1. Obithaa wa mũthamaki Mũethiopia oigire abatithio nĩkĩ?

“ONE, maĩ to wa maya! Nĩ kĩ gĩgũkĩgiria mbatithio?” Kĩũria kĩu kĩoririo nĩ obithaa wa mũthamaki Mũethiopia hĩndĩ ya arutwo a Jesu. Mũkristiano wetagwo Filipu nĩ aamuonetie atĩ Jesu nĩwe Mesia ũrĩa weranĩirũo. Nĩ ũndũ wa kũhutio ngoro nĩ ũrĩa eerutire thĩinĩ wa  Maandĩko-rĩ, Mũethiopia ũcio akĩoya ikinya. Akĩonania atĩ nĩ arenda kũbatithio!—Atũmwo 8:26-36.

2. Wagĩrĩirũo gwĩciria na ũritũ igũrũ rĩgiĩ ũbatithio nĩkĩ?

² Akorũo nĩwĩrutĩte na kinyi icunjĩ icio ingĩ cia ibuku rĩrĩ hamwe na ũmwe wa Aira a Jehova-rĩ, wahota kuona wagĩrĩire kũũria kĩũria gĩkĩ, ‘Nĩ kĩ gĩgũkĩgiria niĩ mbatithio?’ Gũkinyia rĩu nĩwĩrutĩte ũhoro wĩgiĩ kĩĩrĩgĩrĩro kĩa Bibilia kĩa muoyo wa tene na tene thĩinĩ wa Paradiso. (Luka 23:43; Kũguũrĩrio 21:3, 4) Ningĩ nĩwĩrutĩte ũrĩa akuũ kũna matariĩ na ũhoro wa kĩĩrĩgĩrĩro gĩa kũriũkio. (Kohelethu 9:5; Johana 5:28, 29) No gũkorũo hihi nĩũkoretwo ũkĩgwatanĩra na Aira a Jehova mĩcemanio-inĩ yao, na nĩ wĩyoneire ũrĩa memenyeragia ndini ĩrĩa ya ma. (Johana 13:35) Ũndũ wa bata makĩria-rĩ, nĩ gũkorũo hihi nĩ wambĩrĩirie kũgĩa na ũkuruhanu na Jehova Ngai.

3. (a) Nĩ watho ũrĩkũ Jesu aaheire arũmĩrĩri ake? (b) Ũbatithio wa maĩ wĩkagwo atĩa?

³ Ũngĩonania nĩũrenda gũtungatĩra Ngai atĩa? Jesu eerire arũmĩrĩri ake ũũ: “Thiĩi mũgatũme andũ a ndũrĩrĩ ciothe matuĩke arutwo akwa, mũkĩmabatithagia.” (Mathayo 28:19) Jesu we mwene nĩ aigire kĩonereria rĩrĩa aabatithirio maĩ-inĩ. Ndaminjĩirio maĩ, na ndaitĩrĩirio o tũmaĩ tũnini tu mũtwe. (Mathayo 3:16) Kiugo “batithia” kiumanĩte na kiugo gĩa Kĩgiriki kiugĩte “kũrikia.” Kwoguo Akristiano magĩrĩirũo kũrikio biũ maĩ-inĩ, kana kũrindwo rĩrĩa marabatithio.

4. Kũbatithio na maĩ kuonanagia ũndũ ũrĩkũ?

⁴ Arĩa othe mendaga kũgĩa na ũkuruhanu na Jehova Ngai no mũhaka mabatithio na maĩ. Kũbatithio kuonanagia harĩ andũ othe wendi waku wa gũtungatĩra Ngai. Kuonanagia atĩ nĩũkenagio nĩ gwĩka wendi wa Jehova. (Thaburi 40:7, 8) No nĩgetha wagĩrĩre kũbatithio-rĩ, he makinya wagĩrĩirũo nĩ kuoya.

5. (a) Ikinya rĩa mbere nĩguo mũndũ agĩrĩre kũbatithio nĩ rĩrĩkũ? (b) Mĩcemanio ya Gĩkristiano nĩ ya bata nĩkĩ?

