Jesu arĩ thĩinĩ wa thunagogi taũni-inĩ ya Kaperinaumu, akĩrutana ũhoro wĩgiĩ we gũkorũo arĩ mũgate ũrĩa wa ma kuuma igũrũ. Ciugo ciake igatĩtĩrithia iria eerĩte andũ arĩa maacokete kuuma mwena wa irathĩro wa Iria rĩa Galili, arĩa maarĩte mĩgate na thamaki iria ciaheanĩtwo kuo.

Jesu agatwarithia ũhoro ũcio na mbere akoiga: “Maithe manyu ma tene maarĩire mana werũ-inĩ ĩndĩ nĩ maakuire.” Agataarĩria ngũrani yake na mana akoiga: “Nĩ niĩ mũgate ũrĩa ũrĩ muoyo waikũrũkire kuuma igũrũ. Mũndũ o wothe angĩrĩa mũgate ũyũ egũtũũra tene na tene; na ũrĩa kũrĩ nĩ atĩ, mũgate ũrĩa ngũheana nĩ mwĩrĩ wakwa nĩ ũndũ wa muoyo wa andũ.”​—Johana 6:​48-51.

Kĩambĩrĩria-inĩ kĩa mwaka wa 30, Jesu eerĩte Nikodemo atĩ Ngai nĩ eendire kĩrĩndĩ gĩa thĩ mũno nginya akĩruta Mũrũ wake atuĩke Mũhonokia. Jesu rĩu aratĩtĩrithia bata wa andũ kũrĩa mwĩrĩ wake na njĩra ya kuonania wĩtĩkio harĩ igongona rĩrĩa akiriĩ kũruta. Ũguo nĩguo mũndũ agĩrĩirũo gwĩka nĩguo akona muoyo wa tene na tene.

O na kũrĩ ũguo, andũ makaregana na ciugo cia Jesu. Makoria: “Mũndũ ũyũ angĩtũhe atĩa mwĩrĩ wake tũrĩe?” (Johana 6:52) Jesu arenda mataũkĩrũo atĩ araria na njĩra ya ngerekano. Ciugo iria aracoka kũgweta ikonania ũndũ ũcio.

Akoiga: “Mũngĩaga kũrĩa mwĩrĩ wa Mũrũ wa mũndũ na kũnyua thakame yake, mũtingĩgĩa na muoyo thĩinĩ wanyu. Mũndũ o wothe ũrĩaga mwĩrĩ wakwa na akanyua thakame yakwa, arĩ na muoyo wa tene na tene, . . . nĩ gũkorũo mwĩrĩ wakwa nĩ irio cia ma na thakame yakwa nĩ kĩndũ kĩa ma gĩa kũnyuo. Mũndũ o wothe ũrĩaga mwĩrĩ wakwa na akanyua thakame yakwa atũũraga arĩ na ũiguano na niĩ.”​—Johana 6:​53-56.

Ta wĩcirie ũrĩa ciugo icio ingĩkorũo ciarakaria Ayahudi arĩa marathikĩrĩria! No gũkorũo mareciria Jesu arameera marĩe mwĩrĩ wa mũndũ kana magarare watho wa Ngai ũrĩa ũgirĩtie kũrĩa thakame. (Kĩambĩrĩria 9:4; Maũndũ ma Alawii 17:10, 11) Ĩndĩ Jesu araria ũhoro wa kũrĩa mwĩrĩ na kũnyua thakame na njĩra ya ngerekano. Arenda kuonania atĩ arĩa othe mangĩenda gũkona muoyo wa tene na tene, no mũhaka monanie wĩtĩkio harĩ igongona rĩrĩa akiriĩ kũheana na njĩra ya kũruta mwĩrĩ wake mũkinyanĩru na gũita thakame yake. O na kũrĩ ũguo, nginya arutwo ake aingĩ matirataũkĩrũo nĩ ũrutani ũcio. Amwe makoiga: “Ũhoro ũcio nĩ wa kũmakania; nũ ũngĩũthikĩrĩria?”​—Johana 6:60.

Nĩ ũndũ wa kũmenya atĩ arutwo ake amwe nĩ marang’ung’ua, Jesu akoria: “Kaĩ ũhoro ũcio ũramũhĩnga? Ĩ mũngĩkĩona Mũrũ wa mũndũ akĩambata athiĩte kũrĩa aatũũraga tene? . . . Maũndũ marĩa ndĩmwĩrĩte-rĩ, macio nĩ roho na nĩ muoyo. No nĩ harĩ na amwe anyu matetĩkagia.” Maigua ũguo, arutwo aingĩ magathiĩ na magatiga kũmũrũmĩrĩra.​—Johana 6:​61-64.

Nĩ ũndũ ũcio Jesu akoria arutwo ake 12 atĩrĩ: “O na inyuĩ nĩ mũkwenda gũthiĩ?” Petero akamũcokeria akoiga: “Mwathani, tũgũgĩthiĩ kũrĩ ũ? Wee ũrĩ na ciugo cia muoyo wa tene na tene. Nĩ twĩtĩkĩtie na tũkamenya atĩ wee nĩwe Ũrĩa Mũtheru wa Ngai.” (Johana 6:​67-69) Ciugo icio ikonania wĩhokeku mũnene o na gũtuĩka gũkinyĩria rĩu Petero na atũmwo arĩa angĩ matitaũkĩirũo biũ nĩ ũrĩa Jesu arenda kũrutana.

Jesu agakenio nĩ macokio ma Petero na akoiga: “Githĩ ti niĩ ndaamũthuurire inyuĩ ikũmi na erĩ? No ũmwe wanyu nĩ mũcukani.” (Johana 6:70) Araria ũhoro wa Judasi Mũisikariota. No kũhoteke rĩu Jesu nĩ arona atĩ Judasi nĩ ambĩrĩirie kũrũmĩrĩra merirĩria make moru.

O na kũrĩ ũguo, Jesu nĩ araigua aiganĩire nĩ kũmenya atĩ Petero na atũmwo arĩa angĩ no marenda kũmũrũmĩrĩra na kũruta wĩra ũrĩa araruta wa kũhonokia mĩoyo ya andũ.