3:1-5

Nĩ kĩĩ gĩatũmire Jesu arakare na aigue ũũru mũno nĩ ũndũ wa mwĩcirĩrie wa atongoria a ndini ya Kĩyahudi? Tondũ nĩ maatũmire mũthenya wa Thabatũ ũritũhe na njĩra ya kuongerera mawatho mangĩ maingĩ. Kwa ngerekano, nĩ gwakananĩtio kũũraga thuya mũthenya wa thabatũ. Kũhonania gwetĩkĩrĩtio nĩ watho angĩkorũo muoyo warĩ ũgwati-inĩ. Ũguo nĩ kuuga mũndũ angĩoinĩkire kana athenyũke ndangĩathondekirũo mũthenya wa Thabatũ. Kwoguo, atongoria a ndini matiarũmbũyagia mũndũ ũcio warĩ muonju guoko o na hanini.