Thutha wa Jesu kũbatithio nĩ Johana, roho wa Ngai ũkamũtwara nginya werũ-inĩ wa Judea. Arĩ na maũndũ maingĩ ma gwĩcũrania. Rĩrĩa ekũbatithagio, ‘igũrũ nĩ rĩhingũkire.’ (Mathayo 3:16) Ũndũ ũcio watũma aririkane maũndũ marĩa eerutĩte na marĩa eekaga arĩ igũrũ. Hatarĩ nganja, arĩ na maũndũ maingĩ ma gwĩcũrania igũrũ rĩamo!

Jesu akahũthĩra thikũ 40 werũ-inĩ ũtukũ na mũthenya. Ihinda rĩu rĩothe, akaga kũrĩa kĩndũ. Shaitani Mũcukani agacoka agoka kũmũgeria hĩndĩ ĩyo arĩ mũhũtu, akamwĩra: “Angĩkorũo ũrĩ mũrũ wa Ngai, garũra mahiga maya matuĩke mĩgate.” (Mathayo 4:3) Tondũ Jesu nĩ oĩ atĩ nĩ ũũru kũhũthĩra hinya wake wa kũringa ciama kũhingia merirĩria make mwene, akaregana na igerio rĩu.

Shaitani ndaratigana nake. Akahũthĩra njĩra ĩngĩ kũmũgeria. Akeera Jesu egũithie kuuma gacũmbĩrĩ-inĩ ka hekarũ. No Jesu akarega kwĩgũithia atĩ nĩguo araika moke mamũhonokie. Akahũthĩra Maandĩko kuonania atĩ nĩ ũũru kũgeria Ngai na njĩra ta ĩyo.

Thutha ũcio, Mũcukani akageria Jesu riita rĩa gatatũ, akamuonia “mothamaki mothe ma thĩ na riri wamo,” na akamwĩra ũũ: “Maũndũ maya mothe nĩ ngũkũhe ũngĩndurĩria maru ũthathaiye.” O rĩngĩ Jesu akarega, akamwĩra: “Thiĩ, Shaitani!” (Mathayo 4:​8-10) Akaga gwĩtĩkĩra kũgũa igerio-inĩ rĩa gwĩka ũũru, tondũ nĩ oĩ atĩ ũtungata mũtheru wagĩrĩire kũheo o Jehova wiki. Agatua itua rĩa gũtũũria wĩhokeku wake harĩ Ngai.

No twĩrute kuumana na magerio macio na ũrĩa Jesu eekire agerio. Magerio macio nĩ meekĩkire, ũndũ ũrĩa wonanagia atĩ Mũcukani e kuo o na akorũo ndonekaga, mũgarũ na ũrĩa andũ meciragĩria atĩ we nĩ kĩhinya tu gĩa gwĩka maũndũ moru. Ũhoro ũcio ningĩ nĩ wonanagia atĩ thirikari cia thĩ nĩ cia Shaitani, na nĩwe ũcitongoragia. Korũo indo iria aaheaga Jesu itiarĩ ciake igerio rĩu rĩtingĩarĩ rĩa ma.

Makĩria ma ũguo, Mũcukani oigire atĩ nĩ angĩaheire Jesu ngerenwa angĩaturirie ndu amũthathaiye, nginya akĩmwĩrĩra mothamaki mothe ma gũkũ thĩ. O na ithuĩ Mũcukani no atũgerie na njĩra ta ĩyo, hihi atũhenererie na mĩeke ya kwĩgĩĩra na ũtonga wa gũkũ thĩ, ũnene, kana igweta. Na githĩ tũtionanagia tũrĩ ogĩ rĩrĩa twarũmĩrĩra kĩonereria kĩa Jesu gĩa gũtũũria wĩhokeku harĩ Ngai, o na twagerio na njĩra o yothe? No ririkana atĩ Mũcukani aambire gũtigana na Jesu “nginya hĩndĩ ĩngĩ njagĩrĩru.” (Luka 4:13) No eke o ũguo harĩ ithuĩ, kwoguo twagĩrĩire gũikara twĩhaarĩirie.