Gĩkundi kĩnene gĩũkĩte kũrĩ Jesu gĩcigo-inĩ kĩa Dekapoli, mwena wa irathĩro wa Iria rĩa Galili. Mokĩte nĩguo mamũthikĩrĩrie na mahonio, na makuuĩte ikabu nene irĩ na indo iria mekũhũthĩra.

No thutha wa kahinda, Jesu akeera arutwo ake ũũ: “Nĩ ndĩraiguĩra andũ aya tha nĩ ũndũ makoretwo hamwe na niĩ thikũ ithatũ, na matirĩ na kĩndũ gĩa kũrĩa. Ingĩmeera mainũke marĩ ahũtu, nĩ mekũgwa njĩra-inĩ, nĩ gũkorũo amwe ao moimĩte kũndũ kũraya.” Arutwo makamũũria: “Gũkũ werũ-inĩ mũndũ angĩruta kũ mĩgate ya kũigana andũ aya?”​—Mariko 8:​2-4.

Jesu akamoria: “Mũrĩ na mĩgate ĩigana?” Arutwo makamũcokeria: “Mũgwanja, na tũthamaki tũigana ũna.” (Mathayo 15:34) Jesu agacoka akeera andũ maikare thĩ. Akoya mĩgate na thamaki, akahoya Ngai na akanengera arutwo ake magaĩre andũ. Ũndũ wa kũmakania nĩ atĩ, othe makarĩa makahũna. Mongania iria ciatigara, ikaihũra ikabu nene mũgwanja o na gũtuĩka ciarĩo nĩ arũme ta 4,000 o hamwe na atumia na ciana!

Thutha wa Jesu kuugĩra kĩrĩndĩ ũhoro, arĩ na arutwo ake magakĩra na gatarũ magathiĩ Magadani, mwena wa ithũĩro wa rũteere rwa Iria rĩa Galili. Makinya kũu, Afarisai marĩ hamwe na andũ amwe a gĩkundi kĩa Asadukai makageria Jesu, na njĩra ya kũmwĩra amaringĩre kĩama kiumĩte igũrũ.

Amenya kĩrĩa kĩratũma mamwĩre ũguo, Jesu akameera: “Gwakinya hwaĩ-inĩ, mugaga, ‘Gũgũkorũo na rĩera rĩega, tondũ igũrũ nĩ itune,’ na rũcinĩ mũkoiga, ‘Ũmũthĩ gũgũkorũo na heho na mbura, tondũ igũrũ nĩ itune ĩndĩ kũrĩ na matu.’ Nĩ mũhotaga gũtaarĩria ũrĩa rĩera rĩgũkorũo rĩhaana, no mũtihotaga gũkũũrana imenyithia cia mahinda.” (Mathayo 16:​2, 3) Jesu agacoka akeera Afarisai na Asadukai acio atĩ gũtirĩ kĩama mekũringĩrũo tiga kĩama kĩrĩa kĩa Jona.

Jesu hamwe na arutwo ake makaingĩra gatarũ merekeire Bethisaida mwena wa rũgongo wa iria. Marĩ rũgendo-inĩ, arutwo makamenya atĩ matinaririkana gũkuua mĩgate ya kũigana. Marĩ na mũgate ũmwe tu. O akĩririkanaga ũrĩa akorũo erana na Afarisai na Asadukai arĩa manyitaga Herode mbaru, Jesu akahe arutwo ake mũkaana ũyũ: “Ikaragai mwĩiguĩte na mwĩmenyagĩrĩre ndawa ya kũimbia ya Afarisai na ya Herode.” Arutwo makanyita ũrĩa gũtarĩ mageciria atĩ akĩgweta ndawa ya kũimbia araria ũhoro wao kũriganĩrũo nĩ gũkuua mĩgate. Amenya atĩ matinataũkĩrũo, akameera: “Nĩ kĩĩ kĩratũma mũkararanie nĩ ũndũ wa mĩgate?”​—Mariko 8:​15-17.

Jesu akorũo ahe andũ ngiri nyingĩ mĩgate. Kwoguo arutwo nĩ mabatiĩ kũmenya atĩ ndararia ũhoro wa mĩgate ya kũrĩa. Akamoria: “Hihi nĩ mũraririkana hĩndĩ ĩrĩa ndenyũrangĩire arũme arĩa ngiri ithano mĩgate ĩrĩa ĩtano, muonganirie ikabu cigana ciyũrĩte cienyũ?” Makamwĩra: “Ikũmi na igĩrĩ.” Jesu agathiĩ na mbere, akamoria:  “Ĩ rĩrĩa ndenyũrangĩire arũme arĩa ngiri inya mĩgate mũgwanja-rĩ, muonganirie ikabu cigana nene ciyũrĩte cienyũ?” Nao makoiga: “Mũgwanja.”​—Mariko 8:​18-20.

Jesu akamoria: “Nĩ kĩĩ kĩragiria mũtaũkĩrũo atĩ ndiraria ũhoro wa mĩgate?” Akongerera ũũ: “Wĩmenyererei ndawa ya kũimbia ya Afarisai na Asadukai.”​—Mathayo 16:11.

Rĩu arutwo magataũkĩrũo nĩ ũrĩa aroiga. Ndawa ya kũimbia ĩhũthagĩrũo nĩguo mũgate ũimbe. Jesu haha arahũthĩra ndawa ya kũimbia ĩkĩrũgamĩrĩra kĩndũ gĩa gũthũkia. Arahe arutwo ake mũkaana memenyerere “ũrutani wa Afarisai na Asadukai,” ũrĩa ũthũkagia.​—Mathayo 16:12.