Obadia 1:1-21
1 Gĩkĩ nĩkĩo kĩoneki kĩa Obadia:*
Jehova Mwathani Ũrĩa Mũnene ekuuga ũũ igũrũ rĩgiĩ Edomu:+
“Nĩ tũiguĩte ũhoro kuuma kũrĩ Jehova,Nĩ harĩ mũrekio ũtũmĩtwo kũrĩ ndũrĩrĩ akoige atĩrĩ:
‘Arahũkai, nĩ twĩhaarĩriei nĩ ũndũ wa mbaara tũmũũkĩrĩre.’”+
2 “Atĩrĩrĩ, nĩ ndũmĩte ũnyihe gatagatĩ-inĩ ka ndũrĩrĩ;Nĩ ũnyararĩtwo biũ.+
3 Mwĩtĩo wa ngoro yaku nĩ ũkũheenetie,+Wee ũikaraga mĩĩgitio-inĩ ya ndũmba ya ihiga,O wee ũikaraga handũ hatũũgĩru, ũkeĩra na ngoro yaku ũũ,‘Nũũ ũngĩhota kũũharũrũkia nginya thĩ?’
4 O na ũngĩthondeka gĩikaro gĩaku igũrũ mũno* ta nderi,Kana ũige gĩtara gĩaku gatagatĩ-inĩ ka njata,Nĩ ngaakũharũrũkia kuuma kũu,” ũguo nĩguo Jehova ekuuga.
5 “Aici mangĩũka kũrĩ wee, atunyani moke ũtukũ,(Kaĩ nĩ ũkwanangwo biũ-ĩ!)*
Na githĩ matingĩiya o kĩrĩa mekwenda?
Kana agethi a thabibũ mangĩũka kũrĩ wee-rĩ,Githĩ to matige imwe na thutha cia kũhaara?+
6 Kaĩ Esau nĩ acarĩtio-ĩ!
Mĩthithũ yake ĩrĩa mĩhithe-rĩ, kaĩ nĩ ĩcarĩtio-ĩ!
7 Makũingatĩte ũgathiĩ o nginya mũhaka-inĩ.
Arĩa othe manyitanagĩra nawe* nĩ makũheenetie.
Andũ arĩa marĩ na thayũ hamwe nawe nĩ magũtooretie.
Arĩa marĩanagĩra mũgate hamwe nawe nĩ magaakũigĩra neti rungu rwaku,No wee ndũkaamenya.”
8 Jehova ekuuga atĩrĩ, “Mũthenya ũcio-rĩ,Githĩ ndikaananga andũ arĩa ogĩ mehere Edomu+Na nyanange ũtaũku wehere gĩcigo-inĩ kĩrĩa kĩrĩ irĩma kĩa Esau?
9 Na njamba ciaku cia ita nĩ ikaanyitwo nĩ guoya,+ wee Temani,+Tondũ mũndũ wothe thĩinĩ wa gĩcigo kĩrĩa kĩrĩ irĩma kĩa Esau nĩ akaanangwo hĩndĩ ya njũragano.+
10 Tondũ wa ũhinya ũrĩa wĩkĩtwo Jakubu mũrũ wa thoguo,+Nĩ ũkaahumbwo nĩ thoni,+Na ũgaathira tene na tene.+
11 Mũthenya ũrĩa weeherire ũkĩrũgama mwena-inĩ,Mũthenya ũrĩa ageni maatwarire mbũtũ ciake ithamĩrio,+Rĩrĩa andũ a kũngĩ maaingĩrire kĩhingo-inĩ gĩake na magĩcukĩra Jerusalemu mĩtĩ,+Watuĩkire o ta ũmwe wao.
12 Ndwagĩrĩirũo gũthekerera mũthenya wa ũũru wa mũrũ wa thoguo,+Ndwagĩrĩirũo gũkenerera andũ a Juda mũthenya wao wa kwanangwo,+Na ndwagĩrĩirũo kwaria na mwĩtĩo igũrũ rĩa mũthenya wao wa mĩtangĩko.
