Thutha wa andũ a Nazarethi kũgeria kũũraga Jesu, agathiĩ itũũra-inĩ rĩa Kaperinaumu, hakuhĩ na Iria rĩa Galili, o rĩo rĩtagwo “iria rĩa Genesareti.” (Luka 5:1) Ũndũ ũcio ũkahingia ũrathi ũrĩa ũrĩ thĩinĩ wa ibuku rĩa Isaia atĩ andũ a Galili arĩa maatũraga hakuhĩ na iria nĩ mangĩkona ũtheri mũnene.​—Isaia 9:​1, 2. 

Arĩ o kũu Galili, Jesu agathiĩ na mbere kũmenyithania atĩ “Ũthamaki wa igũrũ nĩ ũkuhĩrĩirie.” (Mathayo 4:17) Jesu akona arutwo ake ana. Nĩ maathiĩte nake mbere ĩyo, no thutha wa gũcoka nake kuuma Judea, magĩcokerera wĩra wao wa gũtega thamaki. (Johana 1:​35-42) No rĩu nĩ ihinda rĩa gũkorũo na Jesu matekũmũtiga nĩgetha amamenyerie ũrĩa makaaruta wĩra wa kũhunjia arĩkia gũthiĩ.

Agereire rũteere-inĩ rwa iria, Jesu akona Simoni Petero, mũrũ wa nyina Andrea, na andũ angĩ arĩa marĩ nao magĩthambia neti ciao. Agathiĩ agatonya gatarũ-inĩ ga Petero, na akamwĩra agatonyie iria-inĩ hanini. Matonya o hanini, Jesu agaikara thĩ na akambĩrĩria kũruta kĩrĩndĩ kĩrĩa kĩũnganĩte rũteere-inĩ ma ciĩgiĩ Ũthamaki.

Thutha ũcio, Jesu akeera Petero: “Gatware harĩa hariku, na mũikie neti cianyu maĩ-inĩ mũtege thamaki.” Nake Petero akamũcokeria: “Mũrutani, tũgeririe ũtukũ mũgima na gũtirĩ kĩndũ tũtegire, no tondũ nĩ woiga nĩ ngũikia neti maĩ-inĩ.”​—Luka 5:​4, 5.

Magaikia neti ciao, makanyita thamaki nyingĩ nginya neti icio ikambĩrĩria gũtarũkanga! O na ihenya mageta andũ angĩ marĩ gatarũ-inĩ kangĩ moke mamateithie. Thutha wa kahinda tũtarũ twerĩ tũkaiyũra thamaki nginya tũkambĩrĩria kũrikĩra. Petero ona ũguo, akagwa mbere ya Jesu akamwĩra: “Njeherera, Mwathani, nĩ ũndũ niĩ ndĩ mũndũ mwĩhia.” Jesu akamwĩra: “Tiga gwĩtigĩra. Kuuma rĩu ũrĩtegaga andũ.”​—Luka 5:8, 10.

Jesu akeera Petero na Andrea: “Nũmĩrĩrai, na nĩ ngũmũtua ategi a andũ.” (Mathayo 4:19) Agacoka ageta ategi angĩ erĩ a thamaki, Jakubu na Johana, ariũ a Zebedi. O nao magoka kũrĩ we o rĩo. Kwoguo, othe ana magatiga wĩra wao wa gũtega thamaki, na magatuĩka arutwo a mbere a mahinda mothe a Jesu.