O na gũtuĩka Akristiano matikoragwo rungu rwa Watho wa Musa, maathani merĩ marĩa manene mũno thĩinĩ wa Watho ũcio no monanagia ũrĩa Jehova endaga twĩke. Maathani macio nĩmo kwenda Ngai na kwenda andũ arĩa angĩ. (Mat 22:37-39) Wendo ta ũcio ndwĩrehaga guo mwene. No mũhaka ũrutĩrũo wĩra. Na njĩra ĩrĩkũ? Njĩra ĩmwe ya bata nĩ gũthomaga Bibilia o mũthenya. Rĩrĩa twathuthuria maũndũ matiganĩte megiĩ ngumo cia Ngai ta ũrĩa monanĩtio Maandĩko-inĩ, nĩ twĩyonagĩra “wega wa Jehova.” (Thab 27:4) Gwĩka ũguo gũtũmaga wendo witũ harĩ Ngai wongerereke na tũgathiĩ na mbere kuona maũndũ ta ũrĩa we amonaga. Ũndũ ũcio ũtũtindĩkaga gwathĩkagĩra maathani ma Ngai, marĩa nĩ hamwe na rĩathani rĩa kuonania wendo wa kwĩima kwerekera andũ arĩa angĩ. (Joh 13:34, 35; 1Joh 5:3) Maũndũ maya matatũ no magũteithie ũkenagĩre gũthoma Bibilia:

• Hũthagĩra ũhoti waku wa kũhũũra mbica. Ũgĩthoma wĩĩkĩre thĩinĩ wa ũndũ ũcio. Nĩ kĩĩ ũngĩonire, nĩ kĩĩ ũngĩaiguire, na nĩ mĩnungo ĩhaana atĩa ũngĩaiguire? Arĩa ũrathoma ũhoro wao mangĩkorũo maaiguaga atĩa?

• Hũthĩra njĩra itiganĩte. Maũndũ maya no magũteithie: Thoma wanĩrĩire, kana ũtwarane na ũthomi wa Bibilia ũrekondetwo. Handũ ha gũthoma mĩrango ya Bibilia ta ũrĩa ĩrũmanĩrĩire, no ũthome ũhoro wa mũndũ kana ũndũ mũna ũrĩ thĩinĩ wa Bibilia. Kwa ngerekano, ũgĩthoma ũhoro wĩgiĩ Jesu, no ũhũthĩre Gĩcunjĩ gĩa 4 kana gĩa 16 thĩinĩ wa kabuku karĩa getagwo Ũteithio wa Kũmenya Kiugo kĩa Ngai. Thoma mũrango wothe wa harĩa rĩandĩko rĩa o mũthenya rĩrutĩtwo. Ningĩ no ũthome mabuku ma Bibilia marũmanĩrĩire kũringana na rĩrĩa maandĩkirũo.

• Thoma ũrĩ na muoroto wa gũtaũkĩrũo. Nĩ kaba ũthome mũrango ũmwe o mũthenya na ũtaũkĩrũo, ũcoke wĩcũranie, gũkĩra ũthome mĩrango mĩingĩ no getha tu ũthome gĩcunjĩ kĩnene. Wĩcirie ũhoro wa kũndũ kũrĩa ũndũ ũcio ũrathoma wahanĩkagĩra. Thuthuria nginya tũmaũndũ tũrĩa tũnini. Hũthĩra mabu na mĩhari ya kũringithania ĩrĩa ĩkoragwo Bibilia-inĩ. Ĩka ũthuthuria wĩgiĩ ũndũ ũrĩa ũtanataũkĩrũo. Hũthĩra ihinda gwĩcũrania, kũngĩhoteka, o ta rĩrĩa ũngĩhũthĩra ũgĩthoma.