Marũa Kũrĩ Tito 2:1-15
2 No wee-rĩ, thiĩ na mbere kwaragia maũndũ marĩa maratwarana na ũrutani ũrĩa wagĩrĩire.*+
2 Athuri arĩa akũrũ nĩ mekage maũndũ na ũigananĩru, moyage maũndũ na ũritũ, marĩ na meciria mega, mehandĩte wega thĩinĩ wa wĩtĩkio, wendo, na ũkirĩrĩria.
3 O nao atumia arĩa akũrũ magĩrĩirũo gũkoragwo na mĩthiĩre ĩratĩithia Ngai, no ti acambania, ti ngombo cia ndibei nyingĩ, matuĩke arutani a maũndũ marĩa mega,
4 nĩguo mataarage* atumia arĩa ethĩ kwenda athuri ao, kwenda ciana ciao,
5 gũkoragwo na meciria mega, marĩ na mĩthiĩre mĩtheru, aruti wĩra kwao mĩciĩ,* ega, menyihagĩrie athuri ao,+ nĩguo kiugo kĩa Ngai gĩtigacambio.
6 O taguo, ikaraga ũgĩtaaraga anake makoragwo na meciria mega,+
7 ũkĩonanagia atĩ ũrĩ kĩonereria gĩa ciĩko njega na njĩra ciothe. Rutanaga maũndũ marĩa matheru* hatarĩ itherũ,+
8 ũkĩhũthagĩra ciugo iria ciagĩrĩire* itangĩrutwo mahĩtia,+ nĩguo arĩa makararagia maconorithio, tondũ wa kwaga ũndũ mũũru mangiuga igũrũ ritũ.+
9 Ngombo nĩ ciĩnyihagĩrie ene cio maũndũ-inĩ mothe,+ ikĩgeragia kũmakenia, itegũcokanĩria nao,
10 itekũmaiya,+ ĩndĩ irĩ njĩhokeku biũ, nĩguo igoocithagie na njĩra ciothe ũrutani wa Ngai, o we Mũhonokia witũ.+
11 Nĩ gũkorũo ũtugi mũnene wa Ngai nĩ ũguũrĩtio, ũkarehera andũ a mĩthemba yothe ũhonokio.+
12 Ũtũmenyeragia kũregana na maũndũ marĩa matakenagia Ngai, na merirĩria ma thĩ,+ na gũtũũra tũrĩ na meciria mega na ũthingu na wĩrutĩri Ngai mũtabarĩre-inĩ ũyũ wa maũndũ,*+
13 o tũgĩetagĩrĩra kĩĩrĩgĩrĩro kĩrĩa kĩrĩ gĩkeno+ na kũguũrio kũrĩ riri kwa Ngai ũrĩa mũnene o na kwa Mũhonokia witũ, Jesu Kristo,
14 ũrĩa weneanire we mwene nĩ ũndũ witũ+ nĩguo atũkũũre*+ kuumana na uuni-watho wa mĩthemba yothe na atherie andũ matuĩke kĩndũ gĩake kĩa mwanya, marĩ na kĩyo gĩa gwĩka ciĩko iria njega.+
15 Thiĩ na mbere kwaria maũndũ macio, ũgĩtaaranaga* na ũkarũngana ũrĩ na wathani wothe.+ Ndũkanareke mũndũ o na ũrĩkũ akũire.
Tũũhoro twa magũrũ-inĩ
^ Kana “ũrĩ ũguni.”
^ Kana “maririkanagie; mamenyeragie.”
^ Kana “marũmbũyagie mĩciĩ yao.”
^ Kana hihi, “Rutana ũrĩ na ũtheru.”
^ Kana “irĩ na ũguni.”
^ Kana “mahinda-inĩ maya.” Rora Ũthathaũri wa Ciugo.
^ Ũkk., “arute ũkũũri nĩ ũndũ witũ; atũhonokie.”
^ Kana “ũgĩkĩranaga ngoro.”
