Zekaria 7:1-14
7 Na rĩrĩ, mwaka-inĩ wa kana wa Mũthamaki Dario, kiugo kĩa Jehova nĩ gĩakinyĩire Zekaria+ mũthenya wa kana wa mweri wa kenda, ũguo nĩ kuuga mweri wa Kisilevu.*
2 Andũ a Betheli nĩ maatũmire Sharezeru marĩ na Regemu-meleku hamwe na andũ ake magathaithane nĩguo metĩkĩrĩke nĩ* Jehova,
3 na njĩra ya kũũria athĩnjĩri-Ngai a nyũmba* ya Jehova mũnene wa ita o hamwe na anabii atĩrĩ: “Hihi nĩ njagĩrĩirũo kũrĩra mweri-inĩ wa gatano+ na gwĩthema kũrĩa irio, ta ũrĩa ndũire njĩkĩte ihinda rĩa mĩaka mĩingĩ?”
4 Kiugo kĩa Jehova mũnene wa ita gĩkĩnginyĩra o rĩngĩ ngĩrũo atĩrĩ:
5 “Ũria andũ othe a bũrũri na athĩnjĩri-Ngai atĩrĩ, ‘Ihinda-inĩ rĩa mĩaka 70+ rĩrĩa mwehingaga na mũkarĩra mweri-inĩ wa gatano na mweri-inĩ wa mũgwanja-rĩ,+ hihi mwehingaga nĩ ũndũ wakwa?
6 Na hĩndĩ ĩrĩa mwarĩaga na mũkanyua-rĩ, na githĩ mũtiarĩaga nĩ ũndũ wanyu ene na mũkanyua nĩ ũndũ wanyu ene?
7 Githĩ mũtiagĩrĩirũo gwathĩkĩra ciugo iria Jehova aarĩtie kũgerera anabii a tene,+ hĩndĩ ĩrĩa Jerusalemu na matũũra marĩa maamĩthiũrũrũkĩirie gwaikaragwo na kwarĩ na thayũ, na hĩndĩ ĩrĩa Negebu na Shefela gwaikaragwo?’”
8 Kiugo kĩa Jehova gĩgĩkinyĩra Zekaria o rĩngĩ akĩrũo atĩrĩ:
9 “Jehova mũnene wa ita ekuuga atĩrĩ, ‘Tuanagĩrai na kĩhooto kĩa ma,+ na muonanagie wendo mwĩhokeku+ mũndũ na ũrĩa ũngĩ na mũiguanagĩre tha.
10 Mũtikahinyagĩrĩrie mũtumia wa ndigwa kana mwana ũrĩa ũtarĩ ithe,*+ mũndũ wa kũngĩ+ kana ũrĩa mũthĩni;+ na mũtigathugundage ũndũ mũũru ngoro-inĩ cianyu+ kwerekera mũndũ ũrĩa ũngĩ.’
11 No nĩ maaregire gũthikĩrĩria,+ na makĩhũgũra mĩgongo yao momĩtie ciongo,+ na makĩhinga matũ mao nĩguo matikaigue.+
12 Maatũmire ngoro ciao ihaane o ta ihiga rĩa arimathi*+ na makĩrega gwathĩkĩra watho* na ciugo iria Jehova mũnene wa ita aatũmire kũgerera roho wake akĩhũthĩra anabii a tene.+ Nĩ ũndũ ũcio gũkĩgĩa na mang’ũrĩ manene kuuma kũrĩ Jehova mũnene wa ita.”+
13 “‘O ta ũrĩa maaregire gũthikĩrĩria rĩrĩa ndetanire,+ noguo o na niĩ ndaregire gũthikĩrĩria rĩrĩa meetanire,’+ ũguo nĩguo Jehova mũnene wa ita ekuuga.
14 ‘Na ngĩmahurunja na rũhuho rũnene kũndũ guothe ndũrĩrĩ-inĩ ciothe iria mataamenyete,+ na magĩtiga bũrũri ũcio ũrĩ kũndũ gũtiganĩrie, gũtarĩ mũndũ ũrahĩtũkĩra kuo kana ũracoka kuo;+ nĩ gũkorũo nĩ maatũmire bũrũri ũcio wa kwĩrirĩrio ũtuĩke kĩndũ gĩa kũguoyohia.’”
Tũũhoro twa magũrũ-inĩ
^ Rora Ũhoro Muongerere B15.
^ Kana “mororoie ũthiũ wa.”
^ Kana “hekarũ.”
^ Kana “mwana wa ndigwa.”
^ Kana hihi, “ihiga rĩũmũ.”
^ Kana “ũrutani.”