⁵ Nĩwambĩrĩirie kuoya ikinya rĩa mbere. Na njĩra ĩrĩkũ? Na njĩra ya gũthiĩ na mbere kũmenya Jehova Ngai na Jesu Kristo, hihi ũkĩrũmĩrĩra mũtaratara wa kwĩruta Bibilia. (Johana 17:3) No harĩ maũndũ mangĩ maingĩ ũtigairie kũmenya. Akristiano mabataraga maiyũrũo nĩ “ũmenyi wa kũmenyaga ũrĩa [Ngai] endaga.” (Akolosai 1:9) Gũthiĩ mĩcemanio ya Aira a Jehova nĩ gũgũgũteithĩrĩria mũno wĩke ũguo. Nĩ ũndũ wa bata gũthiĩ mĩcemanio ta ĩo. (Ahibirania 10:24, 25) Gũthiĩ mĩcemanio ũtegũtĩrĩria nĩ gũgũgũteithia ũmenye Ngai makĩria.

6. Wagĩrĩirũo nĩ gũkorũo na ũmenyo ũigana atĩa wa Bibilia ũtanabatithio?

⁶ No ti kuuga atĩ no nginya ũmenye maũndũ mothe me thĩinĩ wa Bibilia nĩguo wagĩrĩre kũbatithio. Obithaa ũrĩa Mũethiopia nĩ aamenyaga maũndũ mamwe, no nĩ aabataraga ũteithio nĩgetha ataũkĩrũo nĩ icunjĩ imwe cia Maandĩko. (Atũmwo 8:30, 31) O nawe-rĩ, wĩ na maũndũ maingĩ ũtigairie kwĩruta. Ũhoro wa ma nĩ atĩ gũtirĩ hĩndĩ ũgaatiga kwĩruta ũhoro wa Ngai. (Kohelethu 3:11) No ũtanabatithio-rĩ, nĩ ũbataire ũmenye na wĩtĩkĩre ũrutani wa mũthingi wa Bibilia. (Ahibirania 5:12) Morutani ta macio nĩ hamwe na kũmenya ma ĩgiĩ ũrĩa akuũ matariĩ na bata wa rĩĩtwa rĩa Ngai na Ũthamaki wake.

7. Kwĩruta Bibilia kwagĩrĩirũo gũkorũo na moimĩrĩro marĩkũ harĩ wee?

⁷ No ũmenyo wiki tu ti mũiganu tondũ ‘gũtarĩ na wĩtĩkio gũtingĩkĩhoteka gũkenia Ngai.’ (Ahibirania 11:6) Bibilia ĩtwĩraga atĩ rĩrĩa andũ amwe thĩinĩ wa itũũra rĩa Korintho ya tene maiguire ũhoro ũrĩa Akristiano maahunjagia-rĩ, ‘maawĩtĩkirie na makĩbatithio.’ (Atũmwo 18:8) Na njĩra o ta ĩo-rĩ, kwĩruta Bibilia kwagĩrĩirũo gũkũhe wĩtĩkio mũiganu atĩ yo nĩ Kiugo kĩa Ngai kũna. Kwĩruta  Bibilia kwagĩrĩirũo gũgũteithia ũgĩe na wĩtĩkio harĩ ciĩranĩro cia Ngai, na hinya wa kũhonokania wa igongona rĩa Jesu.—Joshua 23:14; Atũmwo 4:12; 2 Timotheo 3:16, 17.

8. Nĩ kĩĩ gĩgũtũma ũgĩe na wendi wa kwĩra andũ arĩa angĩ maũndũ marĩa wĩrutĩte?

⁸ O ũrĩa wĩtĩkio ũrakũra ngoro-inĩ yaku-rĩ, noguo ũkuona arĩ hinya gũkira na maũndũ marĩa ũreruta. (Jeremia 20:9) Nĩ ũkũgĩa na wendi mũnene wa kwĩra andũ arĩa angĩ igũrũ rĩgiĩ Ngai na matanya make.—2 Akorintho 4:13.

9, 10. (a) Nĩ a ũngĩambĩrĩria kwĩra ma ya Bibilia? (b) Wagĩrĩirũo gwĩka atĩa ũngĩenda kũhunjia ũnyitanĩire na Aira a Jehova?

⁹ No waambĩrĩrie kwĩra arĩa angĩ ma ya Bibilia na njĩra ya kwarĩria na ũũgĩ andũ anyu, arata, andũ a itũũra, na arĩa mũrutaga wĩra nao. Thutha-inĩ, nĩ ũkũbatara kũhunjia ũnyitanĩire hamwe na Aira a Jehova. Wenda gwĩka ũguo-rĩ, ndũgetigĩre kwaria ũndũ ũcio na ũrĩa ũrakũruta Bibilia. Kũngĩtuĩka atĩ nĩ wagĩrĩire kũhunjia hamwe na gĩkundi-rĩ, nĩ gũkũbangwo wee na mũrutani waku mũcemanie na athuri erĩ a gĩkundi.

