Ruthu 2:1-23
2 Na rĩrĩ, Naomi aarĩ na mũndũ wa mbarĩ cia mũthuriwe warĩ mũtongu mũno wetagwo Boazu,+ na aarĩ wa famĩlĩ ya Elimeleku.
2 Ruthu ũcio Mũmoabi akĩra Naomi atĩrĩ: “Reke nyumagare thiĩ mĩgũnda-inĩ ngahaare+ igira cia cairi thutha wa mũndũ o wothe ũrĩa ngwĩtĩkĩrĩka harĩ we.” Nĩ ũndũ ũcio Naomi akĩmwĩra: “Thiĩ, mwarĩ wakwa.”
3 Nake agĩthiĩ na akĩambĩrĩria kũhaara kũu mũgũnda-inĩ oimĩte agethi thutha. Na atekũmenya, akĩingĩra mũgũnda-inĩ wa Boazu,+ ũcio warĩ wa famĩlĩ ya Elimeleku.+
4 O hĩndĩ ĩyo Boazu agĩkinya oimĩte Bethilehemu na akĩra acio maagethaga atĩrĩ: “Jehova arokorũo hamwe na inyuĩ.” Nao makĩmwĩra ũũ: “Jehova arokũrathima.”
5 Boazu agĩcoka akĩũria mwanake ũrĩa warũgamĩrĩire agethi atĩrĩ: “Mũirĩtu ũyũ nĩ wa ũ?”
6 Mwanake ũcio warũgamĩrĩire agethi akĩmũcokeria ũũ: “Mũirĩtu ũyũ nĩ Mũmoabi+ ũrĩa wacokire hamwe na Naomi kuuma bũrũri wa Moabi.+
7 Anjũririe atĩrĩ, ‘No njĩtĩkĩrio haare+ igira* cia cairi iria iratigwo na thutha nĩ agethi?’ Na kuuma rĩrĩa okire rũcinĩ ndarĩ araikara thĩ tiga thaa ici aikara thĩ gĩthũnũ-inĩ nĩguo ahurũke hanini.”
8 Boazu akĩra Ruthu ũũ: “Thikĩrĩria, mwarĩ wakwa. Ndũkae gũthiĩ kũhaara mũgũnda-inĩ ũngĩ, na ndũgathiĩ kũndũ kũngĩ o guothe; ikara hakuhĩ na airĩtu akwa.+
9 Roraga mũgũnda ũrĩa maragetha, na ũgathiĩ hamwe nao. Nĩ njathĩte anake matikae gũkũhutia.* Rĩrĩa wanyota, thiaga harĩa ndigithũ cia maĩ irĩ na ũkanyua maĩ marĩa anake acio matahĩte.”
10 Aigua ũguo akĩinamĩrĩra agĩturumithia ũthiũ wake thĩ akĩmwĩra atĩrĩ: “Gũthiĩte atĩa ngetĩkĩrĩka maitho-inĩ maku, na nĩ kĩĩ gĩtũmĩte wĩcirie ũhoro wakwa na niĩ ndĩ mũgeni?”+
11 Nake Boazu akĩmwĩra ũũ: “Nĩ heetwo ũhoro wothe wĩgiĩ maũndũ marĩa mothe wĩkĩire nyaciaraguo thutha wa gũkuĩrũo nĩ mũthuriguo na wĩgiĩ ũrĩa watigire thoguo na maitũguo na bũrũri wa andũ anyu nĩguo ũthiĩ kũrĩ andũ ũtaamenyete hau kabere.+
12 Jehova arokũrathima nĩ ũndũ wa maũndũ macio wĩkĩte,+ na ũrogĩa na kĩheo kĩega* kuuma kũrĩ Jehova Ngai wa Isiraeli, ũrĩa wee ũcarĩtie rĩũrĩro mathagu-inĩ make.”+
13 Nake akiuga atĩrĩ: “Mwathi wakwa, reke njĩtĩkĩrĩke maitho-inĩ maku, nĩ gũkorũo nĩ ũnyũmĩrĩirie na ũkahooreria* ndungata yaku, o na gũtuĩka niĩ ndirĩ ũmwe wa ndungata ciaku.”
