ŨNDŨ ŨCIO NĨ WA BATA NĨKĨ?: Arĩa aitĩrĩrie maguta o hamwe na arĩa a ng’ondu ingĩ nĩ manyitaga ũgeni andũ a mĩthemba yothe moke ‘manyue maĩ ma muoyo hatarĩ marĩhi.’ (Kũg 22:17) Maĩ macio ma mũhaano marũgamĩrĩire indo iria Jehova aheanĩte nĩguo ahonokie andũ arĩa athĩki kuuma kũrĩ mehia na gĩkuũ. Nĩguo tũteithie andũ kuuma ũndũire ũtiganĩte na marĩ na mawĩtĩkio matiganĩte ma kĩĩndini, nĩ tũrabatara kũheana “ũhoro mwega wa tene na tene” na njĩra ĩkũgucĩrĩria mũndũ o mũndũ.—Kũg 14:6.

ŨRĨA TŨNGĨKA ŨGUO:

• Thuura ũndũ wa kwarĩrĩria na rĩandĩko rĩrĩa rĩngĩhutia ngoro cia andũ a itũũra rĩanyu. No ũthuure ũndũ kuuma gacunjĩ ga gũteereta na mũndũ ũtungata-inĩ, kana ũhũthĩre ũndũ ũngĩ ũrĩa wanona ũrĩ na moimĩrĩro mega. Nĩ kĩongo kĩrĩkũ kana maandĩko marĩkũ mathikagĩrĩrio wega? Hihi nĩ harĩ na mohoro ma ica ikuhĩ andũ mareciria ũhoro wamo kana makarĩrĩria? Nĩ ũndũ ũrĩkũ ũngĩkorũo na moimĩrĩro mega harĩ mũthuri kana harĩ mũtumia?

• Ũkĩaria hũthĩra ngeithi na ũndũire ũrĩa andũ a kwanyu mamenyerete.—2Ko 6:3, 4

• Menya mabuku na video iria irĩ thĩinĩ wa Gathandũkũ Gaitũ ka Indo cia Kũrutana iria ũngĩonia mũndũ ũrakenio nĩ ũhoro

• Ruta intaneti-inĩ indo cia thiomi iria ciaragio nĩ andũ arĩa ũngĩcemania nao itũũra-inĩ rĩanyu

• Garũrĩra ũndũ ũrĩa ũkwaragĩrĩria ũringane na mabataro ma mwene nyũmba. (1Ko 9:19-23) Kwa ngerekano-rĩ, ũngiuga atĩa ũngĩmenya atĩ mwene nyũmba nĩ erĩgĩte gũkuĩrũo nĩ mũndũ wa hakuhĩ?

WĨRORERE VIDEO, ŨCOKE ŨCOKIE CIŨRIA ICI:

• Mũhunjia aambĩrĩirie kwarĩrĩria ũndũ ũrĩkũ na mwene nyũmba?

• Nĩ ũndũ ũrĩkũ mwene nyũmba aahiũranagia naguo ũtũũro-inĩ?

• Nĩ rĩandĩko rĩrĩkũ rĩngĩagĩrĩire ihinda-inĩ rĩu, na nĩkĩ?

• Ũgarũragĩra atĩa ũndũ ũrĩa ũkwaragĩrĩria nĩguo ũgucĩrĩrie andũ itũũra-inĩ rĩanyu?