Ũkoretwo ũrĩ mũthenya wĩna mĩhang’o mĩingĩ harĩ Jesu. Thutha wa rũgendo rwa kuuma Dekapoli, nĩ ahonirie mũtumia uuma na mũrimũ wa kuura thakame na ariũkia kairĩtu ka Jairo. No mũthenya ndũrĩ ũrathira. Jesu oima mũciĩ kwa Jairo, arũme erĩ atumumu makamũrũmĩrĩra makĩanagĩrĩra ũũ: “Tũiguĩre tha, Mũrũ wa Daudi.”​—Mathayo 9:27.

Magĩta Jesu “Mũrũ wa Daudi,” arũme acio maronania nĩ metĩkĩtie atĩ Jesu nĩwe ũgaĩte gĩtĩ kĩa ũthamaki kĩa Daudi na kwoguo nĩwe Mesia. Jesu akahaana ta ataratindanĩra nao, hihi akĩenda kuona kana nĩ megũtiga kũmwanĩrĩra, no makaaga gũtiga. Jesu aingĩra nyũmba, arũme acio erĩ makamũrũmĩrĩra. Akamoria ũũ: “Hihi mũrĩ na wĩtĩkio atĩ no hote kũmũhonia?” Makamũcokeria ũũ matarĩ na nganja: “Ĩĩ, tũrĩ na wĩtĩkio Mwathani.” Jesu akamahutia maitho na akameera: “O ta ũrĩa muonania wĩtĩkio, reke gũtuĩke o ũguo.”​—Mathayo 9:28, 29.

O rĩmwe makambĩrĩria kuona! O ta ũrĩa akoretwo akĩra angĩ hau kabere, Jesu akameera matigathiĩ kuuga ũrĩa eka. No maiyũrĩtwo nĩ gĩkeno, makaheana ũhoro wake kũndũ guothe.

O rĩrĩa arũme acio erĩ maroima mathiĩ, andũ makarehe mũndũ ũtarahota kwaria tondũ arĩ na ndaimono. Jesu akaruta ndaimono ĩyo, na o rĩo mũndũ ũcio akambĩrĩria kwaria. Kĩrĩndĩ gĩkagegio nĩ ũndũ ũcio gĩkoiga: “Ũndũ ta ũyũ ndũrĩ woneka Isiraeli.” Afarisai o nao marĩ ho. Matingĩhota gũkaana ciama icio, kwoguo magacokera ũrĩa moigĩte igũrũ rĩgiĩ kĩhumo kĩa hinya wa Jesu wa kũringa ciama, makoiga: “Aingataga ndaimono na hinya wa mũnene wa ndaimono.”​—Mathayo 9:33, 34.

Kahinda kanini thutha ũcio, Jesu agacoka itũũra rĩa kwao mũciĩ Nazarethi, riita rĩrĩ arĩ hamwe na arutwo ake. Kĩndũ ta mwaka ũmwe mũhĩtũku, nĩ aarutanire thĩinĩ wa thunagogi kũu. Kĩambĩrĩria-inĩ andũ makĩmakio nĩ ũrĩa oigire, no magĩcoka makĩrakario nĩ morutani make na makĩgeria kũmũũraga. Rĩu Jesu akageria o rĩngĩ kũmateithia.

Mũthenya wa Thabatũ, agacoka thunagogi-inĩ kũrutana. Aingĩ makamaka nginya makoria ũũ: “Mũndũ ũyũ arutĩte kũ ũũgĩ ũyũ na nũ wamũheire ũhoti wa gwĩka maũndũ maya manene?” Makoiga: “Githĩ ũyũ ti mũrũ wa bundi ũrĩa wa mbaũ? Githĩ nyina ti Mariamu? Na githĩ ariũ a nyina ti Jakubu na Jusufu na Simoni na Judasi? Nao aarĩ a nyina githĩ othe matiikaraga o gũkũ hamwe na ithuĩ? Hakĩrĩ ũguo-rĩ, mũndũ ũyũ arutĩte kũ maũndũ maya mothe?”​—Mathayo 13:​54-56.

Andũ marona Jesu arĩ mũndũ wa itũũra o ta arĩa angĩ. Makeĩra ũũ: ‘Agĩkũra no tũramuona, angĩgĩtuĩka atĩa nĩwe Mesia?’ Nĩ ũndũ ũcio, o na kũrĩ na ũira mũingĩ ũguo, hamwe na ũũgĩ mũingĩ wa Jesu na mawĩra make ma hinya, makaaga kũmwĩtĩkĩra. Nĩ ũndũ wa gũkorũo moĩ Jesu, nginya andũ a mbarĩ ciao makahĩngĩka nĩwe, magatũma Jesu oige ũũ: “Mũnabii ndaimagwo gĩtĩo tiga o itũũra-inĩ rĩa kwao na gwake mũciĩ.”​—Mathayo 13:57.

Hatarĩ nganja, Jesu nĩ mũmaku nĩ ũndũ wao kwaga wĩtĩkio. Nĩ ũndũ ũcio akaaga kũringa ciama kũu tiga ‘kũigĩrĩra andũ maigana ũna moko arĩa arwaru na kũmahonia.’​—Mariko 6:​5, 6.