13 Ndwagĩrĩirũo kũingĩra kĩhingo-inĩ kĩa andũ akwa mũthenya wao wa mwanangĩko,+Ndwagĩrĩirũo kũmũthekerera nĩ ũndũ wa thĩna wake mũthenya wake wa mwanangĩko,Na ndwagĩrĩirũo kũigĩrĩra moko maku igũrũ rĩa ũtonga wake mũthenya wake wa mwanangĩko.+
14 Ndwagĩrĩirũo kũrũgama magomano-inĩ ma njĩra nĩguo ũũrage andũ ake arĩa marethara,+Na ndwagĩrĩirũo kũneana andũ ake arĩa mahonokete mũthenya wao wa mĩtangĩko.+
15 Nĩ gũkorũo mũthenya wa Jehova wa gũũkĩrĩra ndũrĩrĩ ciothe ũrĩ hakuhĩ.+
O ta ũrĩa wĩkĩte, ũguo noguo nawe ũgeekwo.+
Ũndũ ũrĩa wekire andũ angĩ nĩ ũgaagũcokerera igũrũ rĩa mũtwe waku mwene.
16 Nĩ gũkorũo o ta ũrĩa mũnyuĩrĩire kĩrĩma-inĩ gĩakwa kĩrĩa kĩamũre,Ũguo noguo ndũrĩrĩ ciothe ikaanyuaga itegũtigithĩria.+
Ikaanyua na imerie,Na ikaahaana ta itarĩ ciakorũo kuo.
17 No Kĩrĩma-inĩ gĩa Zayuni nĩ gũgaakorũo na arĩa makaahonoka,+Nakĩo gĩgaakorũo kĩrĩ kĩamũre;+Na andũ a nyũmba ya Jakubu nĩ makeegwatĩra indo ciao.+
18 Nyũmba ya Jakubu ĩgaatuĩka mwaki,Nyũmba ya Jusufu ĩtuĩke rũrĩrĩmbĩ,Nayo nyũmba ya Esau ĩtuĩke ta mahuti;Nĩ makaamamundia mwaki na mamacine,Na gũtirĩ mũndũ wa nyũmba ya Esau ũkaahonoka,+Nĩ gũkorũo Jehova we mwene nĩ arĩtie.
19 Nĩ makeegwatĩra Negebu na gĩcigo kĩrĩa kĩrĩ irĩma kĩa Esau,+Megwatĩre Shefela na bũrũri wa Afilisti.+
Nĩ makeegwatĩra mũgũnda wa Efiraimu na mũgũnda wa Samaria,+Nake Benjamini nĩ akeegwatĩra Gileadi.
20 Andũ arĩa marĩ ithamĩrio a rũirigo rũrũ,*+Nĩo andũ a Isiraeli, nĩ magaatuĩka ene bũrũri wa Akanaani o nginya Zarefathu.+
Nao andũ arĩa marĩ ithamĩrio a Jerusalemu, o acio maarĩ Sefaradi, nĩ makeegwatĩra matũũra ma Negebu.+
21 Na andũ a kũhonokania nĩ makaambata igũrũ rĩa Kĩrĩma gĩa Zayuni
Nĩguo magatuĩre gĩcigo kĩrĩa kĩrĩ irĩma kĩa Esau,+Naguo ũthamaki ũgaatuĩka wa Jehova.”+
Tũũhoro twa magũrũ-inĩ
^ Rĩĩtwa rĩu riugĩte “Ndungata ya Jehova.”
^ Kana hihi, “ũngĩũmbũka igũrũ mũno.”
^ Kana hihi, “Hihi mangĩthũkangia indo cigana atĩa?”
^ Kana “marĩ na kĩrĩkanĩro hamwe nawe.”
^ Kana “mwĩgitio ũyũ.”
