Atũmwo arĩa 12 nĩ makeneire rũgendo rwa kũhunjia gĩcigo-inĩ kĩa Galili na makeera Jesu “maũndũ marĩa mothe meekĩte na makarutana.” Hatarĩ nganja nĩ anogu. Ĩndĩ matirĩ na mahinda nginya ma kũrĩa tondũ kũrĩ na andũ aingĩ maroka magĩthiaga. Nĩ ũndũ ũcio Jesu akameera: “Ũkai tũthiĩ handũ tũrĩ ithuiki tũkahurũke hanini.”​—Mariko 6:30, 31.

Makahaica gatarũ, hihi hakuhĩ na Kaperinaumu, merekeire kũndũ gũtarĩ na andũ aingĩ mwena wa irathĩro wa Rũĩ rwa Jorodani, haraihu hanini na Bethisaida. O na kũrĩ ũguo, andũ aingĩ makamona magĩthiĩ nao angĩ makamenya ũhoro ũcio. Othe magathiĩ mateng’ereire rũteere-inĩ rwa iria, na gatarũ gakiuga gakinye marĩ hau.

Jesu oima gatarũ, akona kĩrĩndĩ kĩu na akaringwo nĩ tha tondũ kĩhaana ta ng’ondu itarĩ na mũrĩithi. Nĩ ũndũ ũcio akambĩrĩria “kũmaruta maũndũ maingĩ” megiĩ Ũthamaki. (Mariko 6:34) Ningĩ akahonia ‘arĩa marabatara kũhonio.’ (Luka 9:11) O ũrĩa mahinda marathiĩ, arutwo makamwĩra: “Kũndũ gũkũ nĩ werũ-inĩ na mathaa nĩ mathiĩte mũno, ĩra andũ aya moimagare, nĩguo makegũrĩre irio matũũra-inĩ.”​—Mathayo 14:15.

Nake Jesu akamacokeria: “Matirabatara gũthiĩ, inyuĩ mahei kĩndũ gĩa kũrĩa.” (Mathayo 14:16) O na gũtuĩka Jesu nĩ oĩ ũndũ ũrĩa akiriĩ gwĩka, akageria Filipu na kĩũria gĩkĩ: “Tũkũgũra mĩgate kũ nĩguo andũ aya marĩe?” Filipu nĩwe mwagĩrĩru wa kũũrio kĩũria kĩu tondũ oimĩte hau hakuhĩ gĩcigo-inĩ kĩa Bethisaida. Ĩndĩ kũgũra mĩgate ti kuo kĩhonia. Kwĩna arũme ta 5,000. Na andũ othe mataranĩirio hamwe na atumia na ciana no makorũo marĩ maita merĩ ma ũguo! Filipu akoiga: “Mĩgate ya dinari magana merĩ [dinari ĩmwe nĩ mũcara wa mũthenya ũmwe] ndĩngĩmaigana o mũndũ na arĩ kenyũ kanini.”​—Johana 6:5-7.

Nake Andrea, hihi akĩenda kuonania atĩ gũtingĩhoteka kũmahe irio othe, akoiga: “Haha harĩ na kahĩĩ karĩ na mĩgate ĩtano ya cairi na tũthamaki twĩrĩ tũnini. No icio nĩ kĩĩ harĩ kĩrĩndĩ kĩnene ũũ?”​—Johana 6:9.

Nĩ kĩndũ mweri wa Machi kana Ĩpuro, mbere ya Pasaka ya mwaka wa 32, na kwĩna nyeki nduru karĩma-inĩ. Jesu akeera arutwo ake mere andũ maikare thĩ nyeki-inĩ marĩ ikundi cia andũ 50 na 100. Akoya mĩgate ĩyo ĩtano na thamaki igĩrĩ agacokeria Ngai ngatho. Agacoka akenyũranga mĩgate ĩyo na akagayania thamaki. Akanengera arutwo magaĩre andũ. Ũndũ wa kũgegania nĩ atĩ, andũ acio othe makarĩa makahũna!

Thutha ũcio Jesu akeera arutwo ake: “Cokanĩrĩriai cienyũ iria ciatigara, nĩguo hatikagĩe kĩndũ o na kĩmwe gĩkũũra.” (Johana 6:12) Makongania ciothe ikaiyũria ikabu 12!