Zekaria 8:1-23
8 Kiugo kĩa Jehova mũnene wa ita nĩ kĩanginyĩire o rĩngĩ ngĩrũo atĩrĩ:
2 “Ũũ nĩguo Jehova mũnene wa ita ekuuga, ‘Nĩ ngaakorũo na kĩyo, kĩyo kĩnene nĩ ũndũ wa Zayuni,+ na ngorũo na kĩyo nĩ ũndũ wakuo ndĩ na marakara manene.’”
3 “Ũũ nĩguo Jehova ekuuga, ‘Nĩ ngaacoka Zayuni+ na njikare Jerusalemu;+ na Jerusalemu ĩgeetagwo itũũra rĩa ũhoro wa ma,*+ na kĩrĩma kĩa Jehova mũnene wa ita gĩgeetagwo kĩrĩma kĩrĩa kĩamũre.’”+
4 “Jehova mũnene wa ita ekuuga atĩrĩ, ‘Athuri o na atumia akũrũ nĩ magaaikaraga o rĩngĩ ihaaro-inĩ cia mũingĩ cia Jerusalemu, o ũmwe wao arĩ na mũtirima guoko-inĩ gwake nĩ ũndũ wa mĩaka yake mĩingĩ.*+
5 Na ihaaro cia mũingĩ cia itũũra nĩ ikaaiyũrũo nĩ tũhĩĩ na tũirĩtu tũgĩthaakĩra kuo.’”+
6 “Jehova mũnene wa ita ekuuga atĩrĩ, ‘O na gũtuĩka ũndũ ũcio no woneke ũrĩ mũritũ mũno harĩ arĩa magaakorũo matigarĩte gatagatĩ-inĩ ka andũ aya matukũ-inĩ macio-rĩ, hihi ũndũ ũcio nĩ wagĩrĩirũo kuonwo ũrĩ mũritũ mũno nginya harĩ niĩ?’ ũguo nĩguo Jehova mũnene wa ita ekuuga.”
7 “Jehova mũnene wa ita ekuuga atĩrĩ, ‘Nĩ ngũhonokia andũ akwa kuuma mabũrũri-inĩ ma mwena wa irathĩro na wa ithũĩro.+
8 Na nĩ ngaamarehe, na maikarage thĩinĩ wa Jerusalemu;+ nao nĩ magaatuĩka andũ akwa, na niĩ nduĩke Ngai wao+ ũhoro-inĩ wa ma* na wa ũthingu.’”
9 “Jehova mũnene wa ita ekuuga atĩrĩ, ‘Ĩkĩrai moko manyu hinya,*+ inyuĩ mũraigua ciugo ici rĩu kuuma kanua-inĩ ka anabii,+ ciugo o iria ciaaririo mũthenya ũrĩa mũthingi wa nyũmba ya Jehova mũnene wa ita waakirũo nĩguo hekarũ yakwo.
10 Nĩ gũkorũo mbere ya hĩndĩ ĩyo, gũtirĩ mũcara waheanagwo harĩ mũndũ kana nyamũ;+ na kwarĩ ũgwati kũingĩra na kuuma nĩ ũndũ wa thũ, nĩ gũkorũo nĩ ndatũmire andũ othe mokanĩrĩre mũndũ na ũrĩa ũngĩ.’
11 “‘No rĩu ndigwĩka andũ arĩa matigarĩte gatagatĩ-inĩ ka andũ aya ta ũrĩa ndekire matukũ macio ma mbere,’+ ũguo nĩguo Jehova mũnene wa ita ekuuga.
