Jehova endaga famĩlĩ ikorũo na gĩkeno. (Thb 127:3-5; Koh 9:9; 11:9) O na kũrĩ ũguo, no twage gĩkeno nĩ ũndũ wa mĩtangĩko ĩrĩa tũcemanagia nayo na mahĩtia ma andũ a famĩlĩ. O mũndũ thĩinĩ wa famĩlĩ angĩka atĩa nĩguo ĩkorũo na gĩkeno?

Mũthuri nĩ agĩrĩirũo gũtĩa mũtumia wake. (1Pe 3:7) Nĩ abatiĩ kũhũthagĩra mahinda hamwe nake. Ndagĩrĩirũo kwĩrĩgĩrĩra eke maũndũ atangĩhota, na nĩ abatiĩ kuonanagia ngatho nĩ ũndũ wa maũndũ marĩa amwĩkagĩra na agekĩra famĩlĩ yao. (Kol 3:15) Nĩ agĩrĩirũo kũmuonia atĩ nĩ amwendete na akamũgaathĩrĩria.​—Thi 31:28, 31.

Mũtumia nĩ agĩrĩirũo gwethaga njĩra cia kũnyita mũthuri wake mbaru. (Thi 31:12) Nĩ agĩrĩirũo kũmwĩnyihagĩria na kũnyitanagĩra nake. (Kol 3:18) Nĩ abatiĩ kũmwaragĩria na gĩtĩo na akaragia maũndũ mega mamwĩgiĩ.​—Thi 31:26.

Aciari nĩ mabatiĩ gũkoragwo na mahinda hamwe na ciana ciao. (Gũc 6:6, 7) Nĩ magĩrĩirũo kwĩraga ciana ciao atĩ nĩ maciendete. (Mat 3:17) Rĩrĩa maracirũnga, nĩ magĩrĩirũo gũkorũo na ũtaũku na macionie wendo.​—Ef 6:4.

Ciana nĩ ciagĩrĩirũo gũtĩa na gwathĩkĩra aciari a cio. (Thi 23:22) Nĩ ciagĩrĩirũo kwĩra aciari ũrĩa ireciria na ũrĩa iraigua ngoro-inĩ. Nĩ ibatiĩ gwĩtĩkĩra kũrũngwo nĩ aciari na kũmonia gĩtĩo.​—Thi 19:20.

WĨRORERE VIDEO YA TŨŨRIA GĨKENO THĨINĨ WA FAMĨLĨ, ŨCOKE ŨCOKIE KĨŨRIA GĨKĨ:

• O mũndũ eekire atĩa nĩguo famĩlĩ ĩkorũo na gĩkeno?