Jakubu nĩ aamenyaga atĩ Jehova endaga wĩrutĩri wa ngoro yothe, o na gũtuĩka hĩndĩ ĩyo Jehova ndaaheanĩte watho wa gũkaanania ũhoi mĩhianano. (Tham 20:3-5) Kwoguo rĩrĩa Jehova aamwĩrire acoke Betheli, Jakubu eerire arĩa othe maarĩ nao meherie mĩhianano yao. Jakubu aacokire agĩte mĩhianano ĩyo hamwe na icũhĩ cia matũ iria hihi ciekĩragwo irĩ ta ithitũ. (Kĩa 35:1-4) Hatarĩ nganja Jehova nĩ aakenirio nĩ ũndũ ũcio Jakubu eekire.

Mahinda-inĩ maitũ-rĩ, tũngĩhe Jehova atĩa wĩrutĩri wa ngoro yothe? Ũndũ ũmwe tũngĩka nĩ gwĩthema ũndũ o wothe ũkonainie na ũhoi mĩhianano kana maũndũ ma ndaimono. Ũndũ ũcio ũhutĩtie gũte indo o ciothe ihutanĩtie na ndaimono na gũthuthuria maũndũ marĩa twĩkenagia namo. Kwa ngerekano, wĩyũrie ũũ: ‘Hihi nĩ ngenagio nĩ mabuku kana thenema iria cionanagia maũndũ ma ndaimono kana andũ marĩ na mahinya makĩrĩte ma ndũire? Hihi maũndũ marĩa ndĩkenagia namo nĩ monanagia maũndũ ma ũgo, ũragũri, na gũtiganĩra irumi ta arĩ maũndũ ma gwĩkenia matangĩthũkia mũndũ?’ Twagĩrĩirũo gwĩthema biũ ũndũ o wothe Jehova athũire.—Thb 97:10.

WĨRORERE VIDEO YA “REGANAGAI NA MŨCUKANI,” ŨCOKE ŨCOKIE CIŨRIA ICI:

• Nĩ thĩna ũrĩkũ woimĩrire ũtũũro-inĩ wa mũrutwo ũmwe wa Bibilia wĩtagwo Palesa?

• Nĩkĩ nĩ ũndũ wa ũũgĩ gũcaria ũteithio wa athuri a kĩũngano angĩkorũo mũndũ arĩ na thĩna ũkoniĩ maũndũ ma ndaimono?

• Angĩkorũo nĩ tũrenda ũgitĩri wa Jehova-rĩ, nĩ maũndũ marĩkũ twagĩrĩirũo gwĩthema?

• Nĩ ikinya rĩrĩkũ irũmu Palesa ooire?

• Kũrĩa ũikaraga-rĩ, nĩ njĩra ta irĩkũ mũndũ angĩĩthema kwĩingĩrania na maũndũ ma ndaimono?