Ica ikuhĩ wetereri wa Jehova harĩ thĩ ĩno nĩ ũgũkinya mũthia. Ndini cia maheeni nĩ ikũniinwo, ngwatanĩro ya mabũrũri yũkĩrĩre andũ a Ngai, na Jehova aniine andũ arĩa aganu hĩndĩ ya Hari–Magedoni. Akristiano nĩ metagĩrĩra kuona maũndũ macio ma bata magĩkĩka.

Nĩ ma, tũtiũĩ maũndũ mothe megiĩ thĩna ũrĩa mũnene. Kwa ngerekano, tũtiũĩ rĩrĩa ũkaambĩrĩria. Tũtiũĩ nĩ itũmi irĩkũ thirikari ikaaheana cia gũtharĩkĩra ndini. Tũtiũĩ andũ a Ngai magaatharĩkĩrũo ihinda rĩigana atĩa nĩ thirikari, na maũndũ marĩa mageekwo. Ningĩ tũtiũĩ njĩra ĩrĩa Jehova akaahũthĩra nĩguo aniine andũ aganu hĩndĩ ya Hari–Magedoni.

O na kũrĩ ũguo, Maandĩko nĩ matũheaga ũhoro wothe ũrĩa tũrabatara nĩguo tũkaahota kũng’ethanĩra na ihinda rĩũkĩte tũrĩ na ũmĩrĩru. Kwa ngerekano, nĩ tũĩ atĩ tũratũũra mũthia-inĩ wa “matukũ ma kũrigĩrĩria.” (2Ti 3:1) Nĩ tũĩ atĩ tharĩkĩro ya ndini nĩ ĩkaanyihio nĩguo ndini ya ma ndĩkananiinwo. (Mat 24:22) Nĩ tũĩ Jehova nĩ akaahonokia andũ ake. (2Pe 2:9) Ningĩ nĩ tũĩ atĩ Ũrĩa Jehova athuurĩte nĩguo akaaniina andũ arĩa aganu na ateithie kĩrĩndĩ kĩnene gũkaahonoka Hari–Magedoni nĩ mũthingu na arĩ hinya.—Kũg 19:11, 15, 16.

Maũndũ marĩa mageekĩka ihinda rĩũkĩte nĩ magaatũma andũ ‘maringĩke nĩ ũndũ wa guoya.’ No tũngĩthoma na twĩcũranie ũrĩa Jehova anahonokia andũ mahinda mahĩtũku, na maũndũ marĩa aguũrĩtie megiĩ ihinda rĩũkĩte, nĩ tũkaahota ‘kũrũgama twĩhandĩte na tũtiire mĩtwe’ itũ twĩ na ũmĩrĩru nĩ kũmenya atĩ ũhonokio witũ nĩ ũkuhĩrĩirie.—Lu 21:26, 28.