Thutha wa gũkorũo werũ-inĩ thikũ 40, na mbere ya gũcoka Galili, Jesu agathiĩ rĩngĩ kũrĩ Johana ũrĩa wamũbatithirie. Jesu agĩkuhĩrĩria, Johana akamuonereria harĩ arĩa marĩ nake agacoka akoiga: “Ta rorai, Gatũrũme ka Ngai karĩa keheragia mehia ma andũ! Ũyũ nĩwe ndoigire ũhoro wake atĩrĩ: ‘Thutha wakwa nĩ haroka mũndũ mũnene kũrĩ niĩ, nĩ gũkorũo itanaciarũo aarĩ kuo.’” (Johana 1:​29, 30) O na gũtuĩka Johana nĩ mũkũrũ hanini gũkĩra Jesu, nĩ oĩ atĩ Jesu aatũũraga mbere yake arĩ kĩũmbe kĩa roho igũrũ.

Ciumia cigana ũna hĩtũku, rĩrĩa Jesu okĩte kũbatithio, Johana ndaarĩ na ma kana Jesu nĩwe warĩ atuĩke Mesia. Johana oigire ũũ: “O na niĩ ndiamũmenyaga, no njũkĩte kũbatithania na maĩ nĩguo we amenyeke wega harĩ Isiraeli.”​—Johana 1:31.

Johana agathiĩ na mbere kwĩra arĩa marĩ nake ũrĩa gwathire rĩrĩa aabatithagia Jesu akoiga: “Nĩ ndonire roho ũgĩikũrũka kuuma igũrũ ũtariĩ ta ndutura, na ũgĩikara igũrũ rĩake. O na niĩ ndiamũmenyaga, no Ũrĩa wandũmire batithanagie na maĩ aanjĩrire ũũ: ‘Mũndũ ũrĩa wee ũkona roho waikũrũka na ũikare igũrũ rĩake, ũcio nĩwe ũbatithanagia na roho mũtheru.’ Na niĩ nĩ nyonete ũndũ ũcio, na nĩ ndutĩte ũira atĩ ũcio nĩwe Mũrũ wa Ngai.”​—Johana 1:32-34.

Mũthenya ũyũ ũngĩ Jesu agathiĩ kũrĩ we rĩngĩ, na Johana arĩ hamwe na arutwo ake erĩ. Johana akoiga: “Ta rorai, Gatũrũme ka Ngai!” (Johana 1:36) Maigua ũguo, arutwo acio erĩ a Johana Mũbatithania makarũmĩrĩra Jesu. Ũmwe wao etagwo Andrea. Ũcio ũngĩ wĩtagwo Johana no kũhoteke nĩwe wandĩkĩte ũhoro ũcio. Johana ũcio no erũo nĩ mũihwa wa Jesu, tondũ nĩ mũrũ wa Salome. No kũhoteke Salome nĩ mwarĩ wa nyina na Mariamu, na mũthuri wake nĩ Zebedi.

Jesu ehũgũra akona Andrea na Johana makĩmũrũmĩrĩra akamoria ũũ: “Nĩ kĩĩ mũracaria?”

Nao makamũũria: “Rabii, ũraikara kũ?”

Nake akameera: “Ũkai na nĩ mũkuona.”​—Johana 1:​37-39.

Nĩ kĩndũ thaa ikũmi cia hwaĩ-inĩ, na Andrea na Johana magathiĩ na mbere gũikara na Jesu nginya gũgatuka. Andrea nĩ mũkenu mũno nginya agakinya handũ ageetha mũrũ wa nyina Simoni, o we wĩtagwo Petero akamwĩra: “Nĩ tuonete Mesia.” (Johana 1:41) Agacoka akamũtwara kwĩ Jesu. Thutha ũcio, Johana o nake ageetha mũrũ wa nyina Jakubu na akamũtwara kũrĩ Jesu, o na gũtuĩka Johana ndagwetete ũndũ ũcio ũhoro-inĩ ũrĩa aandĩkire.

Mũthenya ũyũ ũngĩ, Jesu agacemania na Filipu wa kuuma Bethisaida. Ĩrĩ hakuhĩ na gĩcũa kĩa mwena wa rũgongo wa Iria rĩa Galili, na nĩyo taũni ĩrĩa Andrea na Petero moimĩte.  Jesu akeera Filipu: “Tuĩka mũrũmĩrĩri wakwa.”​—Johana 1:43.

Filipu agacoka agacemania na Nathanaeli o we wĩtagwo Batholomayo akamwĩra: “Nĩ tuonete ũrĩa wandĩkĩtwo ũhoro wake Watho-inĩ nĩ Musa, na mabuku-inĩ ma Anabii, nĩwe Jesu, mũrũ wa Jusufu, kuuma Nazarethi.” Nathanaeli akagĩa na nganja akeera Filipu atĩrĩ: “Nĩ kũrĩ kĩndũ kĩega kĩngiuma Nazarethi?”

Filipu akamwĩra: “Ũka wĩyonere.” Jesu akona Nathanaeli erekeire harĩ we akoiga: “Ta rorai Mũisiraeli kũna ũtarĩ ũhinga.”

Nathanaeli akamũũria: “Ũnjũĩ atĩa?”

Jesu akamwĩra: “Filipu atanagwĩta, nĩ nguonire rĩrĩa uuma rungu rwa mũkũyũ.”

Nake Nathanaeli agegete akamwĩra: “Rabii, wee nĩwe Mũrũ wa Ngai, wee ũrĩ Mũthamaki wa Isiraeli.”

Jesu akamũũria: “Hihi wetĩkia tondũ nĩ ndakwĩra nĩ nguonire rungu rwa mũkũyũ? Nĩ ũkuona maũndũ manene gũkĩra macio.” Agacoka akoiga: “Ngũmwĩra atĩrĩ na ma, nĩ mũkona igũrũ rĩkĩhingũka na araika a Ngai magĩikũrũka kũrĩ Mũrũ wa mũndũ makĩambataga.”​—Johana 1:​45-51.

Kahinda kanini thutha ũcio, Jesu e hamwe na arutwo ake erũ, makoima Mũkuru wa Jorodani magathiĩ Galili.