“Mwagĩrĩirũo gũkorũo mũrĩ arutani.” (Ahib. 5:12) Ta wĩcirie ũndũ ũyũ! Jehova—Mũrutani ũrĩa mwega biũ igũrũ na thĩ—atũheete mweke wa kũnyitanĩra harĩ kũruta arĩa angĩ ũhoro wake! Wĩra o wothe wa kũrutana ũhoro wa ma wĩgiĩ Jehova—thĩinĩ wa famĩlĩ, kĩũngano-inĩ, kana ũtungata-inĩ—nĩ mweke wa bata na wagĩrĩirũo kuoywo na ũritũ. Nĩ kĩĩ kĩngĩtũteithia nĩguo tũũhote?

Macokio marĩ thĩinĩ wa ciugo iria mũtũmwo Paulo aandĩkĩire Timotheo: “Thiĩ na mbere kwĩrutanĩria gũthoma ũrĩ mbere ya andũ, gũtaarana, na kũrutana.” Paulo oongereire akiuga: “Weka ũguo, nĩ ũkeehonokia wee mwene na ũhonokie arĩa magũthikagĩrĩria.” (1 Tim. 4:13, 16) Ũrĩ na ndũmĩrĩri ya kũhonokia mĩoyo, na nĩ wagĩrĩirũo kwĩra andũ arĩa angĩ. Kwoguo nĩ harĩ bata wĩrutanĩrie kwagagĩria ũhoti waku wa gũthoma na kũrutana. Broshua ĩno ĩhaarĩirio nĩgetha ĩgũteithie gwĩka ũguo. Rora maũndũ mamwe marĩa marĩ thĩinĩ wayo.

Jehova nĩwe ‘Mũrutani Ũrĩa Mũnene.’ (Isa. 30:20) O na gũtuĩka broshua ĩno nĩ ĩgũgũteithia kwagagĩria ũhoti waku ũrĩ mũthomi na mũrutani, ndũkanariganĩrũo atĩ Jehova nĩwe Kĩhumo kĩa ndũmĩrĩri itũ na atĩ nĩwe ũgucagĩrĩria andũ. (Joh. 6:44) Nĩ ũndũ ũcio, hoyaga kaingĩ ũheo roho mũtheru. Hũthagĩra Kiugo kĩa Ngai kaingĩ. Erekagĩria rũgooco harĩ Jehova, no ti harĩ wee mwene. Wĩrutanĩrie gũteithia athikĩrĩria aku makũrie wendo mũnene harĩ Jehova ngoro-inĩ ciao.

Ũheetwo mweke wa kũrutana ndũmĩrĩri ĩrĩa ya bata makĩria yanaheo andũ. Twĩ na ma atĩ o ũrĩa ũkwĩhoka “hinya ũrĩa Ngai aheanaga,” nĩ ũkũgaacĩra wĩra-inĩ ũcio.—1 Pet. 4:11.

Nĩ ithuĩ arutani o ta inyuĩ,

Kĩama Kĩrĩa Gĩtongoragia kĩa Aira a Jehova