Ũhoti wa Jesu wa kũhũnia andũ ngiri nyingĩ na njĩra ya kĩama nĩ wahutia andũ na njĩra nene. Makoiga atĩ, “hatarĩ nganja ũyũ nĩwe Mũnabii ũrĩa weranĩirũo atĩ nĩ agooka gũkũ thĩ,” arĩ we Mesia, na atĩ no akorũo arĩ mũtongoria mwega. (Johana 6:14; Gũcokerithia Maathani 18:18) Kwoguo andũ makabanga kũnyita Jesu mamũtue mũthamaki.

No Jesu akamenya ũrĩa andũ marabanga. Akoigĩra kĩrĩndĩ ũhoro na akeera arutwo ake maingĩre gatarũ-inĩ kao. Hihi mekũgera kũ na marorete kũ? Marathiĩ Bethisaida, macoke mathiĩ Kaperinaumu. No Jesu agathiĩ kĩrĩma-inĩ nĩguo akahoere kuo arĩ wiki ũtukũ ũcio.

Gũtigĩtie hanini gũkĩe o kũrĩ na ũtheri wa mweri, Jesu akona gatarũ ka arutwo ake karĩ o haraihu. Makũmbĩ ma iria marahũrithanio nĩ rũhuho rũnene, na arutwo ‘maragatwara na thĩna mũno.’ (Mariko 6:48) Jesu agaikũrũka kuuma kĩrĩma-inĩ, na akambĩrĩria gũthiĩra igũrũ rĩa maĩ erekeire na kũrĩa marĩ. Gũkinyĩria rĩu “mathiĩte mairo ta ithatũ kana inya.” (Johana 6:19) Arutwo makona Jesu ta arenda kũmahĩtũka, makoiga ũũ na mũgambo mũnene: “Kaĩ arĩ kĩoneki kĩa magegania?”​—Mariko 6:49.

Jesu akamomĩrĩria akameera: “Gĩai na hinya! Nĩ niĩ; tigai gwĩtigĩra.” No Petero akoiga: “Mwathani, angĩkorũo nĩwe, njĩĩra njũke ngereire maĩ igũrũ.” Jesu akamwĩra: “Ũka!” O rĩo, Petero akoima gatarũ-inĩ, agathiĩ agereire maĩ igũrũ erekeire kũrĩ Jesu. No arora makũmbĩ, Petero agetigĩra na akambĩrĩria kũrikĩra. Akanĩrĩra akoiga: “Mwathani, honokia!” Jesu agatambũrũkia guoko gwake narua, akanyita Petero na akamũũria ũũ: “Wee ũrĩ na wĩtĩkio mũnini, nĩ kĩĩ gĩatũma ũgĩe na nganja?”​—Mathayo 14:​27-31.

Petero na Jesu makaingĩra gatarũ-inĩ, na rũhuho rũkahorera. Arutwo makamaka, no hihi nĩ magĩrĩirũo nĩ kũmaka? Korũo nĩ mataũkĩirũo nĩ “ũhoro wa mĩgate,” kĩama kĩrĩa Jesu aringire mathaa maigana ũna mahĩtũku rĩrĩa aheire andũ ngiri nyingĩ irio, matingĩamaka kuona Jesu akĩgera igũrũ rĩa maĩ na kũhoreria rũhuho. Mona ũguo makamũinamĩrĩra makoiga: “Wee kũna ũrĩ Mũrũ wa Ngai.”​—Mariko 6:52; Mathayo 14:33.

Thutha wa kahinda magakinya kũndũ gũthaka na kũnoru gwĩtagwo Genesareti, mwena wa mũhuro wa Kaperinaumu. Makaiga gatarũ na makoimĩra maĩ-inĩ. Andũ a kũu makamenya Jesu, na marĩ hamwe na angĩ kuuma bũrũri ũrĩa ũrĩ hakuhĩ, makamũrehera arĩa arwaru. Acio arwaru mahutia tu gĩcũrĩ kĩa nguo ya Jesu makahona biũ.

Ihinda-inĩ o rĩu, kĩrĩndĩ kĩrĩa kĩreyoneire Jesu akĩhe andũ ngiri nyingĩ irio na njĩra ya kĩama, gĩkamenya atĩ Jesu nĩ arathire. Nĩ ũndũ ũcio, tũtarũ tũnini kuuma Tiberia twakinya, andũ makaingĩra na magathiĩ Kaperinaumu gwetha Jesu. Mamuona makamũũria ũũ: “Rabii, ũkinyire gũkũ rĩ?” (Johana 6:25) Arĩ na gĩtũmi kĩega, Jesu akamarũithia ta ũrĩa tũkuona.