Jesu akahe atũmwo ake motaaro mega mũno megiĩ ũrĩa mekũhunjia marĩ erĩ erĩ. No ndaratigĩra hau. Na njĩra ya wendo, akamamenyithia ũhoro wĩgiĩ ũkararia, akameera: “Atĩrĩrĩ, ndĩramũtũma mũtariĩ ta ng’ondu gatagatĩ-inĩ ka njũi . . . Mwĩmenyagĩrĩrei, tondũ andũ nĩ makamũtwara magooti-inĩ na mamũhũũrĩre thunagogi-inĩ ciao. Ningĩ nĩ mũgaatwarũo kũrĩ mangavana na athamaki nĩ ũndũ wa rĩĩtwa rĩakwa.”​—Mathayo 10:​16-18.

Arũmĩrĩri a Jesu kwahoteka nĩ megũcemania na mĩnyamaro mĩnene, ĩndĩ akamomĩrĩria ũũ: “No rĩrĩ, rĩrĩa makamũtwara, mũtikanatangĩke mũgĩĩciria ũrĩa mũkuuga, tondũ nĩ mũkaaheo ũrĩa mũkuuga o hĩndĩ ĩyo, nĩ gũkorũo ti inyuĩ mũgaakorũo mũkĩaria, no mũgaakorũo mũgĩteithio nĩ roho wa Ithe wanyu.” Jesu agathiĩ na mbere kuuga: “Ningĩ mũndũ nĩ akaaneana mũrũ wa nyina oragwo, kana aneane mwana wake, na ciana nĩ igookĩrĩra aciari na imaneane moragwo. Na nĩ mũgaathũũrũo nĩ andũ othe nĩ ũndũ wa rĩĩtwa rĩakwa, no ũrĩa ũgũkirĩrĩria o nginya mũico nĩwe ũkaahonokio.”​—Mathayo 10:​19-22.

Tondũ wĩra wa kũhunjia nĩ wa bata mũno, Jesu agatĩtĩrithĩria arũmĩrĩri ake bata wa kũhũthĩra ũtaũku nĩguo mahote gũthiĩ na mbere kũruta wĩra ũcio. Akoiga ũũ: “Mangĩkaamũnyarira itũũra-inĩ rĩmwe, ũrĩrai itũũra-inĩ rĩngĩ, tondũ ngũmwĩra atĩrĩ na ma, Mũrũ wa mũndũ agaakinya mũtarĩkĩtie kũhunjia matũũra mothe ma Isiraeli.”​—Mathayo 10:23.

Na githĩ macio ti motaaro, mĩkaana, na ciugo njega Jesu arahũthĩra kũũmĩrĩria atũmwo ake 12? O na kũrĩ ũguo, no wone atĩ ciugo icio irahũthĩka nginya harĩ arĩa makaaruta wĩra wa kũhunjia thutha wa Jesu gũkua na kũriũka. Ũndũ ũcio ũronanio nĩ ciugo icio arera arutwo ake atĩ nĩ ‘magaathũũrũo nĩ andũ othe,’ to arĩa tu atũmwo marathiĩ kũhunjĩria. Makĩria ma ũguo, gũtirĩ handũ tũthomaga atũmwo magĩtwarũo mbere ya mangavana na athamaki kana kũũragithio nĩ andũ a famĩlĩ ciao kahinda-inĩ kau kanini ga kambĩini ya kũhunjia Galili.

Hatarĩ nganja, Jesu areciria ũhoro wa mahinda mokĩte akĩĩra atũmwo ake maũndũ macio. Ta wĩcirie ũhoro wa ciugo ciake atĩ arutwo ake matikaarĩkia kũhunjia matũũra mothe ‘Mũrũ wa mũndũ atakinyĩte.’ Jesu aronania atĩ arutwo ake matigakorũo marĩkĩtie kũhunjia ũhoro wa Ũthamaki wa Ngai mbere ya Mũthamaki Jesu Kristo ũrĩa ũrĩ na riri okĩte arĩ mũtuanĩri cira wamũrĩtwo nĩ Ngai.

