GĨCUNJĨ GĨA KERĨ
Mĩtangĩko—‘Tũhatĩkagwo na Njĩra Ciothe’
“Thutha wa gũkorũo kĩhiko-inĩ mĩaka 25, niĩ na mũthuri wakwa nĩ twatiganire. Ciana citũ nacio ikĩrega ũhoro wa ma. Ngĩnyitwo nĩ mathĩna moru mũno ma mwĩrĩ. Thutha ũcio ngĩrwara mũrimũ wa gũthuthĩka ngoro. Ndaiguire hehenjekete biũ ũndũ itangĩahotire kũhiũrania na ũndũ ũngĩ o wothe. Ngĩtiga gũthiĩ mĩcemanio, na ngĩtiga kũhunjia.”—June.
MĨTANGĨKO ĩkoraga mũndũ o wothe, o na ndungata cia Ngai. Mwandĩki wa Thaburi oigire ũũ: “Nyingĩhĩirũo thĩinĩ wakwa nĩ mĩtangĩko.” (Thaburi 94:19) Nake Jesu oigire atĩ matukũ-inĩ ma kũrigĩrĩria, “mĩtangĩko ya ũtũũro” nĩ ĩngĩgaatũma ũkorũo ũrĩ ũndũ mũritũ gũtungatĩra Jehova. (Luka 21:34) Hihi wee nĩ ũiguaga ũritũhĩirũo nĩ mathĩna ma kĩĩmbeca, ma famĩlĩ, kana mũrimũ? Jehova angĩgũteithia atĩa kũhiũrania namo?
“Hinya Ũrĩa Ũkĩrĩte wa Ndũire”
Tũtingĩhota kũhiũrania na mĩtangĩko tũngĩhoka hinya witũ ithuene. Mũtũmwo Paulo aandĩkire ũũ: ‘Tũhatĩkagwo na njĩra ciothe, tũgatukanĩrũo, tũkagũithagio thĩ.’ No agĩcoka akiuga atĩ “tũtihingĩrĩirio biũ,” “tũtiagaga biũ wa gwĩka,” na “tũtianangagwo.” Nĩ kĩĩ gĩtũteithagia gũkirĩrĩria? Nĩ “hinya ũrĩa ũkĩrĩte wa ndũire,” ũrĩa uumaga kũrĩ Jehova, Ngai mwene hinya wothe.—2 Akorintho 4:7-9.
Ta ririkana ũrĩa anakũhe “hinya ũrĩa ũkĩrĩte wa ndũire.” Hihi nĩ ũririkanaga mĩario ya gwĩkĩra ngoro yanarutwo ĩgĩtũma wone wega wendo wa Jehova gũkwerekera? Na githĩ wĩtĩkio waku harĩ ciĩranĩro cia Jehova ndwagĩaga na hinya rĩrĩa warutaga andũ igũrũ rĩgiĩ Paradiso? Rĩrĩa twathiĩ mĩcemanio-inĩ ya Gĩkristiano, na tũkahunjĩria andũ arĩa angĩ, nĩ tũheagwo hinya tũkahota gũkirĩrĩria mĩtangĩko ya ũtũũro na tũkagĩa na thayũ wa meciria nĩ getha tũhote gũtungatĩra Jehova tũkenete.
‘Cama Wone atĩ Jehova Nĩ Mwega’
Nĩ ma wahota kũigua ũritũhĩirũo mũno nĩ maũndũ. Kwa ngerekano, Jehova atwĩrĩte twambage gũcaria maũndũ ma Ũthamaki na tũgĩe na mũbango mwega wa maũndũ ma kĩĩroho. (Mathayo 6:33; Luka 13:24) Ĩ angĩkorũo gũũkĩrĩrũo, mũrimũ, kana mathĩna ma famĩlĩ nĩ maratũma ũũrũo nĩ hinya? Kana hihi wĩra waku nĩ ũroya hinya na mahinda marĩa ũngĩhũthĩra hamwe na kĩũngano? No ũigue ũritũhĩirũo mũno, tondũ wa gũkorũo na maũndũ maingĩ ma gwĩka no ũkaaga hinya na mahinda ma kũmahingia. No gũkorũo waneyũria kana hihi Jehova nĩ erĩgagĩrĩra maũndũ maingĩ kuuma kũrĩ wee.
Jehova nĩ atũĩ wega. Ndarĩ hĩndĩ erĩgagĩrĩra tũhingie maũndũ makĩrĩte ũhoti witũ. Ningĩ nĩ amenyaga atĩ nĩ tuoyaga kahinda tũngĩgaacokereria thutha wa kwaga hinya kĩĩmwĩrĩ na kĩĩmeciria.—Thaburi 103:13, 14.