¹⁰ Ũndũ ũcio nĩ ũgũgũteithia ũmenyane na athuri amwe a Gĩkristiano, arĩa marĩithagia rũũru rwa Ngai. (Atũmwo 20:28; 1 Petero 5:2, 3) Athuri acio mona atĩ nĩ ũtaũkĩirũo na ũgetĩkia morutani ma mũthingi ma Bibilia, na nĩ ũratũũra kũringana na watho wa Ngai, na nĩ ũrenda na ma gũtuĩka ũmwe wa Aira a Jehova-rĩ, nĩmegũkũmenyithia atĩ nĩwagĩrĩire kũheana ũhoro ũrĩa mwega ũrĩ ta mũhunjia ũtarĩ mũbatithie.

11. Nĩ maũndũ marĩkũ andũ amwe mabataire kũgarũrĩra nĩguo magĩrĩre kũhunjia hamwe na gĩkundi?

¹¹ Okorũo ti ũguo-rĩ, hihi nĩ ũkũbatara kũgarũrĩra  mũtũũrĩre na mĩtugo yaku nĩguo wagĩrĩre kũhunjia hamwe na gĩkundi. Ũkũbatara gũtiga nginya mĩtugo ĩrĩa hihi ũreekaga wĩhithĩte. Kwoguo ũtanoria kana no ũtuĩke mũhunjia ũtarĩ mũbatithie-rĩ, wagĩrĩire gũkorũo wĩthemete mehia maritũ, ta ũtharia, ũrĩu, na kũhũthĩra ndawa cia ũrĩu.—1 Akorintho 6:9, 10; Agalatia 5:19-21.

12. Kwĩrira kwendekaga nĩkĩ?

¹² Nĩ harĩ makinya mangĩ ũbataire kuoya nĩguo wagĩrĩre kũbatithio. Mũtũmwo Petero oigire ũũ: “Wĩrirei na mũgarũrũke, nĩ getha mehia manyu marihũrũo.” (Atũmwo 3:19) Kwĩrira nĩ kũigua ũherete igũrũ rĩgiĩ ũndũ mũna wĩkĩte. Mũndũ watũire arĩ mwaganu hatarĩ nganja no nginya erire, no ningĩ o na mũndũ watũire na mũtũũrĩre ũtarĩ wa waganu no abataire kwĩrira. Nĩkĩ? Tondũ andũ othe nĩ ehia na nĩmabataraga kuoherũo nĩ Ngai. (Aroma 3:23; 5:12) Ũtaneruta Bibilia-rĩ, ndwamenyaga wendi wa Ngai nĩ ũrĩkũ. Kwoguo-rĩ, ũngĩahotire atĩa gũtũũra kũringana na wendi wake? Nĩ ũndũ ũcio kwĩrira nĩ kwendekaga.

13. Kũgarũrũka nĩ gwĩka atĩa?

¹³ Kwĩrira no mũhaka kũrũmĩrĩrũo nĩ kũgarũrũka. Kũhera gwiki tu ti kũiganu. Nĩ ũbataire gũtigana na mũtũũrĩre waku wa hau kabere na ũtue atĩ kuuma rĩu ũrĩĩkaga ũrĩa kwagĩrĩire. Kwĩrira na kũgarũrũka nĩ makinya ũbataire kuoya ũtanabatithio.

14. Nĩ ikinya rĩrĩkũ rĩa bata wagĩrĩirũo kuoya ũtanabatithio?

¹⁴ Nĩ harĩ ikinya rĩngĩ wagĩrĩirũo kuoya nĩguo ũbatithio. No mũhaka wĩyamũrĩre Jehova Ngai.

15, 16. Kwĩyamũrĩra Ngai nĩ kuuga atĩa, na nĩ kĩĩ gĩtũmaga mũndũ eke ũguo?

