Icanjama cia ndũire irathiĩ cingĩhĩte mũno ũmũthĩ. Rĩrĩa gĩcanjama kĩaumĩra, wĩra wa kũheana ũteithio nĩ ũbataraga kũbangwo na gũtabanio wega. Nĩ ũndũ wa ũguo, Kĩama Kĩrĩa Gĩtongoragia nĩ kĩbangĩte gũkorũo na Rũhonge rwa Gũteithia Hĩndĩ ya Icanjama wabici-inĩ ciothe cia honge.

Ariũ a Ithe witũ arĩa marĩ rũhonge-inĩ rũu mamenya kũndũ kwĩ na gĩcanjama, maranagĩria na athuri a kũu o rĩo nĩguo mamenye kĩrĩa ahunjia marabatara. Gĩcanjama kĩngĩkorũo gĩthũkangĩtie mũno ũndũ ahunjia matangĩhota gũthondeka maũndũ o ene, wabici ya rũhonge ĩthuuraga ariũ a Ithe witũ arĩa magĩrĩire matongorie wĩra wa kũheana ũteithio. Ariũ a Ithe witũ acio no meere andũ merutĩre, kana maheane indo iria irabatarania, kana o ene magũre indo iria irabatarania na maciheane.

Kũrĩ na ũguni mũnene wa gwĩka maũndũ na njĩra ĩyo. Ũndũ ũcio nĩ ũgiragĩrĩria andũ kũruta wĩra mũingĩ ũtarĩ wa o mũhaka, gũtukanĩrũo, na kũhũthĩra mbeca na indo nyingĩ, maũndũ marĩa mekĩkaga andũ mangĩĩkĩra maũndũ o ene.

Ariũ a Ithe witũ acio mathuurĩtwo nĩ wabici ya rũhonge no matue nĩ mbeca cigana irabatarania na nĩ erutĩri aigana marabatarania wĩra-inĩ ũcio wa kũheana ũteithio. Ningĩ no maranĩrie na anene a thirikari, arĩa mangĩtũteithia kũruta wĩra wa kũheana ũteithio na ihenya. Kwoguo andũ kĩũmbe matiagĩrĩirũo kũngania mbeca, gũtũma ũteithio, o na kana gũthiĩ kũrĩa kũrĩ na gĩcanjama, o tiga moririo meke ũguo.

O na kũrĩ ũguo, rĩrĩa gĩcanjama kĩaumĩra, nĩ twendaga gũteithia. (Ahi 13:16) Nĩ twendete ariũ a Ithe witũ! Kwoguo tũngĩka atĩa? Ũndũ ũmwe wa bata mũno nĩ kũhoera arĩa mahutĩtio nĩ gĩcanjama na arĩa maraheana ũteithio. Ningĩ no tũrute mĩhothi ya gũteithia wĩra wa thĩ yothe. Kũgerera ũtongoria wa Kĩama Kĩrĩa Gĩtongoragia, wabici cia honge nĩcio imenyaga harĩa mĩhothi ĩyo ĩkũhũthĩrũo wega makĩria. Ũngĩenda gũteithĩrĩria wee mwene, no wonanie atĩ no woneke na njĩra ya kũiyũria fomu ya Ombi la Kujitolea Katika Kazi ya Usanifu na Ujenzi (DC-50).

WĨRORERE VIDEO YA MŨIYŨRO MŨNENE BŨRŨRI-INĨ WA BRAZIL, ŨCOKE ŨCOKIE KĨŨRIA GĨKĨ:

Nĩ ũndũ ũrĩkũ wagũkenia wĩgiĩ wĩra wa Aira a Jehova wa kũheana ũteithio thutha wa mũiyũro bũrũri-inĩ wa Brazil mwaka wa 2020?