Thama 9:1-35
9 Nĩ ũndũ ũcio Jehova akĩra Musa atĩrĩ: “Thiĩ kũrĩ Firauni ũmwĩre ũũ, ‘Jehova Ngai wa Ahibirania aroiga atĩrĩ: “Ĩtĩkĩria andũ akwa mathiĩ nĩguo makandungatĩre.+
2 No warega kũmetĩkĩria, ũthiĩ na mbere kũmagiria,
3 guoko kwa Jehova+ nĩ gũgũũkĩrĩra mahiũ maku. Gũũkĩrĩre mbarathi, ndigiri, ngamĩra, ngo’mbe, mbũri na ng’ondu, nacio irware mũrimũ mũũru mũno.+
4 Na Jehova nĩ egũtũma kũgĩe na ngũrani gatagatĩ ka mahiũ ma andũ a Isiraeli na mahiũ ma andũ a Misiri, na gũtirĩ nyamũ o na ĩmwe ya Aisiraeli ĩgũkua.”’”+
5 Ningĩ Jehova akĩamũra ihinda rĩrĩa egwĩka ũguo, akiuga atĩrĩ: “Rũciũ nĩrĩo niĩ Jehova ngeeka ũguo bũrũri-inĩ ũyũ.”
6 Na mũthenya ũyũ ũngĩ Jehova agĩka ũguo, mahiũ ma mĩthemba yothe ma andũ a Misiri makĩambĩrĩria gũkua,+ no gũtirĩ nyamũ o na ĩmwe ya andũ a Isiraeli yakuire.
7 Na rĩrĩa Firauni oorĩrĩirie, akĩrũo atĩ gũtirĩ nyamũ o na ĩmwe ya andũ a Isiraeli yakuĩte. O na kũrĩ ũguo, Firauni agĩthiĩ na mbere kũmia ngoro, akĩrega gwĩtĩkĩria Aisiraeli mathiĩ.+
8 Jehova agĩcoka akĩra Musa na Haruni atĩrĩ: “Rũmai mũrarĩ wa riiko na moko manyu meerĩ, nake Musa aũikie igũrũ mbere ya Firauni.
9 Naguo ũgũtuĩka rũkũngũ rũhinyu na rũiyũre bũrũri-inĩ wothe wa Misiri, naruo rũtuĩke mahũha moru mũno, manyite andũ o na nyamũ bũrũri-inĩ wothe wa Misiri.”
10 Magĩkĩoya mũrarĩ na magĩthiĩ mbere ya Firauni, nake Musa akĩũikia igũrũ, naguo ũgĩtuĩka mahũha moru mũno makĩnyita andũ o na nyamũ.
11 Nao ago a Misiri makĩremwo nĩ kũrũgama mbere ya Musa nĩ ũndũ wa mahũha macio, tondũ maanyitĩte ago acio o hamwe na andũ othe a Misiri.+
12 No Jehova agĩtĩkĩria Firauni omie ngoro, na akĩrega kũmathikĩrĩria, o ta ũrĩa Jehova eerĩte Musa.+
13 Nake Jehova akĩra Musa atĩrĩ: “Rũciũ ũgookĩra rũcinĩ tene ũthiĩ ũrũgame mbere ya Firauni ũmwĩre ũũ, ‘Jehova Ngai wa Ahibirania aroiga atĩrĩ: “Ĩtĩkĩria andũ akwa mathiĩ nĩguo makandungatĩre.
14 Tondũ rĩu nĩ ngũkũrehera mahũũra makwa mothe, na ndehere ndungata ciaku, na andũ aku, nĩguo ũmenye atĩ gũtirĩ ũngĩ ũhaana ta niĩ thĩinĩ wa thĩ yothe.+
15 Tondũ gũkinyĩria rĩu nĩ ingĩtambũrũkĩtie guoko gwakwa ngakũhũũra ihũũra inene hamwe na andũ aku, na ngakweheria* thĩinĩ wa thĩ.
16 No ũndũ ũyũ nĩguo ũtũmĩte ngwĩtĩkĩrie ũthiĩ na mbere gũkorũo kuo: nĩgetha nguonie hinya wakwa, na nĩguo rĩĩtwa rĩakwa rĩmenyithanio thĩ yothe.+
17 O na rĩu no ũthiĩte na mbere kũrega gwĩtĩkĩria andũ akwa mathiĩ nĩ ũndũ wa mwĩtĩo?
18 Rũciũ ihinda-inĩ ta rĩrĩ nĩ ngaatũma kuure mbura nene mũno ya mbembe, mbura ĩtarĩ yoira rĩngĩ kuuma rĩrĩa Misiri yambĩrĩirie gũtũũrũo nginyagia ũmũthĩ.