Kwa ngerekano, ta wĩcirie ũrĩa Jehova aarũmbũyanirie na mũnabii Elija. Rĩrĩa Elija aakuire ngoro mũno na agĩĩtigĩra nginya akĩũrĩra werũinĩ-rĩ, hihi Jehova nĩ aamũkũmire akĩmwatha acoke wĩra-inĩ ũrĩa aamũheete? Aca. Jehova aatũmire mũraika maita merĩ amũũkĩrie kahora na amũhe irio. O na kũrĩ ũguo, thikũ 40 thutha ũcio, Elija aarĩ o na mĩtangĩko na guoya. Nĩ atĩa ũngĩ Jehova eekire nĩguo amũteithie? Wa mbere, Jehova aamuonirie atĩ nĩ angĩahotire kũmũgitĩra. Wa kerĩ, akĩmũũmĩrĩria na njĩra ya kũmwarĩria na “kamũgambo gaceke kahoreru.” Thutha-inĩ, Jehova akĩmũguũrĩria atĩ kwarĩ na andũ angĩ ngiri nyingĩ maatungatagĩra Ngai marĩ na wĩhokeku. Thutha ũcio, Elija agĩcokerera wĩra wake arĩ mũnabii ũrĩ na kĩyo. (1 Athamaki 19:1-19) Tũreruta atĩa? Rĩrĩa Elija aagũmĩirũo nĩ mĩtangĩko, Jehova aarũmbũyanirie nake arĩ na ũkirĩrĩria na tha. Jehova ndarĩ agarũrũka. Arũmbũyanagia na ithuĩ na njĩra o ta ĩyo.
Koragwo na mawoni marĩa maagĩrĩire rĩrĩa ũreciria maũndũ marĩa ũngĩĩka ũthathaiya-inĩ wa Jehova. Ndũkaringithanagie maũndũ marĩa ũreka ũmũthĩ na marĩa wekaga hau kabere. Kwa ngerekano, mũteng’eri ũkoretwo ategũteng’era mĩeri kana mĩaka ĩigana ũna, ndangĩhota o rĩmwe gũteng’era ta ũrĩa aateng’eraga atanatiga. No aambire gũteng’era hanini hanini nginya agĩe na hinya. Akristiano mahaana ta ateng’eri. Memenyeragia marĩ na muoroto mũna meciria-inĩ. (1 Akorintho 9:24-27) Na githĩ to wĩigĩre muoroto ũrĩa ũngĩhota kũhingia ihinda-inĩ rĩrĩ? Kwa ngerekano, no wĩigĩre muoroto wa gũthiĩ mĩcemanio ya Gĩkristiano. Hoya Jehova agũteithie kũhingia muoroto ũcio. O ũrĩa ũgũthiĩ ũcokereirũo nĩ hinya wa kĩĩroho, noguo ‘ũgũcama wone atĩ Jehova nĩ mwega.’ (Thaburi 34:8) Ririkana atĩ ũndũ o wothe ũreka kuonia Jehova nĩ ũmwendete, o na wakorũo ũrĩ mũnini atĩa, nĩ ũmũkenagia.—Luka 21:1-4.
Jehova ndarĩ hĩndĩ erĩgagĩrĩra tũhingie maũndũ makĩrĩte ũhoti witũ
“Ũndũ Ũrĩa Ndaabataraga Nĩguo Ngĩe na Hinya”
Hihi Jehova aateithirie June atĩa amũcokerere? June oigire ũũ: “Ndaathiire na mbere kũhoya Jehova andeithie. Ngĩcoka ngĩrũo nĩ mũtumia wa mwanake wakwa atĩ kwarĩ na kĩgomano kĩarĩ gĩkwo taũni-inĩ itũ. Ngĩtua itua rĩa gũthiĩ mũthenya ũmwe. Ndaiguire wega mũno gũkorũo hamwe rĩngĩ na andũ a Jehova! Kĩgomano kĩu nĩkĩo ũndũ ũrĩa ndaabataraga nĩguo ngĩe na hinya. Rĩu nĩ ndĩratungatĩra Jehova rĩngĩ ndĩ na gĩkeno. Ũtũũro wakwa ũrĩ na muoroto mwega makĩria. Na rĩu nĩ menyete atĩ ndiagĩrĩirũo nĩ kwĩyamũrania na aarĩ na ariũ a Ithe witũ, na atĩ nĩ ndĩrabatara ũteithio wao. Nĩ njokagia ngatho tondũ nĩ ndonire kamweke ga gũcoka.”
