Thimo 26:1-28
26 O ta mbarabu hĩndĩ ya ũrugarĩ na mbura hĩndĩ ya magetha,No taguo gĩtĩo gĩtagĩrĩire mũndũ mũkĩgu.+
2 O ta ũrĩa nyoni ĩkoragwo na gĩtũmi gĩa kũũra na thũngũrũrũ ĩgakorũo na gĩtũmi gĩa kũũmbũka,No taguo kĩrumi gĩtangĩũka hatarĩ na gĩtũmi kĩega.*
3 Kĩboko nĩ kĩa mbarathi, matamu nĩ ma ndigiri,+Naruo rũthanju nĩ rwa mũgongo wa andũ arĩa akĩgu.+
4 Ndũgacokagĩrie mũndũ mũkĩgu kũringana na ũrimũ wake,Nĩgetha ndũkae kũhaana take.*
5 Cokagĩria mũndũ mũkĩgu kũringana na ũrimũ wake,Nĩgetha ndagecirie atĩ nĩ mũũgĩ.+
6 O ta mũndũ ũrĩa wonjagia kũgũrũ gwake mwene na akegera ngero*No taguo mũndũ ũrĩa wĩhokagĩra mũndũ mũkĩgu maũndũ atariĩ.
7 O ta magũrũ marathua* ma mũndũ muonju,No taguo thimo ĩtariĩ ĩrĩ kanua-inĩ ka andũ akĩgu.+
8 O ta kuoherera ihiga kĩgũtha-inĩ,No taguo kũhe mũndũ mũkĩgu riri gũtariĩ.+
9 O ta mũmera wa mĩigua ũrĩ guoko-inĩ kwa mũrĩĩu,No taguo thimo ĩtariĩ ĩrĩ kanua-inĩ ka andũ akĩgu.
10 O ta mũikia wa mĩguĩ ũrĩa ũtihagia mũndũ o wothe,No taguo ũrĩa ũheanaga wĩra kũrĩ mũndũ mũkĩgu kana ehĩtũkĩri atariĩ.
11 O ta ngui ĩrĩa ĩcokagĩrĩra matahĩko mayo,Mũndũ ũrĩa mũkĩgu acokagĩra ũrimũ wake.+
12 Hihi nĩ wonete mũndũ wĩciragia atĩ nĩ mũũgĩ?+
Kwĩ na kĩĩrĩgĩrĩro kĩnene harĩ mũndũ mũkĩgu gũkĩra mũndũ ũcio.
13 Kĩgũũta kiugaga atĩrĩ: “Barabara-inĩ kwĩ na mũrũthi,Kũrĩ na mũrũthi mwĩthĩ kĩhaaro-inĩ kĩa mũingĩ!”+
14 Mũrango ũikaraga ũkĩgarũrũkaga ihocio-inĩ ciaguo,Nakĩo kĩgũũta ũrĩrĩ-inĩ wakĩo.+
15 Kĩgũũta kĩrikagia guoko gwakĩo mbakũri-inĩ ya iruga,Ĩndĩ gĩkanoga mũno gũgũcokia kanua-inĩ.+
16 Kĩgũũta gĩĩciragia atĩ nĩ kĩũgĩGũkĩra andũ mũgwanja arĩa maheanĩte macokio ma ũũgĩ.
17 O ta mũndũ ũnyitĩte ngui matũNo taguo mwĩhĩtũkĩri ũrĩa ũrakaragio nĩ* ngũĩ itamũkoniĩ atariĩ.+
18 O ta mũgũrũki ũrĩa ũikagia icinga cia mwaki, mĩguĩ, na gĩkuũ*
19 No taguo mũndũ atariĩ ũrĩa ũheenagia mũndũ ũrĩa ũngĩ agacoka akoiga, “No itherũ nyuma narĩo!”+
20 Harĩa hatarĩ na ngũ, mwaki nĩ kũhora ũhoraga,Na harĩa hatarĩ mũcambania, ngũĩ nĩ ithiraga.+
21 O ta makara mekĩrĩtwo harĩ mangĩ marakana, na ngũ ciĩkĩrĩtwo mwaki-inĩ,No taguo mũndũ wa ngũĩ akagĩrĩria haaro.+
22 Ciugo cia mũcambania itariĩ ta cienyũ cia irio irĩ na cama;*Imeragio igaikũrũka o nginya nda thĩinĩ.+
23 O ta betha ĩhakĩtwo igũrũ rĩa gĩcere kĩa nyũngũNo taguo ciugo cia wendo ciumĩte* ngoro-inĩ njũru itariĩ.+
24 Mũndũ ũrĩa ũthũire arĩa angĩ ahithaga ũndũ ũcio na mĩromo yake,No thĩinĩ wake akoragwo ahithĩte maheeni.
25 O na angĩaria ciugo cia ũtugi, ndũkamwĩtĩkie,Tondũ thĩinĩ wa ngoro yake kũrĩ na maũndũ mũgwanja marĩ magigi.*
26 O na gũtuĩka rũmena rwake rũhithĩtwo nĩ maheeni,Ũũru wake nĩ ũkoimbũranio kĩũngano-inĩ.
27 Mũndũ ũrĩa wenjaga irima nĩwe ũkaagwa thĩinĩ warĩo,Na mũndũ wothe ũgaragaragia ihiga akarĩeheria, nĩwe rĩgaacokerera.+
28 Rũrĩmĩ rũrĩa rũheenanagia nĩ rũthũire arĩa mahehenjagwo nĩruo,Nako kanua ga kĩgaathi karehaga mwanangĩko.+
Tũũhoro twa magũrũ-inĩ
^ Kana hihi, “No taguo kĩrumi gĩtagĩrĩire gĩtakinyanagĩra.”
^ Kana “Nĩguo ndũkae kwĩiganania nake.”
^ Ũkk., “akanyua ũhinya.”
^ Kana “maranigina.”
^ Kana hihi, “akeingĩria thĩinĩ wa.”
^ Kana “mĩguĩ ĩrĩa ĩrehaga gĩkuũ.”
^ Kana “ta indo cia kũmerio na mũkoroko.”
^ Ũkk., “mĩromo ya kĩgaathi.”
^ Kana “Tondũ ngoro yake nĩ kĩndũ kĩrĩ magigi biũ.”
