O ta mĩcemanio yothe ya kĩũngano, mĩcemanio ya ũtungata ĩbangĩtwo nĩ Jehova nĩguo ĩtũteithie gwĩkĩrana hinya ũhoro-inĩ wĩgiĩ wendo na ciĩko njega. (Ahi 10:24, 25) Yagĩrĩire gũkorũo ĩrĩ ya ndagĩka ithano nginya mũgwanja, na ũguo nĩ kuuga nginya kũbanga andũ, kũgaya gĩcigo, na kũhoithia. (Angĩkorũo mũcemanio wa ũtungata ũgwĩkwo thutha wa mũcemanio ũngĩ, ũbatiĩ gũkorũo ũrĩ mũkuhĩ o na makĩria.) Ũrĩa ũratongoria agĩrĩire kũhaarĩria ũndũ ũgũteithia arĩa megũkorũo ũtungata-inĩ mũthenya ũcio. Kwa ngerekano, angĩkorũo andũ aingĩ arĩa megũkorũo mũcemanio-inĩ ũcio mũthenya wa Njuuma merĩgĩte kũhunjia wikendi hĩtũku, no ũkorũo ũrĩ ũndũ mwega kwarĩrĩria ũrĩa mũndũ angiuga akĩhunjia. Nĩ maũndũ ta marĩkũ mangĩ mangĩarĩrĩrio?

• Gacunjĩ ga gũteereta na mũndũ ũtungata-inĩ kuuma Kabuku ka Mũcemanio wa Ũtũũro na Ũtungata

• Ũrĩa tũngĩambĩrĩria ndeereti tũkĩhũthĩra ũndũ wa ica ikuhĩ wĩkĩkĩte kana ũndũ ũrĩ mohoro-inĩ

• Ũrĩa tũngĩhiũrania na mũhĩnga ũrehagwo kaingĩ

• Ũrĩa tũngiuga tũngĩcemania na mũndũ wĩtĩkĩtie gũtirĩ Ngai, mũndũ wĩtĩkĩtie indo nĩ kwĩyumĩria cieyumĩririe, mũndũ waragia rũthiomi rũngĩ, kana mũndũ wa ndini ĩtoĩkaine mũno gĩcigo-inĩ kĩanyu

• Ũrĩa tũngĩhũthĩra ũndũ mũna thĩinĩ wa website ya jw.org, JW Library^®, kana Bibilia-inĩ

• Ũrĩa tũngĩhũthĩra kĩndũ kĩmwe kuuma Gathandũkũ Gaitũ ka Indo cia Kũrutana

• Ũrĩa tũngĩka mũthemba-inĩ mũna wa ũtungata, ta kũhunjia na thimũ, kwandĩka marũa, kũhunjia kũndũ kwa mũingĩ, gũcokera andũ, kana kũruta andũ Bibilia

• Iririkania ciĩgiĩ kwĩmenyerera ũgwati, kũgarũrũka kũringana na maũndũ ma ũrĩa tũrahunjĩria, mĩtugo mĩega, gũkorũo na muonere mwega, kana ũndũ ta ũcio

• Ithomo rĩmwe kana video kuuma broshua-inĩ ya Wĩrutanĩrie Gũthoma na Kũrutana

• Ũrĩa tũngĩteithia na twĩkĩre ngoro ũrĩa tũrahunjia nake

• Rĩandĩko rĩhutanĩtie na ũtungata kana ũndũ mwega wonetwo wĩgiĩ kũhunjia