12 ‘Nĩ gũkorũo mbeũ ya thayũ nĩ ĩkaahandwo; mũthabibũ nĩ ũkaaruta maciaro maguo na thĩ ĩrute maciaro mayo,+ narĩo igũrũ nĩ rĩgaita ime rĩarĩo; na nĩ ngaatũma arĩa matigarĩte gatagatĩ-inĩ ka andũ aya megaĩre maũndũ macio mothe.+
13 Ningĩ o ta ũrĩa mwatuĩkire kĩndũ gĩa kũgwetagwo kĩrumi-inĩ gatagatĩ-inĩ ka ndũrĩrĩ,+ inyuĩ nyũmba ya Juda na nyũmba ya Isiraeli, noguo ngaamũhonokia, na nĩ mũgaatuĩka kĩrathimo.+ Mũtigetigĩre!+ Ĩkĩrai moko manyu hinya.’*+
14 “Nĩ gũkorũo Jehova mũnene wa ita oigĩte atĩrĩ, ‘“O ta ũrĩa ndehotorete kũmũrehera ũũru tondũ maithe manyu ma tene nĩ maatũmĩte ndakare,” ũguo nĩguo Jehova mũnene wa ita ekuuga, “na ndiigana kwĩricũkwo-rĩ,+
15 no taguo ihinda rĩrĩ ndĩhotorete gwĩkĩra Jerusalemu maũndũ mega o hamwe na nyũmba ya Juda.+ Mũtigetigĩre!”’+
16 “‘Maya nĩmo maũndũ marĩa mwagĩrĩirũo gwĩka: Aragiai ũhoro wa ma mũndũ na ũrĩa ũngĩ,+ na matuĩro marĩa mũrĩtuanagĩra ihingo-inĩ cianyu manyitage mbaru ũhoro wa ma na thayũ.+
17 Mũtigathugundage ũndũ mũũru ngoro-inĩ cianyu kwerekera mũndũ ũrĩa ũngĩ,+ na mũtikendage mwĩhĩtwa o wothe wa maheeni;+ tondũ maũndũ macio mothe nĩ ndĩmathũire,’+ ũguo nĩguo Jehova ekuuga.”
18 Kiugo kĩa Jehova mũnene wa ita gĩkĩnginyĩra o rĩngĩ ngĩrũo atĩrĩ:
19 “Jehova mũnene wa ita oigĩte atĩrĩ, ‘Kwĩhinga kwa mweri wa kana,+ kwĩhinga kwa mweri wa gatano,+ kwĩhinga kwa mweri wa mũgwanja,+ na kwĩhinga kwa mweri wa ikũmi,+ gũgaatuĩka mahinda ma gũcanjamũra na ma gĩkeno harĩ nyũmba ya Juda—ciathĩ cia gĩkeno.+ Nĩ ũndũ ũcio endagai ũhoro wa ma na thayũ.’
20 “Jehova mũnene wa ita oigĩte atĩrĩ, ‘Nĩ gũgaakinya atĩ ikundi cia andũ na aikari a matũũra maingĩ nĩ magooka;
21 na aikari a itũũra rĩmwe nĩ magaathiaga kũrĩ aikari a itũũra rĩngĩ na makoiga ũũ: “Nĩ twĩrutanĩriei tũthiĩ tũgathaithane nĩguo twĩtĩkĩrĩke nĩ* Jehova na tũgacarie Jehova mũnene wa ita. O na niĩ nĩ ngũthiĩ.”+
22 Na ikundi nyingĩ cia andũ na ndũrĩrĩ irĩ hinya nĩ igooka gũcaria Jehova mũnene wa ita thĩinĩ wa Jerusalemu+ na gũthaithana nĩguo ciĩtĩkĩrĩke nĩ* Jehova.’
23 “Jehova mũnene wa ita oigĩte atĩrĩ, ‘Matukũ-inĩ macio, andũ ikũmi kuuma harĩ thiomi ciothe cia ndũrĩrĩ+ nĩ makaanyita, ti itherũ, nĩ makaanyita marũmĩtie kanjũ* ya Mũyahudi* moige atĩrĩ: “Tũrenda gũthiĩ hamwe na inyuĩ,+ tondũ nĩ tũiguĩte atĩ Ngai arĩ hamwe na inyuĩ.”’”+
Tũũhoro twa magũrũ-inĩ
^ Kana “rĩa wĩhokeku.”
^ Ũkk., “nĩ ũndũ wa ũingĩ wa matukũ.”
^ Kana “wa kwĩhokeka.”
^ Kana “Mwĩhei hinya.”
^ Kana “Mwĩhei hinya.”
^ Kana “tuororoie ũthiũ wa.”
^ Kana “ciororoie ũthiũ wa.”
^ Kana “gĩcũrĩ kĩa nguo.”
^ Ũkk., “mũndũ Mũyahudi.”
