Zekaria 1:1-21
1 Na rĩrĩ, mweri-inĩ wa kanana, mwaka wa kerĩ wa Dario,+ kiugo kĩa Jehova nĩ gĩakinyĩire mũnabii Zekaria*+ mũrũ wa Berekia mũrũ wa Ido, akĩrũo atĩrĩ:
2 “Jehova nĩ aarakarire mũno nĩ ũndũ wa maithe manyu.+
3 “Meere atĩrĩ, ‘Jehova mũnene wa ita oigĩte ũũ: “‘Njokererai,’ ũguo nĩguo Jehova mũnene wa ita ekuuga, ‘na niĩ nĩ ngũmũcokerera,’+ ũguo nĩguo Jehova mũnene wa ita ekuuga.”’
4 “‘Mũtikahaane ta maithe manyu, o acio maahunjĩirio nĩ anabii a tene makĩrũo atĩrĩ: “Jehova mũnene wa ita oigĩte ũũ, ‘Garũrũkai* mũtigane na mĩthiĩre yanyu mĩũru na ciĩko cianyu njũru.’”’+
“‘No o matiathikĩrĩirie, na matiigana kũndegera gũtũ,’+ ũguo nĩguo Jehova ekuuga.
5 “‘Maithe manyu marĩ kũ rĩu? Na hihi anabii acio nĩ maatũũrire tene na tene?
6 No rĩrĩ, ciugo ciakwa na mawatho makwa marĩa ndathĩte ndungata ciakwa anabii, nĩ maakinyĩire maithe manyu, na githĩ tiguo?’+ Nĩ ũndũ ũcio, makĩnjokerera na makiuga atĩrĩ: ‘Jehova mũnene wa ita atwĩkĩte kũringana na mĩthiĩre itũ na ciĩko citũ, o ta ũrĩa aatuĩte gwĩka.’”+
7 Mũthenya wa 24 wa mweri wa 11, ũguo nĩ kuuga, mweri wa Shebati,* mwaka-inĩ wa kerĩ wa Dario,+ kiugo kĩa Jehova nĩ gĩakinyĩire mũnabii Zekaria mũrũ wa Berekia mũrũ wa Ido, akĩrũo atĩrĩ:
8 “Nĩ ndonire kĩoneki ũtukũ. Ngĩona mũndũ watwarithagia mbarathi ndune, na akĩrũgama gatagatĩ-inĩ ka mĩtĩ ya mĩhandathi mũkuru-inĩ; na thutha wake kwarĩ na mbarathi ndune, cia gĩĩtĩri, na cia rangi mwerũ.”
9 Na niĩ ngĩũria atĩrĩ: “Mwathi wakwa, aya nĩa?”
Mũraika ũrĩa waaragia na niĩ akĩnjokeria akĩnjĩra: “Nĩ ngũkuonia aya nĩa.”
10 Nake mũndũ ũcio warũgamĩte gatagatĩ-inĩ ka mĩtĩ ya mĩhandathi akiuga: “Aya nĩ arĩa Jehova atũmĩte mathiĩ kũndũ na kũndũ thĩinĩ wa thĩ.”
11 Nao makĩra mũraika ũcio wa Jehova warũgamĩte gatagatĩ-inĩ ka mĩtĩ ya mĩhandathi atĩrĩ: “Nĩ tũthiĩte kũndũ na kũndũ thĩinĩ wa thĩ, na rĩrĩ, thĩ yothe nĩ ĩhooreire na ĩrĩ na thayũ.”+
12 Nĩ ũndũ ũcio, mũraika wa Jehova akĩũria ũũ: “Atĩrĩrĩ wee Jehova mũnene wa ita, ũgũikara nginya rĩ ũtekũiguĩra Jerusalemu na matũũra ma Juda tha,+ o macio ũtũire ũrakarĩire mĩaka ĩyo 70?”+
13 Jehova agĩcokeria mũraika ũcio waaragia na niĩ, na ciugo cia ũtugi na cia kũũmĩrĩria.
14 Nake mũraika ũcio waaragia na niĩ akĩnjĩra atĩrĩ: “Anĩrĩra uuge ũũ, ‘Jehova mũnene wa ita ekuuga atĩrĩ: “Ndĩ na kĩyo, kĩyo kĩnene nĩ ũndũ wa Jerusalemu na nĩ ũndũ wa Zayuni.+
15 Nĩ ndakarĩte, ngarakara mũno nĩ ũndũ wa ndũrĩrĩ iria cikaraga itekũmaka,+ tondũ ndaiguaga ndakarĩte o hanini,+ no ikĩongerera ũũru ũcio.”’+
16 “Nĩ ũndũ ũcio, ũũ nĩguo Jehova ekuuga: ‘“Nĩ ngaacoka Jerusalemu ndĩ na tha,+ na nyũmba yakwa nĩ ĩgaakwo kuo,”+ ũguo nĩguo Jehova mũnene wa ita ekuuga, “na rũrigi rwa gũthima nĩ rũgaatambũrũkio igũrũ rĩa Jerusalemu.”’+
17 “Anĩrĩra rĩngĩ uuge ũũ, ‘Jehova mũnene wa ita ekuuga atĩrĩ: “Matũũra makwa nĩ makaiyũra maũndũ mega rĩngĩ; na Jehova nĩ akomĩrĩria Zayuni rĩngĩ,+ na athuure Jerusalemu o rĩngĩ.”’”+
18 Ngĩcoka ngĩtiira maitho ngĩona hĩa inya.+
19 Kwoguo ngĩũria mũraika ũcio waaragia na niĩ atĩrĩ: “Ici nacio nĩ ndũĩ?” Nake akĩnjokeria akĩnjĩra: “Ici nĩ hĩa iria ciahurunjire Juda,+ Isiraeli,+ na Jerusalemu.”+
20 Jehova agĩcoka akĩnyonia mabundi mana.
21 Na niĩ ngĩũria atĩrĩ: “Aya maroka gwĩka atĩa?”
Nake akĩnjĩra: “Hĩa icio nĩcio ciahurunjire Juda ũũ atĩ gũtirĩ mũndũ wahotire gũtiira mũtwe wake. Nao aya angĩ nĩ magooka gũtũma ciĩtigĩre, magũithie hĩa cia ndũrĩrĩ thĩ, ndũrĩrĩ o icio ciaambararirie hĩa ciacio kwerekera bũrũri wa Juda, nĩguo ciũhurunje.”
Tũũhoro twa magũrũ-inĩ
^ Rĩĩtwa rĩu riugĩte “Jehova nĩ Aririkanĩte.”
^ Kana “Njokererai.”
^ Rora Ũhoro Muongerere B15.
