Watho wa Musa wonanĩtie atĩ mũndũ angĩeciririe gũtigana na mũtumia wake, aagĩrĩirũo gwetha marũa ma kĩwatho ma gũtigana. Ũndũ ũcio nĩ wagiragĩrĩria andũ gũtigana o na ihenya hatarĩ gĩtũmi kĩega. O na kũrĩ ũguo, matukũ-inĩ ma Jesu, atongoria a ndini nĩ maaheaga andũ marũa ma gũtigana na njĩra hũthũ. Athuri nĩ maatiganaga na atumia ao nĩ ũndũ wa itũmi itarĩ na mũthingi mwega. (Maũndũ ma kwĩruta thĩinĩ wa nwtsty megiĩ Mar 10:4, 11) Jesu nĩ onanirie atĩ Jehova nĩwe wambĩrĩirie kĩhiko na agĩgĩtĩkĩria. (Mar 10:2-12) Mũthuri na mũtumia magĩrĩirũo matuĩke “mwĩrĩ ũmwe” na matikanatigane. Gĩtũmi gĩa kĩĩmandĩko kĩrĩa kĩheanĩtwo tu kĩgiĩ ndigano, ta ũrĩa kĩgwetetwo nĩ Mathayo no “ngomanio itagĩrĩire.”—Mat 19:9.

Matukũ-inĩ maya andũ monaga kĩhiko ta Afarisai no ti ta Jesu. Rĩrĩa mathĩna moimĩra, andũ thĩinĩ wa thĩ mahiũhaga gũtigana. Akristiano arĩa marĩ kĩhiko-inĩ nĩ moyaga mĩĩhĩtwa yao na ũritũ, na nĩ merutanagĩria kũhiũrania na mathĩna mao na njĩra ya kũhũthĩra ũtaaro wa Bibilia. Cokia ciũria ici thutha wa kwĩrorera video ya: Wendo na Gĩtĩo Irehaga Ũrũmwe Thĩinĩ wa Famĩlĩ.

• Ũngĩhũthĩra rĩandĩko rĩa Thimo 15:1 atĩa thĩinĩ wa kĩhiko gĩaku, na ũndũ ũcio nĩ wa bata nĩkĩ?

• Ũngĩĩthema mathĩna atĩa ũkĩhũthĩra rĩandĩko rĩa Thimo 19:11?

• Angĩkorũo kĩhiko gĩaku kĩrĩ hakuhĩ kũharagana-rĩ, wagĩrĩire kwĩyũria ciũria irĩkũ handũ ha gwĩciria ũrĩa mũngĩtigana?

• Nĩ na njĩra ĩrĩkũ ũngĩtuĩka mũthuri kana mũtumia mwega nĩ ũndũ wa kũhũthĩra rĩandĩko rĩa Mathayo 7:12?