “‘Mũnaziri ũcio acoke enje njuĩrĩ ya mũtwe wake*+ arĩ hau mũromo-inĩ wa hema ya gũtũnganwo, na oe njuĩrĩ ĩyo ya mũtwe wake ĩrĩa ĩkũrĩte arĩ Mũnaziri na amĩikie mwaki-inĩ ũrĩa ũrĩ rungu rwa igongona rĩa ũiguano.
19 Mũthĩnjĩri-Ngai agĩrĩirũo kuoya kĩande gĩtherũkie+ kĩa ndũrũme ĩyo, mũgate ũmwe wa gĩthiũrũrĩ* ũtarĩ mwĩkĩre ndawa ya kũimbia kuuma gĩkabu-inĩ, na kamũgate kamwe gaceke gatekĩrĩtwo ndawa ya kũimbia, na acigĩrĩre moko-inĩ ma Mũnaziri ũcio thutha wake kwenja rũũri rwake rwa kuonania atĩ nĩ Mũnaziri.
20 Mũthĩnjĩri-Ngai agĩrĩirũo gũcicũgia mbere na thutha irĩ igongona rĩa gũcũgio mbere ya Jehova.+ Kĩu nĩ kĩndũ gĩtheru kĩa mũthĩnjĩri-Ngai, o hamwe na gĩthũri kĩa igongona rĩa gũcũgio na kũgũrũ kwa igai rĩamũre.+ Thutha ũcio Mũnaziri ũcio no anyue ndibei.
21 “‘Ũyũ nĩguo watho wĩgiĩ Mũnaziri+ ũrĩa wĩhĩtĩte mwĩhĩtwa: Angĩĩhĩta na akorũo na ũhoti wa kũrutĩra Jehova igongona rĩkĩrĩte kĩrĩa agĩrĩirũo nĩ kũruta arĩ Mũnaziri, nĩ agĩrĩirũo kũhingia mwĩhĩtwa ũcio wake nĩ ũndũ wa watho wĩgiĩ gũkorũo arĩ Mũnaziri.’”
22 Jehova agĩcoka akĩra Musa ũũ:
23 “Ĩra Haruni na ariũ ake atĩrĩ, ‘Ũũ nĩguo mwagĩrĩirũo kũrathima+ andũ a Isiraeli. Meeragei atĩrĩ:
24 “Jehova aromũrathima+ na amũgitĩre.
25 Jehova arotũma ũthiũ wake ũmwarĩre,+ na aromwĩka maũndũ mega.
26 Jehova aroambararia ũthiũ wake kwerekera kũrĩ inyuĩ na amũhe thayũ.”’+
27 Na no mũhaka magwetage rĩĩtwa rĩakwa harĩ andũ a Isiraeli,+ nĩguo ngamarathimaga.”+
Tũũhoro twa magũrũ-inĩ
^ Kĩhibirania, na·zir′, kiugĩte “Ũrĩa Mũthuure; Ũrĩa Mwamũre; Ũrĩa Mũtigithũkanie.”
^ Kana “thabibũ itaikarĩte kuuma ciagethwo.”
^ Kĩhibirania, ne′phesh. Rora Ũthathaũri wa Ciugo.
^ Kana “athahie mũtwe wake arĩ Mũnaziri.”
^ Mĩgate ĩyo yarĩ na irima gatagatĩ.
^ Kana “mũtwe wake arĩ Mũnaziri.”
^ Mĩgate ĩyo yarĩ na irima gatagatĩ.
