Jesu nĩ aaheire andũ ngiri nyingĩ irio na njĩra ya kĩama arĩ mwena wa irathĩro wa Iria rĩa Galili, agĩcoka akĩũra amenya atĩ meendaga kũmũtua mũthamaki. Ũtukũ ũcio nĩ aagereire igũrũ rĩa maĩ kwĩ na kĩhuhũkanio iria-inĩ na akĩhonokia Petero, ũrĩa o nake wagereire igũrũ rĩa maĩ no akĩambĩrĩria kũrikĩra anyihia wĩtĩkio. Jesu ningĩ nĩ aahoreririe rũhuho, na ũndũ ũcio hihi ũgĩtũma arutwo ake matigathũkĩrũo nĩ gatarũ.

Rĩu Jesu agacoka mwena wa ithũĩro wa iria, gĩcigo-inĩ gĩa Kaperinaumu. Andũ arĩa aaheire irio na njĩra ya kĩama makamuona makamũũria: “Ũkinyire gũkũ rĩ?” Jesu akamarũithia, akameera atĩ maramwetha makĩĩrĩgĩrĩra nĩ ekũmahe irio rĩngĩ. Akameera ‘matikarutagĩre wĩra irio iria ithũkaga, ĩndĩ marutagĩre wĩra irio iria itũũraga nĩ ũndũ wa muoyo wa tene na tene.’ Nĩ ũndũ ũcio makamũũria atĩrĩ: “Twagĩrĩirũo gwĩka atĩa nĩguo tũrute mawĩra ma Ngai?”​—Johana 6:​25-28.

No kũhoteke mareciria ũhoro wa maũndũ marĩa monanĩtio Watho-inĩ, no Jesu akagweta wĩra ũrĩa wa bata makĩria: “Ũyũ nĩguo wĩra wa Ngai, atĩ muonanie wĩtĩkio harĩ ũrĩa aatũmire.” No andũ acio matirĩ na wĩtĩkio ta ũcio harĩ Jesu, o na gũtuĩka nĩ ekĩte maũndũ maingĩ. Makamwĩra aringe kĩama nĩguo mamwĩtĩkie. Makamũũria: “Nĩ ũndũ ũrĩkũ ũgwĩka? Maithe maitũ ma tene maarĩire mana werũ-inĩ, o ta ũrĩa kwandĩkĩtwo atĩrĩ: ‘Nĩ aamaheire mũgate wa kuuma igũrũ marĩe.’”​—Johana 6:​29-31; Thaburi 78:24.

Ũhoro-inĩ wĩgiĩ kĩama kĩu maramwĩra aringe, Jesu akerekeria meciria mao harĩ ũrĩa Kĩhumo gĩa ciama icio akameera: “Ngũmwĩra atĩrĩ na ma, Musa ndaamũheire mũgate kuuma igũrũ, ĩndĩ Awa amũheaga mũgate ũrĩa wa ma kuuma igũrũ. Tondũ mũgate wa Ngai nĩ mũndũ ũrĩa uumaga igũrũ kũhe kĩrĩndĩ muoyo.” Tondũ matiranyita ũrĩa arenda kuuga, makamũthaitha makamwĩra: “Mwathani, tũheage mũgate ũcio hingo ciothe.” (Johana 6:​32-34) No hihi Jesu araria ũhoro wa “mũgate” ũrĩkũ?

Agataarĩria ũũ: “Nĩ niĩ mũgate wa muoyo. Mũndũ o wothe ũũkaga kũrĩ niĩ ndarĩ hĩndĩ akaahũta, nake ũrĩa wothe wonanagia wĩtĩkio harĩ niĩ ndarĩ hĩndĩ akaanyota. No o ta ũrĩa ndamwĩra, o na nĩ mũnyonete ĩndĩ mũtirĩ mũretĩkia. . . . Ndiumĩte igũrũ gwĩka wendi wakwa niĩ mwene, ĩndĩ nĩ gwĩka wendi wa ũrĩa wandũmire. Ũyũ nĩguo wendi wa ũrĩa wandũmire, atĩ hatikagĩe mũndũ o na ũmwe ũkũũra harĩ arĩa othe aheete, no atĩ ngaamariũkia mũthenya wa mũthia. Nĩ gũkorũo ũyũ nĩguo wendi wa Awa, atĩ mũndũ o wothe ũkũũranaga Mũriũ na akonania wĩtĩkio harĩ we agĩe na muoyo wa tene na tene.”​—Johana 6:​35-40.

Ũndũ ũcio ũgatũma marakare mũno, na Ayahudi makambĩrĩria kũng’ung’ua nĩ ũndũ wake. Nĩ kĩĩ kĩratũma oige atĩ nĩwe “mũgate ũrĩa waikũrũkire kuuma igũrũ”? (Johana 6:41) O maramuona ahaana andũ arĩa angĩ, aciarĩtwo nĩ aciari kuuma Galili, taũni-inĩ ya Nazarethi. Makoria ũũ: “Githĩ ũyũ ti Jesu mũrũ wa Jusufu, na ithe na nyina githĩ tũtimoĩ?”​—Johana 6:42.

Jesu akamacokeria akameera: “Tigai kũng’ung’ua. Gũtirĩ mũndũ ũngĩũka kũrĩ niĩ atagucĩrĩirio nĩ Awa ũrĩa wandũmire na nĩ ngaamũriũkia mũthenya wa mũthia. Nĩ kwandĩke ũũ mabuku-inĩ ma anabii: ‘Andũ othe nĩ makaarutwo nĩ Jehova.’ Mũndũ o wothe ũthikĩrĩirie Awa na akeruta nĩ okaga kũrĩ niĩ. Ti atĩ nĩ kũrĩ mũndũ wonete Awa, tiga o ũrĩa uumĩte kũrĩ Ngai; ũcio nĩ onete Awa. Ngũmwĩra atĩrĩ o ma o ma, mũndũ o wothe wĩtĩkagia, arĩ na muoyo wa tene na tene.”​—Johana 6:43-47; Isaia 54:13.

Rĩrĩa aaragia na Nikodemo hau kabere, Jesu nĩ aagwetire muoyo wa tene na tene na akĩonania nĩ ũkonainie na gwĩtĩkia Mũrũ wa mũndũ, akiuga:  ‘Mũndũ o wothe ũrĩonanagia wĩtĩkio harĩ Mũrũ wa Ngai wa mũmwe ndakaniinwo no akaagĩa na muoyo wa tene na tene.’ (Johana 3:​15, 16) No rĩu araria na andũ aingĩ, akameera atĩ arĩ na itemi ũhoro-inĩ wĩgiĩ o kũheo muoyo wa tene na tene, ũrĩa ũtangiumana na mana kana mĩgate ĩrĩa moĩ itũũra-inĩ rĩao rĩa Galili. Nĩ ũndũ ũcio-rĩ, mangĩona muoyo wa tene na tene na njĩra ĩrĩkũ? Jesu agacokera ciugo ciake akameera: “Nĩ niĩ mũgate wa muoyo.”​—Johana 6:48.

Ũhoro ũcio wĩgiĩ mũgate kuuma igũrũ ũgathiĩ na mbere, na ũkaarĩrĩrio na njĩra nene Jesu akĩrutana thĩinĩ wa thunagogi itũũra-inĩ rĩa Kaperinaumu.