Makĩruta wĩra wa kũhunjia, atũmwo matibatiĩ kũmaka mokĩrĩrũo, tondũ wa ciugo ici cia  Jesu: “Mũrutwo ndakoragwo arĩ mũnene kũrĩ mũrutani.” Ũndũ ũrĩa Jesu aroiga nĩ ũranyitĩka wega. Nĩ acemanagia na moritũ na akanyarirũo nĩ ũndũ wa kũhunjia Ũthamaki wa Ngai, kwoguo o nao no megũcemania na maũndũ macio. Ĩndĩ Jesu akameera ũũ: “Mũtigetigagĩre arĩa moragaga mwĩrĩ no matingĩhota kũũraga muoyo; ithenya rĩa ũguo, wĩtigagĩrei ũrĩa ũngĩhota kũũraga muoyo na mwĩrĩ thĩinĩ wa Jehanamu.”​—Mathayo 10:​24, 28.

Ũndũ-inĩ ũcio, Jesu nĩ aigĩte kĩonereria. Omĩrĩirie gĩkuũ ategwĩtigĩra, handũ ha gũtiganĩria wĩhokeku wake harĩ Jehova, mwene hinya wothe. Ngai Mwene Hinya Wothe nowe ũngĩniina “muoyo” wa mũndũ (kĩĩrĩgĩrĩro gĩake kĩa ũtũũro wa mahinda mokĩte) kana amũriũkie nĩguo akenere muoyo wa tene na tene. Ũndũ ũcio nĩ wa kũũmĩrĩria mũno harĩ atũmwo!

Jesu akahũthĩra ngerekano ĩno kuonania ũrĩa Ngai arũmbũyagia arũmĩrĩri ake na njĩra ya wendo: “Githĩ tũnyoni twĩrĩ tũtiendagio gathendi kamwe ga thogora mũnini? Ĩndĩ gũtirĩ o na kamwe ga tuo kangĩgwa thĩ na Ithe wanyu age kũmenya. . . . Kwoguo-rĩ, mũtigetigĩre; inyuĩ mũrĩ a bata gũkĩra tũnyoni tũingĩ.”​—Mathayo 10:29, 31.

Ndũmĩrĩri ĩrĩa arutwo a Jesu marahunjia nĩ ĩkũgayania mĩciĩ, andũ amwe a famĩlĩ nĩ mekũmĩtĩkĩra na arĩa angĩ mamĩrege. Jesu agataarĩria ũũ: “Mũtigecirie atĩ ndokire kũrehe thayũ thĩinĩ wa thĩ.” Nĩ habataranagia ũcamba harĩ mũndũ wa famĩlĩ gwĩtĩkĩra ma ya Bibilia. Jesu akoiga ũũ: “Mũndũ ũrĩa wendete ithe kana nyina kũngĩra ndagĩrĩire gũtuĩka mũrutwo wakwa, na ũrĩa wendete mũriũ kana mwarĩ kũngĩra ndagĩrĩire gũtuĩka mũrutwo wakwa.”​—Mathayo 10:34, 37.

Ĩndĩ amwe nĩ mekwamũkĩra arutwo ake na njĩra njega. Akoiga ũũ: “Mũndũ wothe ũheaga ũmwe wa aya anyinyi gĩkombe kĩa maĩ tu anyue tondũ nĩ mũrutwo wakwa, ngũmwĩra na ma atĩrĩ: Nĩ akaaheo kĩheo gĩake.”​—Mathayo 10:42.

Thutha wa kũhaarĩrio wega nĩ Jesu kũgerera motaaro, mĩkaana, na gwĩkĩrũo ngoro, atũmwo magathiĩ “gĩcigo-inĩ kĩu kuuma gĩcagi kĩmwe nginya kĩrĩa kĩngĩ, makĩhunjagia ũhoro ũrĩa mwega kũndũ guothe makĩhonanagia.”​—Luka 9:6.