Rĩrĩa werorera ihũa ithaka, njata ciyũire igũrũ, kana kĩrurumo-rĩ, hihi nĩ wĩciragia ũhoro wa ũrĩa waciũmbire? Ũũmbi ũrĩa ũtũthiũrũrũkĩirie nĩ wonanagia wega ngumo cia Jehova iria itonekaga na maitho. (Ro 1:20) Tũngĩhũthagĩra mahinda gwĩcũrania ũhoro wĩgiĩ indo iria tuonaga, no tũhote kuona hinya wa Ngai, wendo, ũũgĩ, kĩhooto, o hamwe na ũtaana wake.—Thb 104:24.

Nĩ ũũmbi ũrĩkũ wa Jehova wonaga o mũthenya? O na angĩkorũo ũikaraga taũni, no wone nyoni kana mĩtĩ. Kwĩrorera ũũmbi wa Jehova na kinyi no gũtũteithie kũnyihia mĩtangĩko, tũige meciria maitũ harĩ maũndũ marĩa ma bata makĩria, na tuongerere wĩtĩkio witũ harĩ ũhoti wa Jehova wa gũtũrũmbũiya tene na tene. (Mat 6:25-32) Angĩkorũo ũrĩ na ciana, citeithie kuona ngumo cia Jehova iria gũtarĩ kĩndũ ingĩringithanio nakĩo. O ũrĩa tũrĩonanagia ngatho nĩ ũndũ wa ũũmbi ũrĩa ũtũthiũrũrũkĩirie, noguo tũrĩkuhagĩrĩria Mũũmbi witũ.—Thb 8:3, 4.

WĨRORERE VIDEO YA MAAJABU YA UUMBAJI YANAFUNUA UTUKUFU WA MUNGU—NURU NA RANGI, ŨCOKE ŨCOKIE CIŨRIA ICI:

• Nĩ kĩĩ gĩtũmaga tũhote kuona marangi?

• Nĩ kĩĩ gĩtũmaga tuone kĩndũ ta kĩracenjia marangi kũringana na mwena ũrĩa tũrakĩrorera?

• Nĩ kĩĩ gĩtũmaga tuone igũrũ kũrĩ na marangi matiganĩte?

• Nĩ marangi marĩkũ wonaga marĩ mathaka werorera ũũmbi hakuhĩ na kũrĩa ũikaraga?

• Twagĩrĩirũo kũhũthĩra mahinda kwĩrorera ũũmbi na kinyi nĩkĩ?