 ¹⁵ Rĩrĩa weyamũrĩra Jehova Ngai na njĩra ya mahoya-rĩ, ũmwĩraga nĩ ũkwĩheana harĩ o we wiki tu mĩndĩ na mĩndĩ. (Gũcokerithia Maathani 6:15) No rĩrĩ, nĩkĩ kĩngĩtũma mũndũ ende kwĩheana na njĩra ta ĩo? Ta wĩcirie ũhoro wa mwanake wĩ na mũirĩtu arenda kũhikia. O ũrĩa arathiĩ na mbere kũmũmenya na kuona ũrĩa e na ngumo njega-rĩ, noguo athiaga na mbere kũmwenda makĩria. Thutha-inĩ, hatarĩ nganja nĩ arĩmwĩra atĩ nĩ arenda kũmũhikia. Nĩ ma kũhikania nĩ gũkũmuongerera wĩra. No wendo nĩguo ũgũtũma oe ikinya rĩu rĩa bata.

¹⁶ Wamenya Jehova na ũmwende-rĩ, nĩ ũgũkorũo na wendi wa kũmũtungatĩra ũtarĩ na ũndũ wĩtigĩirie, kana ũtegwĩkĩra mĩhaka ya kũmũthathaiya. Mũndũ ũrĩa wothe ũkwenda kũrũmĩrĩra Mũrũ wa Ngai, Jesu Kristo, no mũhaka ‘erege.’ (Mariko 8:34) Twĩregaga na njĩra ya gũtigĩrĩra atĩ merirĩria na matanya maitũ matiragirĩrĩria twathĩkĩre Ngai na ngoro yothe. Kwoguo ũtanabatithio-rĩ, no mũhaka gwĩka wendi wa Jehova Ngai gũkorũo nĩkuo ũndũ ũrĩa mũnene ũtũũro-inĩ waku.—1 Petero 4:2.

17. Andũ amwe metigagĩra kwĩyamũrĩra Ngai nĩkĩ?

¹⁷ Andũ amwe magaga kwĩyamũrĩra Jehova tondũ nĩ ta metigagĩra kuoya ikinya rĩu iritũ. Maahota gwĩtigĩra gũkoorio nĩ Ngai me ta Akristiano mamwĩyamũrĩire. Nĩ ũndũ wa gwĩtigĩra atĩ nĩmekũremwo na marakarie Jehova-rĩ, moonaga atĩ matiagĩrĩirũo kwĩheana harĩ we.

18. Nĩ kĩĩ kĩngĩgwĩkĩra wendi wa kwĩyamũrĩra Jehova?

¹⁸ O ũrĩa ũreruta kwenda Jehova-rĩ, noguo ũgũkorũo na wendi wa kwĩheana harĩ we na gwĩka o ũrĩa wothe ũngĩhota ũmũtungatĩre. (Kohelethu 5:4) Thutha wa  kwĩyamũrĩra Ngai, hatarĩ nganja nĩ ũrĩĩrutanagĩria gũkorũo na “mĩthiĩre ĩrĩa yagĩrĩire andũ a Mwathani, na [ũmũkenagie] maũndũ-inĩ mothe.” (Akolosai 1:10) Nĩ ũndũ wa wendo waku harĩ Ngai-rĩ, ndũngĩona arĩ ũndũ mũritũ gwĩka wendi wake. Hatarĩ nganja nĩ ũgwĩtĩkania na mũtũmwo Johana ũrĩa waandĩkire ũũ: “Kwenda Ngai nĩ atĩrĩ, nĩ tũmenyagĩrĩre maathani make; namo maathani make matirĩ thĩna.”—1 Johana 5:3.

19. Ndwagĩrĩirũo nĩ gwĩtigĩra kwĩyamũrĩra Ngai nĩkĩ?

¹⁹ To nginya ũkorũo ũrĩ mũkinyanĩru nĩguo wĩyamũrĩre Ngai. Jehova nĩoĩ ũrĩa ũngĩhota gwĩka na ũrĩa ũtangĩhota na kwoguo ndarĩ hingo erĩgagĩrĩra wĩke ũrĩa ũtangĩhota. (Thaburi 103:14) Nĩ arenda ũtoorie na nĩ  egũkuongerera hinya na agũteithie. (Isaia 41:10) No ũkorũo na ma atĩ wehoka Jehova na ngoro yaku yothe-rĩ, “njĩra ciaku nĩarĩkũrũngagĩra.”—Thimo 3:5, 6.