14 Mathaa ma kũrĩa irio Boazu akĩmwĩra atĩrĩ: “Ũka haha ũrĩe kĩenyũ kĩa mũgate na ũkĩrikie thiki-inĩ.” Kwoguo agĩikara thĩ hakuhĩ na agethi. Agĩcoka akĩmũnengera cairi imwe hĩhie, nake akĩrĩa akĩhũna, o na agĩtigia imwe.
15 Rĩrĩa aarũgamire nĩguo ahaare,+ Boazu agĩatha anake ake akĩmeera: “Rekei ahaare nginya harĩ igira* cia cairi iria irĩkĩtie kũrengwo, na mũtikamũthumbũre.+
16 Ningĩ mũtigĩrĩre atĩ nĩ mwagucia igira imwe kuuma harĩ iria ciohetwo mũmũtigĩrie na thutha nĩguo ahaare, na mũtikamwĩre ũndũ o na ũrĩkũ wa kũmũgiria.”
17 Kwoguo agĩthiĩ na mbere kũhaara mũgũnda-inĩ ũcio nginya hwaĩ-inĩ.+ Rĩrĩa aahũũrire kĩrĩa ahaarĩte, kĩarĩ ta eba* ĩmwe ya cairi.
18 Agĩcoka agĩcioya na agĩthiĩ itũũra-inĩ, na nyaciarawe akĩona kĩrĩa aahaarĩte. Ningĩ Ruthu akĩruta irio iria aatigĩtie+ thutha wa kũrĩa akaigania na akĩmũnengera.
19 Nyaciarawe akĩmũũria atĩrĩ: “Uuma kũhaara kũ ũmũthĩ? Ũkũrutaga wĩra kũ? Mũndũ ũrĩa wĩciririe ũhoro waku arorathimwo.”+ Nĩ ũndũ ũcio akĩra nyaciarawe ũhoro wĩgiĩ mũndũ ũrĩa aarutĩte wĩra gwake, akiuga: “Rĩĩtwa rĩa mũndũ ũrĩa ndutire wĩra mũgũnda-inĩ wake ũmũthĩ nĩ Boazu.”
20 Nake Naomi akĩra mwarĩ ũcio wake ũũ: “Arorathimwo nĩ Jehova, o ũcio ũtarĩ waga kuonia arĩa marĩ muoyo o na arĩa akuũ wendo mwĩhokeku.”+ Agĩcoka akiuga: “Mũndũ ũcio nĩ wa mbarĩ citũ.+ Nĩ ũmwe wa arĩa mangĩtũkũũra.”*+
21 Ruthu ũcio Mũmoabi agĩcoka akiuga atĩrĩ: “Acokire anjĩra ũũ, ‘Ikara hakuhĩ na anake na airĩtu akwa nginya rĩrĩa marĩrĩkia kũgetha magetha makwa mothe.’”+
22 Naomi akĩra Ruthu mwarĩ ũcio wake atĩrĩ: “Mwarĩ wakwa, nĩ kaba ũthiĩ hamwe na airĩtu ake gũkĩra ũthiĩ ũgathĩnio mũgũnda-inĩ ũngĩ.”
23 Nake agĩikara hakuhĩ na airĩtu acio a Boazu na akĩhaara nginya rĩrĩa magetha ma cairi+ na ma ngano maathirire. Na agĩthiĩ na mbere gũikara na nyaciarawe.+
Tũũhoro twa magũrũ-inĩ
^ Kana hihi, “ciohe.”
^ Kana “gũgũthĩnia.”
^ Kana “irĩhi rĩega.”
^ Ũkk., “ũkaria na ngoro ya.”
^ Kana hihi, “ciohe.”
^ Kĩndũ ta lita 22. Rora Ũhoro Muongerere B14.
^ Kana “Nĩ mũndũ wa mbarĩ citũ ũrĩa ũrĩ na kĩhooto gĩa gũtũkũũra kuuma thĩna-inĩ.”
