Ta wĩcirie ũndũ ũyũ: Alex nĩ mũtukanĩre. Atũũrĩte etĩkĩtie atĩ nĩ kũrĩ Ngai na indo nĩ kũũmbwo ciombirũo. No ũmũthĩ mwarimũ wao wa biology amarutire atĩ kũrĩ na ũira wa kwĩhokeka wa sayansi ũronania atĩ indo nĩ kwĩyumĩria cieyumĩririe. Alex ndangĩenda kuoneka ta arĩ mũkĩgu. Akeĩra ũũ: ‘Angĩkorũo athomi a sayansi marĩ na ũira wa kuonania atĩ indo nĩ kwĩyumĩria cieyumĩririe-rĩ, niĩ ndĩ ũ ndĩmakararie?’

Korũo nĩwe Alex-rĩ, no wĩtĩkanie na ũrutani ũcio atĩ tondũ mabuku nĩ maronania kũrĩ na ũira wa ũndũ ũcio?

Andũ aingĩ arĩa metĩkĩtie ũhoro wa ũũmbi na arĩa metĩkĩtie indo nĩ kwĩyumĩria cieyumĩririe, no ũkorũo ũrĩ ũndũ mũhũthũ harĩ o kuuga ũrĩa metĩkĩtie no kaingĩ matimenyaga gĩtũmi gĩa gwĩtĩkia ũguo.

• Andũ amwe metĩkĩtie ũhoro wa ũũmbi tondũ tu atĩ nĩguo marutĩtwo ndini-inĩ iria mathiaga.

• Andũ amwe metĩkĩtie atĩ indo nĩ kwĩyumĩria cieyumĩririe tondũ tu atĩ nĩguo maarutirũo cukuru.

Bibilia yugaga ũũ: “Nyũmba o yothe nĩ ĩrĩ ũrĩa wamĩakire, no ũrĩa wombire indo ciothe nĩ Ngai.” (Ahibirania 3:4) Hihi nĩ ũndũ wa ũũgĩ gwĩtĩkia ũguo?

ŨRĨA ANDŨ MOIGAGA: Indo ciothe iria irĩ igũrũ na thĩ cioimĩririo nĩ mũtuthũko mũnene mũno.

ŨRĨA ANDŨ MOIGAGA: Andũ moimanire na nũgũ.

ŨRĨA ANDŨ MOIGAGA: Nĩ kũrĩ ũira wa kuonania atĩ indo nĩcio cieyumĩririe.

“Ũngĩkorũo ũgĩthiĩ gĩthaka-inĩ ũkore nyũmba thaka yakĩtwo handũ, hihi no wĩcirie ũũ: ‘Ũyũ nĩ ũndũ wa magegania mũno, mĩtĩ yebangire wega ĩgĩthondeka nyũmba ĩno.’ Ndũngĩkorũo ũrĩ ũndũ wa ũũgĩ gwĩciria ũguo. Kwoguo, tũrĩ na gĩtũmi kĩrĩkũ gĩa gwĩtĩkia atĩ indo ciothe nĩ kwĩyumĩria cieyumĩririe?”—Julia.

“Ta hũũra mbica mũndũ akwĩrĩte atĩ nĩ kũgĩire na mũtuthũko kĩganda-inĩ gĩa gũcaba mabuku na rangi waminjũkĩra thingo wandĩka dictionary. Hihi no wĩtĩkie ũndũ ũcio?”—Eunice.

Bibilia ĩgwĩkagĩra ngoro ũhũthagĩre ‘ũhoti waku wa gwĩciria.’ (Aroma 12:1) Ũguo nĩ kuuga atĩ ndũbatiĩ gũkorũo wĩtĩkĩtie nĩ kũrĩ Ngai nĩ ũndũ wa

• ŨRĨA ŨIGUAGA NGORO-INĨ (Nyonaga no nginya gũkorũo nĩ kũrĩ Ngai)

• ŨRĨA ANDŨ ANGĨ METĨKĨTIE (Njikaraga kũndũ andũ makoragwo marĩ a ndini)

• GŨTINDĨKĨRĨRIO (Aciari akwa maandutire atĩ nĩ kũrĩ Ngai na noguo ndetĩkirie)

Handũ ha ũguo, wagĩrĩirũo gũkorũo na itũmi njega ciĩgiĩ ũrĩa wĩtĩkĩtie.

“Hĩndĩ ĩrĩa mwarimũ arathomithania ũrĩa mĩĩrĩ itũ ĩrutaga wĩra, ndikoragwo na nganja atĩ Ngai arĩ kuo. O kĩĩga kĩrĩ wĩra ũrĩa kĩrutaga na maita maingĩ o na tũtimenyaga ikĩruta wĩra. Ũũma nĩ atĩ mwĩrĩ wa mũndũ nĩ wa magegania.”—Teresa.

“Rĩrĩa ndona nyũmba ndaihu na igũrũ, meri kana ngaari, ndĩyũragia ũũ: ‘Nũ wacithondekire?’ Kwa ngerekano, nĩ andũ ogĩ mathondekaga ngaari tondũ ĩkoragwo na tũindo tũingĩ tũnini tũrĩa no mũhaka tũrute wĩra ũrĩa kwagĩrĩire nĩguo ngaari ĩhote gũthiĩ. Angĩkorũo no mũhaka ngaari ĩthondekwo nĩ mũndũ-rĩ, o na ithuĩ no mũhaka akorũo harĩ ũrĩa watũthondekire.”—Richard.

“O ũrĩa ndathiaga na mbere kwĩruta sayansi noguo ndonaga ũrutani wa indo kwĩyumĩria ũtarĩ wa ma. . . . Nĩ ũndũ mũritũ harĩ niĩ gwĩtĩkia atĩ indo nĩcio cieyumĩririe, gũkĩra gwĩtĩkia nĩ kũũmbwo ciombirũo.”—Anthony.

O na thutha wa athomi a sayansi gwĩka ũtuĩria mĩaka mĩingĩ, matitaaragĩria na njĩra ĩhaanaine ũhoro wĩgiĩ indo kwĩyumĩria. Angĩkorũo athomi acio matiguithanagĩria ũndũ-inĩ ũcio na nĩo ataaramu-rĩ, hihi nĩ ũndũ wa ũũgĩ gwĩtĩkania na ũrutani ũcio?