Kũrĩ wee ndungata ya Jehova:

O ta ũrĩa ũũĩ, Bibilia nĩ yarĩrĩirie na njĩra nene ũhoro wĩgiĩ andũ. Aingĩ ao maarĩ athuri na atumia ehokeku arĩa maacemanirie na mathĩna ta marĩa tũkoragwo namo. Maarĩ ‘andũ o ta ithuĩ.’ (Jakubu 5:17) Amwe ao nĩ maagũmĩirũo nĩ mathĩna na mĩtangĩko. Angĩ nao nĩ maatuuririo ngoro nĩ andũ a famĩlĩ kana andũ angĩ arĩa maathathayagia nao. Na nĩ kũrĩ maathĩnagio nĩ thamiri nĩ ũndũ wa mehia mao.

Hihi andũ ta acio nĩ maatigĩte Jehova biũ? Aca. Aingĩ maarĩ ta mwandĩki wa Thaburi ũrĩa wahoire ũũ: “Niĩ nĩhĩtĩtie njĩra ta ng’ondu yũrĩte. Gĩcarie ndungata yaku, nĩgũkorwo ndiriganĩirwo nĩ maathani maku.” (Thaburi 119:176, Holy Bible in Gĩkũyũ) Hihi ũguo nĩguo ũiguaga?

Jehova ndariganagĩrũo nĩ athathaiya ake arĩa moimaga rũũru-inĩ. Ngũrani na ũguo, nĩ kũmetha amethaga, na kaingĩ ahũthagĩra athathaiya arĩa angĩ. Kwa ngerekano, ta wĩcirie ũrĩa Jehova aateithirie ndungata yake Ayubu ĩrĩa yacemanirie na mathĩna maingĩ ta kũũrũo nĩ indo ciake, gũkuĩrũo, na ndwari njũru mũno. Ningĩ nĩ aakirĩrĩirie ciugo cia kũmũtuuria iria eeragwo nĩ andũ arĩa meerĩgagĩrĩrũo mamwĩkĩre hinya. No ndaigana gũtiga Jehova, o na gũtuĩka kũrĩ hĩndĩ aagĩire na mawoni matagĩrĩire. (Ayubu 1:22; 2:10) Hihi Jehova aateithirie Ayubu atĩa gũcokerera mawoni marĩa magĩrĩire?

Njĩra ĩmwe Jehova aahũthĩrire gũteithia Ayubu nĩ kũgerera ndungata yake yetagwo Elihu. Rĩrĩa Ayubu aatarĩirie mĩtangĩko yake, Elihu nĩ aathikĩrĩirie, na ũhoro ũcio ũkĩmũtindĩka kwaria. Hihi angĩamwĩrire atĩa? Hihi angĩambire kũmũruta mahĩtia kana gũtũma eigue atarĩ kĩene? Hihi Elihu nĩ eeyonaga arĩ mwega gũkĩra Ayubu? Tiguo o na hanini! Elihu oigire ũũ atongoretio nĩ roho wa Ngai: “Mbere ya Mũrungu niĩ ndariĩ o tawe; o na niĩ nĩ kũũmbwo ndombirũo na rĩũmba.” Agĩcoka akĩmũũmĩrĩria ũũ: “Itebebia rĩakwa-rĩ, rĩtingĩgũtua nda ũritũ wakwa ndũngĩkũhihinya.” (Ayubu 33:6, 7) Handũ ha kuongerera Ayubu ruo, Elihu aamũheire ũtaaro ũrĩa aabataraga na akĩmũũmĩrĩria na njĩra ya wendo.

Tũkwenda ũmenye atĩ mwerekera o ta ũcio nĩguo ũtũmĩte tũhaarĩrie broshua ĩno. Twambire gũthikĩrĩria, tũgĩĩciragia na njĩra ndikĩru maũndũ marĩa moigirũo nĩ amwe a arĩa maatigĩte maũndũ ma kĩĩroho, na marĩa maacemanagia namo. (Thimo 18:13) Tũgĩcoka tũgĩthuthuria Maandĩko na kinyi, nĩguo tũmenye ũrĩa Jehova aateithirie ndungata ciake cia mahinda mahĩtũku rĩrĩa ciacemanagia na maũndũ ta macio. Thutha-inĩ, tũgĩturanĩra ũhoro ũcio wa Kĩĩmaandĩko na maũndũ marĩa marekĩka mahinda-inĩ maya tũgĩthondeka broshua ĩno. Tũrakũhoya na gĩtĩo ũthome broshua ĩno. Gĩa na ma biũ atĩ nĩ tũkwendete kuuma ngoro.

Kĩama Kĩrĩa Gĩtongoragia kĩa Aira a Jehova