O mwaka, andũ a Jehova nĩ merĩgagĩrĩra gũkũngũĩra Kĩririkano marĩ hamwe. Wiki cigana ũna mbere na thutha wa Kĩririkano, nĩ twendaga kũhũthĩra wega mĩeke ya mwanya ĩrĩa tũkoragwo nayo ya kũgooca Jehova, na kũmũcokeria ngatho nĩ ũndũ wa kĩheo gĩa ũkũũri. (Ef 1:3, 7) Kwa ngerekano, nĩ twĩrutanagĩria biũ kũnyita ũgeni andũ arĩa angĩ moke Kĩririkano. Andũ amwe nĩ mahotaga kũbanga maũndũ mao makoya ũpainia wa gũteithĩrĩria makahunjia mathaa 30 kana 50 mweri-inĩ wa Machi kana Ĩpuro. Hihi no wende kuongerera ũtungata waku ihinda rĩrĩ twerekeire rĩa Kĩririkano? Nĩ kĩĩ kĩngĩgũteithia ũhote gwĩka ũguo?

Kaingĩ, no tũhote kũhingia maũndũ maingĩ tũngĩkorũo tũbangĩte ũndũ kabere. (Thi 21:5) Tondũ ihinda rĩa Kĩririkano nĩ rĩkuhĩrĩirie, nĩ wega kwambĩrĩria kũbanga maũndũ o rĩu. Wĩcirie ũrĩa ũngĩenda kuongerera ũtungata waku ihinda-inĩ rĩa Kĩririkano, na ũrĩa ũrabatara gwĩka nĩguo ũkinyĩre mĩoroto ĩyo yaku. Ũcoke ũhoe Jehova arathime mĩbango yaku.—1Joh 5:14, 15.

Nĩ na njĩra ta irĩkũ ũngĩongerera ũtungata waku ihinda-inĩ rĩa Kĩririkano?