Mũrata nĩ “mũndũ ũrĩa ũnyitanaga na mũndũ nĩ ũndũ wa gũkorũo amwendete kana amũheete gĩtĩo.” Kwa ngerekano, Jonathani na Daudi maagĩire na ũrata mũrũmu thutha wa Daudi kũũraga Goliathu. (1Sa 18:1) O mũndũ aarĩ na ngumo ciatũmaga ũcio ũngĩ amwende. Kwoguo nĩguo andũ makorũo na ũrata mũrũmu, no mũhaka makorũo moyaine wega. Kũmenya mũndũ nĩ kũbataraga ihinda na kĩyo. No Intaneti-inĩ, andũ no matuĩke “arata” na ihenya mũno. Tondũ Intaneti-inĩ andũ no mahote kũbanga ũrĩa mekuuga kana ũrĩa andũ arĩa angĩ megwĩciria ũhoro wao, nĩ ũndũ mũhũthũ harĩ o kũhitha ũrĩa mahaana. Kwoguo nĩ ũndũ wa bata gwĩciria nĩa ũgwĩtĩkĩra matuĩke arata aku. Mũndũ ũtoĩ wega angĩkũũria mũtuĩke arata, ndũkanetigĩre kũrega nĩ ũndũ wa gwĩtigĩra kũmũrakaria. Nĩ ũndũ wa gwĩthema mogwati marĩa mangiumĩra, andũ amwe nĩ mathuurĩte kwaga kũhũthĩra nenda cia ũkinyanĩria. No ũngĩthuura gũcihũthĩra-rĩ, nĩ maũndũ marĩkũ wagĩrĩirũo kũririkana?

WĨRORERE VIDEO YA HŨTHĨRA INTANETI NA ŨŨGĨ ŨCOKE ŨCOKIE CIŨRIA ICI:

• Nĩ maũndũ marĩkũ wagĩrĩirũo gwĩciria ũhoro wamo ũtanandĩka maũndũ kana gwĩkĩra mbica thĩinĩ wa social media?

• Nĩkĩ nĩ wagĩrĩirũo gũthuura arata aku na ũũgĩ thĩinĩ wa social media?

• Nĩkĩ nĩ wagĩrĩirũo kwĩigĩra gĩthimi harĩ mahinda marĩa ũhũthagĩra thĩinĩ wa social media?—Ef 5:15, 16