Rĩrĩa Jehova aambĩrĩirie famĩlĩ, aaheire aciari wĩra wa kũrera ciana ciao. (Akolosai 3:20) Nĩ wĩra waku ũrĩ mũciari kũruta mwana waku ũrĩa angĩenda Jehova na atuĩke mũndũ ũngĩhota kwĩrũgamĩrĩra. (2 Timotheo 1:5; 3:15) Ningĩ no mũhaka ũmenye maũndũ marĩa marĩ ngoro-inĩ ya mwana waku. Makĩria ma ũguo, kĩonereria gĩaku nĩ kĩa bata mũno. Njĩra ĩrĩa njega biũ ya kũruta mwana waku Kiugo kĩa Jehova nĩ kwamba gũgĩkĩra ngoro-inĩ yaku.—Thaburi 40:8.

ŨRĨA BIBILIA YUGAGA: ‘Hiũhaga gũthikĩrĩria, no ndũkahĩke kwaria.’ (Jakubu 1:19) Tigagĩrĩra atĩ ciana ciaku itiretigĩra gũkwarĩria. Cionagie atĩ nĩ wĩhaarĩirie gũcithikĩrĩria rĩrĩa irenda gũkwarĩria. Geria kũiga mũciĩ waku wĩ na thayũ hingo ciothe nĩgetha itigetigagĩre kwĩyaria. (Jakubu 3:18, The Holy Bible in Gĩkũyũ Language) Cingĩmenya atĩ nĩ ũgũcikũma kana ũhiũhe gũcituĩra, no ciage gũkũhingũrĩra ngoro biũ. Kiragĩrĩria ciana ciaku, na ũgaciĩraga kaingĩ atĩ nĩ ũciendete.—Mathayo 3:17; 1 Akorintho 8:1.

ŨRĨA ŨNGĨKA:

• Rĩrĩa ciana ciaku ciabatara kwaria nawe, ndũgaciagĩre kamweke

• Aranagĩria na ciana ciaku kaingĩ, to rĩrĩa kũrĩ na mathĩna

ŨRĨA BIBILIA YUGAGA: “Ũrĩa wa gũtũũra agwatĩirie ũtaũku nĩ wega arĩĩonagĩra.” (Thimo 19:8) Nĩguo ũmenye ũrĩa ciana ciaku iraigua, rĩmwe na rĩmwe nĩ ũrĩbataraga kũrora nginya ũrĩa iraria, to gũcithikĩrĩria tu. Kaingĩ ciana nĩ ciongagĩrĩra cumbĩ ikĩheana ũhoro kana ikaaga kũheana ũhoro wothe. “Mũndũ gũcokia ũhoro atanaigua nĩ ũrimũ, na nĩ ũndũ wa gũtũma one thoni.” (Thimo 18:13) Ndũkahiũhe kũrakara.—Thimo 19:11.

ŨRĨA ŨNGĨKA:

• Tua itua rĩa gũthikĩrĩria ciana ciaku ũtegũcitinia na mĩario kana kũhiũha kũrakara, o na cingĩkwĩra atĩa

• Geria kũririkana ũrĩa waiguaga rĩrĩa waiganaga tao na maũndũ marĩa wonaga marĩ ma bata

ŨRĨA BIBILIA YUGAGA: “Mũrũ wakwa, igua ũtaari wa thoguo, na ũmenye gũgatigana na kĩrĩra kĩa nyũkwa.” (Thimo 1:8) Jehova aheete aciari erĩ wĩra wa kũrera ciana ciao. No mũhaka mũrute ciana cianyu ũrĩa cingĩmwathĩkĩra na imũhe gĩtĩo mũrĩ aciari a cio. (Aefeso 6:1-3) Mũngĩkorũo ‘mũtekũiguana wega,’ ciana cianyu no irĩmenyaga. (1 Akorintho 1:10) Mũngĩhĩtania, mũtigatetanie mbere ya ciana cianyu tondũ no imwagĩre gĩtĩo mũrĩ aciari a cio.

ŨRĨA ŨNGĨKA:

• Arĩrĩriai ũrĩa mũrĩrũngaga ciana cianyu, na mwĩtĩkanĩrie ũndũ-inĩ ũcio

• Mũngĩkorũo na mawoni ngũrani megiĩ ũrĩa mũrĩrutaga ciana cianyu, geria kũmenya kĩrĩa kĩratũma ũrĩa mũhikanĩtie nake akorũo na mawoni macio

ŨRĨA BIBILIA YUGAGA: “Menyeria mwana njĩra ĩrĩa aagĩrĩirũo nĩ gũthiĩra.” (Thimo 22:6) Kũhota kũruta ciana ciaku ti ũndũ ũgũũka o ũguo. Nĩ ũkũbatara kũbanga ũrĩa ũrĩcirutaga, na ũrĩa ũrĩcirũngaga ciahĩtia. (Thaburi 127:4; Thimo 29:17) Kũrũnga ciana to gũciherithia, no nĩ nginya gũciteithia kũmenya gĩtũmi kĩa mawatho marĩa ũcigĩire. (Thimo 28:7) Ningĩ, nĩ wega ũcirute kwenda Kiugo kĩa Jehova na gũtaũkĩrũo nĩ mawatho marĩa marĩ thĩinĩ wa kĩo. (Thaburi 1:2) Gwĩka ũguo nĩ gũkũmateithia kũgĩa na thamiri ĩraruta wĩra.—Ahibirania 5:14.

ŨRĨA ŨNGĨKA:

• Teithia ciana ciaku gwĩtĩkia na ma atĩ Ngai arĩ kuo na no cimwĩhoke

• Citeithie kũmenya ũrĩa cingĩkũũrana na ciĩtheme maũndũ marĩa mangĩthũkia mĩtugo yao ta marĩa makoragwo Intaneti-inĩ na ciarĩro-inĩ cia kwaranĩria. Marute ũrĩa mangĩĩthema andũ arĩa mendete kũhenereria ciana nĩguo makomanie nacio