Zekaria 12:1-14
12 Ĩno nĩ ndũmĩrĩri nditũ:
“Gĩkĩ nĩkĩo kiugo kĩa Jehova gĩkoniĩ Isiraeli,” ũguo nĩguo Jehova ekuuga,O we watambũrũkirie igũrũ,+Na akĩiga mũthingi wa thĩ,+Na nowe wathondekire roho wa* mũndũ thĩinĩ wake.
2 “Nĩ ngũtũma Jerusalemu ĩtuĩke gĩkombe gĩa* gũtũma ikundi ciothe cia andũ iria irigicĩirie itũgũge; na Juda nĩ ĩkaarigicĩrio o hamwe na Jerusalemu.+
3 Mũthenya ũcio nĩ ngaatũma Jerusalemu ĩtuĩke ihiga iritũ harĩ ikundi ciothe cia andũ. Na andũ arĩa othe makaarĩoya na igũrũ hatarĩ nganja nĩ makaagurario mũno;+ na ndũrĩrĩ ciothe cia thĩ nĩ igaacokanĩrĩra imĩũkĩrĩre.”+
4 Jehova ekuuga atĩrĩ, “Mũthenya ũcio, nĩ ngaatũma mbarathi o yothe ĩnyitwo nĩ guoya na ũrĩa ũramĩtwarithia agũrũke. Maitho makwa magaaikara marorete nyũmba ya Juda, no nĩ ngaatumumaria mbarathi ciothe cia ikundi cia andũ.
5 Nao anene* a Juda nĩ makoiga ũũ ngoro-inĩ yao, ‘Aikari a Jerusalemu nĩo hinya witũ kũgerera harĩ Jehova mũnene wa ita, o we Ngai wao.’+
6 Mũthenya ũcio nĩ ngaatũma anene a Juda mahaane ta nyũngũ ĩrĩ na mwaki ĩrĩ gatagatĩ-inĩ ka ngũ na mahaane ta gĩcinga kĩa mwaki kĩrĩ kĩohe-inĩ kĩa ngano* ĩrĩa ĩtinĩtio,+ na nĩ magaacina ikundi ciothe cia andũ iria irigicĩirie mwena wa ũrĩo na wa ũmotho;+ na aikari a Jerusalemu nĩ magaatũũra rĩngĩ handũ hao,* thĩinĩ wa Jerusalemu.+
7 “Na Jehova akaamba kũhonokia hema cia Juda, nĩguo ũthaka* wa nyũmba ya Daudi na ũthaka* wa aikari a Jerusalemu wage gũkorũo ũrĩ mũnene mũno gũkĩra wa Juda.
8 Mũthenya ũcio Jehova agaakorũo arĩ ũgitĩri gũthiũrũrũkĩria aikari a Jerusalemu;+ mũthenya ũcio, mũndũ ũrĩa ũkaahĩngwo* gatagatĩ-inĩ kao akaahaana o ta Daudi, nayo nyũmba ya Daudi ĩhaane o ta Ngai, ta mũraika wa Jehova ũrĩa ũthiaga arĩ mbere yao.+
9 Na mũthenya ũcio hatarĩ nganja nĩ ngaaniina ndũrĩrĩ ciothe iria igookĩrĩra Jerusalemu.+
10 “Nĩ ngaaitĩrĩria nyũmba ya Daudi na aikari a Jerusalemu roho wa gwĩtĩkĩrĩka na gũthaithana, na nĩ makeerorera mũndũ ũrĩa maathecire,+ na nĩ makaamũrĩrĩra ta ũrĩa mangĩrĩrĩra mũrũ wa mũmwe; na nĩ makaamũcakaĩra marĩ na ruo rũingĩ ta ũrĩa mangĩcakaĩra mũrũ wa irigithathi.
11 Mũthenya ũcio, kĩrĩro kĩrĩa gĩgaakorũo Jerusalemu gĩgaakorũo kĩrĩ kĩnene, o ta kĩrĩro kĩa Hadadirimoni Werũ-inĩ wa Megido.+
12 Na bũrũri ũcio nĩ ũkaagĩa na kĩrĩro, o famĩlĩ ĩrĩ iki; famĩlĩ ya nyũmba ya Daudi ĩrĩ iki, na atumia ao marĩ oiki; famĩlĩ ya nyũmba ya Nathani+ ĩrĩ iki, na atumia ao marĩ oiki;
13 famĩlĩ ya nyũmba ya Lawii+ ĩrĩ iki, na atumia ao marĩ oiki; famĩlĩ ya Ashimei+ ĩrĩ iki, na atumia ao marĩ oiki;
14 na famĩlĩ ciothe iria itigarĩte, o famĩlĩ ĩrĩ iki, na atumia ao marĩ oiki.
Tũũhoro twa magũrũ-inĩ
^ Kana “mĩhũmũ ya.”
^ Kana “mbakũri ya.”
^ Anene acio maarĩ atongoria a mĩhĩrĩga.
^ Kana “cairi.”
^ Kana “handũ hao harĩa hagĩrĩire.”
^ Kana “riri.”
^ Kana “riri.”
^ Kana “ũrĩa wagĩte hinya biũ.”