Rĩu nĩ mũthenya wa gatatũ kuuma Nathanaeli atuĩka ũmwe wa arutwo a mbere a Jesu. Jesu hamwe na arutwo amwe a acio a mbere, magathiĩ gĩcigo-inĩ gĩa kwao mũciĩ Galili. Merekeire Kana, kũrĩa Nathanaeli oimĩte. Taũni ya Kana ĩrĩ mwena wa rũgongo wa Nazarethi, kũrĩa Jesu aarereirũo. Nĩ manyitĩtwo ũgeni iruga-inĩ rĩa ũhiki kũu Kana.

O na nyina wa Jesu arĩ ũhiki-inĩ ũcio. Tondũ Mariamu nĩ mũrata wa famĩlĩ ya arĩa marahikania, kũroneka arĩ na itemi harĩ kũrũmbũiya ageni aingĩ arĩa mokĩte. Na nĩkĩo arahiũha kũmenya nĩ harĩ kĩndũ gĩathira, akeera Jesu: “Matirĩ na ndibei.”​—Johana 2:3.

Nĩ ta Mariamu areera Jesu eke ũndũ tondũ ndibei nĩ yathira. No Jesu akamwĩra: “Mũtumia ũyũ, ũndũ ũcio ũtwĩgiĩ atĩa niĩ nawe?” (Johana 2:4) Arĩ Mũthamaki ũrĩa ũthurĩtwo nĩ Ngai, Jesu agĩrĩirũo gwĩka maũndũ kũringana na ũrĩa arerũo nĩ Ithe wa igũrũ, no ti andũ a famĩlĩ yao kana arata. Mariamu agatigĩra mũrũ wake ũndũ ũcio, akeera arĩa maratungata ũũ: “Ĩkai ũrĩa wothe ekũmwĩra.”​—Johana 2:5.

Harĩ na ndigithũ ithathatũ cia maĩ ithondeketwo na mahiga, na o ĩmwe yacio no ĩkuue makĩria ma lita 40. Jesu akeera acio maratungata: ‘Ihũriai ndigithũ icio maĩ.’ Agacoka akameera: “Rĩu tahiai mũtwarĩre mũrũgamĩrĩri wa iruga.”​—Johana 2:​7, 8.

Mũrũgamĩrĩri wa iruga agakena nĩ ũrĩa ndibei ĩyo ĩrĩ njega, no ndaramenya atĩ yathondekwo na njĩra ya kĩama. Ageta mũhikania akamwĩra: “Andũ arĩa angĩ othe mambaga kũheana ndibei ĩrĩa njega, na rĩrĩa andũ marĩo makaheana ĩrĩa ĩtarĩ njega tayo. No wee ũkũigĩte ĩrĩa njega nginya rĩu.”​—Johana 2:10.

Gĩkĩ nĩkĩo kĩama kĩa mbere Jesu kũringa. Thutha wa arutwo acio ake erũ kuona kĩama kĩu, wĩtĩkio wao harĩ we ũgekĩrũo hinya. Thutha ũcio, Jesu agathiĩ hamwe na nyina na ariũ a nyina nginya taũni-inĩ ya Kaperinaumu mwena wa rũgongo wa Iria rĩa Galili.