20. Nĩkĩ kwĩyamũrĩra Jehova no mũhaka kuumbũrũo?

²⁰ Gwĩciria ũhoro wa maũndũ macio twarĩrĩria kwahota gũgũteithia wee mwene wĩyamũrĩre Jehova kũgerera mahoya. Mũndũ wothe wendete Ngai kũna ningĩ no  mũhaka ‘oimbũre nĩguo agakĩhonoka.’ (Aroma 10:10) Ũngĩka ũguo atĩa?

21, 22. ‘Ũngiumbũra’ atĩa wĩtĩkio waku mbere ya andũ othe?

²¹ Menyithia mũthuri ũrĩa ũrũgamĩrĩire gĩkundi-inĩ kĩanyu atĩ nĩ ũrenda kũbatithio. Nĩ ekũbanga athuri mahĩtũkĩre hamwe nawe ciũria cigana ũna ciĩgiĩ morutani ma mũthingi ma Bibilia. Athuri acio mona nĩ wagĩrĩire-rĩ, nĩmegũkwĩra atĩ nĩ ũkũbatithio kĩgomano-inĩ kĩrĩa gĩkũrũmĩrĩra. * Mĩario ya kwarĩrĩria ũrĩa ũbatithio uugĩte nĩ ĩheanagwo hĩndĩ ya ciũngano ta icio. Thutha ũcio ũrĩa ũraaria akeera arĩo othe marenda kũbatithio macokie ciũria igĩrĩ hũthũ arĩ ta njĩra ĩmwe ya ‘kuumbũra na kanua’ wĩtĩkio wao mbere ya andũ othe.

²² Ũbatithio nĩguo ũmenyithagia mũingĩ atĩ wee ũrĩ mũndũ wĩyamũrĩire Ngai na atĩ rĩu ũrĩ ũmwe wa Aira a Jehova. Arĩa marabatithio marikagio biũ maĩ-inĩ kuonania mbere ya andũ othe atĩ nĩ meyamũrĩire Jehova.

23. Kũbatithio ‘thĩinĩ wa rĩĩtwa rĩa Ithe witũ, na rĩa Mũriũ, na rĩa roho mũtheru’ kuugĩte atĩa?

²³ Jesu oigire atĩ arutwo ake marĩbatithagio ‘thĩinĩ wa rĩĩtwa rĩa Ithe witũ, na rĩa Mũriũ, na rĩa roho mũtheru.’ (Mathayo 28:19) Ũguo nĩ kuuga atĩ ũrĩa ũrabatithio nĩ etĩkĩrĩte ũnene wa Jehova Ngai na wa Jesu Kristo. (Thaburi 83:18; Mathayo 28:18) Ningĩ nĩ akũũranĩte wĩra wa roho mũtheru wa Ngai, kana hinya wake wa wĩki.—Agalatia 5:22, 23; 2 Petero 1:21.

24, 25. (a) Ũbatithio wonanagia ũndũ ũrĩkũ? (b) Nĩ kĩũria kĩrĩkũ kĩrabatara gũcokio?

²⁴ Ũbatithio to kũrikio maĩ-inĩ tu. Kuonanagia ũndũ  wa bata mũno. Kũrindwo maĩ-inĩ thĩinĩ kuonanagia nĩ wakua ũhoro-inĩ wĩgiĩ mũtũũrĩre waku wa hau kabere. Kũiyũkio kuuma maĩ-inĩ kuonanagia rĩu wĩ na mũtũũrĩre ũngĩ mwerũ nĩguo wĩke wendi wa Ngai. Ningĩ ririkana atĩ wĩyamũrĩire Jehova Ngai we mwene, ti wĩra mũna, andũ angĩ, kana ithondeka. Kwĩyamũrĩra Jehova na kũbatithio gwaku nĩ kĩambĩrĩria kĩa ũrata wa hakuhĩ mũno na Ngai, kana ũkuruhanu mũrũmu nake.—Thaburi 25:14.

²⁵ Gũkorũo mũndũ abatithĩtio ti kuuga atĩ no mũhaka akaahonokio. Mũtũmwo Paulo aandĩkire ũũ: “Rutagĩrai ũhonokio wanyu wĩra, mũgĩĩtigagĩra na mũkĩinainaga.” (Afilipi 2:12) Ũbatithio no kĩambĩrĩria tu. Wagĩrĩirũo kwĩyũria ũũ, Ingĩka atĩa nĩguo njikarage nyendetwo nĩ Ngai? Gĩcunjĩ kĩa mũthia kĩa ibuku rĩrĩ nĩgĩgũcokia kĩũria kĩu.