19 Nĩ ũndũ ũcio, tũmana uuge mahiũ maku mothe marĩa marĩ werũ-inĩ marehwo matonyio handũ mangĩĩgitia o hamwe na kĩrĩa gĩothe ũrĩ nakĩo. Mũndũ wothe kana nyamũ yothe ĩgaakorererũo ĩtarĩ nyingĩrie nĩ ĩkooragwo nĩ mbura ĩyo ya mbembe.”’”
20 Ndungata cia Firauni iria cietigĩrire kiugo kĩu kĩa Jehova ikĩingĩria ndungata ciacio nyũmba narua o hamwe na mahiũ ma cio,
21 no iria itetigĩrire kiugo kĩu kĩa Jehova itiaingĩririe ndungata ciacio o na mahiũ ma cio.
22 Jehova akĩra Musa atĩrĩ: “Tambũrũkia guoko gwaku na igũrũ, nĩguo mbura ya mbembe yure bũrũri-inĩ wothe wa Misiri,+ yurĩre andũ na nyamũ na mĩmera yothe bũrũri-inĩ wa Misiri.”+
23 Musa agĩgĩtambũrũkia guoko erekeirie rũthanju rwake na igũrũ, nake Jehova agĩtũma kũgĩe marurumĩ na mbura ya mbembe, naguo mwaki* ũkiuma igũrũ, na Jehova agĩtũma mbura ĩyo ĩthiĩ na mbere kuura bũrũri-inĩ wa Misiri.
24 Kwarĩ na mbura ya mbembe ĩtukanĩte na mwaki wamenũkaga. Mbura ĩyo yarĩ nene mũno; mbere ĩyo gũtioirĩte ĩngĩ tayo kuuma rĩrĩa Misiri yatuĩkire rũrĩrĩ.+
25 Yahũũrire indo ciothe cia bũrũri wa Misiri, andũ na nyamũ, na ĩgĩthũkangia mĩmera na mĩtĩ yothe ya bũrũri.+
26 Gosheni kũrĩa Aisiraeli maaikaraga nokuo mbura ĩyo ĩtoirire.+
27 Nĩ ũndũ ũcio Firauni agĩtũmanĩra Musa na Haruni akĩmeera atĩrĩ: “Rĩu nĩ njĩhĩtie. Jehova nĩ mũthingu, no niĩ na andũ akwa nĩ tũhĩtĩtie.
28 Thaithai Jehova nĩguo marurumĩ na mbura ĩno ithire. Na nĩ ngũmwĩtĩkĩria mũthiĩ, na mũtigũikara gũkũ rĩngĩ.”
29 Nake Musa akĩmwĩra ũũ: “Ndoima nja ya itũũra rĩrĩ o ũguo, nĩ ngwambararia moko makwa mbere ya Jehova ndĩmũthaithe. Na marurumĩ na mbura ĩno nĩ igũthira, nĩguo ũmenye atĩ thĩ ĩno nĩ ya Jehova.+
30 No o na kũrĩ ũguo, nĩ njũĩ atĩ wee na ndungata ciaku mũtigwĩtigĩra Jehova Ngai.”
31 Na rĩrĩ, ũguta* na cairi nĩ ciathũkangĩtio, tondũ cairi yarĩ ngũrũ no ndĩakinyĩte kũgethwo naguo ũguta nĩ hĩndĩ warutaga kĩro.
32 No ngano na guthemethu* itiathũkangirio, tondũ itiarĩ ngũrũ.
33 Musa agĩkiuma itũũra-inĩ kũrĩ Firauni na akĩambararia moko make mbere ya Jehova, namo marurumĩ na mbura ĩyo ya mbembe igĩthira, na gũgĩtiga kuura.+
34 Rĩrĩa Firauni oonire nĩ gwatiga kuura, na atĩ mbura ĩyo ya mbembe na marurumĩ nĩ ciathira, akĩhia o rĩngĩ na akĩũmia ngoro,+ na ndungata ciake igĩka o taguo.
35 Firauni agĩthiĩ o na mbere kũmia ngoro, na akĩrega gwĩtĩkĩria Aisiraeli mathiĩ, o ta ũrĩa Jehova ooigĩte kũgerera Musa.+
Tũũhoro twa magũrũ-inĩ
^ Kana “nĩ ingĩkũniinĩte.”
^ Hihi heni nene.
^ Nĩ mũmera wakũragio kuuma tene. Ndigi ciaguo nĩ ciahũthagĩrũo gũthondeka nguo cia gatani.
^ Rora Ũthathaũri wa Ciugo.
