Kũhũthĩra indo ironwo na maitho ũkĩrutana nĩ gũteithagia mũrutwo kũiga meciria harĩ kĩrĩa arona na gũkamũteithia gũtaũkĩrũo na kũririkana kĩrĩa eruta. Jehova, Mũrutani Witũ Ũrĩa Mũnene, nĩ aahũthĩrire indo ta icio kũrutana maũndũ ma bata. (Kĩa 15:5; Je 18:1-6) O na Jesu, Mũrutani Ũrĩa Mũnene, nĩ aahũthĩrire indo ironwo na maitho. (Mat 18:2-6; 22:19-21) Kuonania video nĩ njĩra ĩmwe ya kũhũthĩra indo ironeka na maitho ĩkoretwo na moimĩrĩro mega mĩaka ya ica ikuhĩ. Hihi nĩ ũhũthagĩra video rĩrĩa ũreruta na arutwo aku a Bibilia?

Kũrĩ na video ikũmi ihaarĩirio cia gũtũteithia kũrutana mathomo ma broshua ya Ũhoro Mwega Kuuma Kũrĩ Ngai! O video ĩringaine na kĩũria kĩmwe kĩa iria ciandĩkĩtwo na rangi mũmata thĩinĩ wa broshua ĩyo. Broshua ĩrĩa ĩrĩ thĩinĩ wa jw.org nĩ yonanagia nĩ rĩ tũngĩonania video. Makĩria ma ũguo, kwĩna video ingĩ ciarĩrĩirie ũhoro ũrĩa ũrĩ mabuku-inĩ marĩa marĩ thĩinĩ wa Gathandũkũ Gaitũ ka Indo cia Kũrutana.

Hihi nĩ harĩ ũhoro mũraarĩrĩria kuuma Bibilia-inĩ na nĩ mũritũ harĩ mũrutwo waku gũtaũkĩrũo? Kana hihi mũrutwo waku nĩ arahiũrania na igerio rĩna? No wethe video ĩmwe kuuma jw.org kana JW Broadcasting ĩrĩa ĩngĩmũteithia. Kũngĩhoteka no mwĩrorere video ĩmwe nake na mũcoke mũmĩarĩrĩrie.

O mweri nĩ kũrutagwo video njerũ. Ũgĩciĩrorera, wĩcirie ũrĩa ũngĩcihũthĩra ũkĩruta andũ arĩa angĩ.