Thutha wa Mahunjio make Kĩrĩma-inĩ, Jesu agathiĩ itũũra rĩa Kaperinaumu. Arĩ kũu athuri amwe Ayahudi magoka kũrĩ we. Matũmĩtwo nĩ mũndũ ũtarĩ Mũyahudi, mũthigari Mũroma, mũnene wa thigari igana.

Ndungata ya mũthigari ũcio nĩ ndwaru mũno na ĩkiriĩ gũkua. Mũthigari ũcio arenda Jesu amũteithie, o na gũtuĩka we ti Mũyahudi. Ayahudi acio makeera Jesu atĩ ndungata ya mũndũ ũcio “ĩrĩ nyũmba ĩkomete nĩ kũrwara mũrimũ wa gũkua ciĩga, na nĩ ĩranyamarĩka mũno,” hihi nĩ ũndũ wa ruo rũnene. (Mathayo 8:6) Athuri acio makeera Jesu atĩ mũthigari ũcio nĩ agĩrĩire gwĩkĩrũo ũndũ ũcio nĩwe, makoiga: ‘Nĩ endete rũrĩrĩ rwao na nĩwe waakire thunagogi yao.’​—Luka 7:​4, 5.

Thutha wa kahinda Jesu akoimagara hamwe na athuri acio marorete mũciĩ kwa mũthigari ũcio. Makuhĩrĩria, mũthigari ũcio agatũma arata makeere Jesu ũũ: “Mwathi wakwa, ndũgethĩnie, tondũ niĩ ndirĩ mwagĩrĩru wa gũkũnyita ũgeni gwakwa. Nĩkĩo nyonire ndiagĩrĩire gũka kũrĩ wee.” (Luka 7:​6, 7) Icio nĩ ciugo cia wĩnyihia mũno ciarĩtio nĩ mũndũ ũmenyerete kũheana mawatho! Na ironania ũrĩa mũndũ ũcio arĩ ngũrani na Aroma arĩa angĩ arĩa mahinyagĩrĩria ngombo ciao.​—Mathayo 8:9.

Mũthigari ũcio hatarĩ nganja nĩ aramenya atĩ Ayahudi nĩ methemaga kũnyitanĩra na andũ matarĩ Ayahudi. (Atũmwo 10:28) Hihi arĩ na ũndũ ũcio meciria-inĩ, akeera arata acio ake mere Jesu ũũ: “Gweta o kiugo kĩmwe, na ndungata yakwa nĩ ĩkũhona.”​—Luka 7:7.

Jesu akagegio nĩ ũhoro ũcio akoiga: “Ngũmwĩra atĩrĩ, ndirĩ ndona wĩtĩkio mũnene ta ũcio o na thĩinĩ wa Isiraeli.” (Luka 7:9) Arata a mũthigari ũcio macoka gwake mũciĩ, magakora atĩ ndungata ĩrĩa yuma ndwaru mũno nĩ ĩhonete.

Jesu arĩkia kũhonia ndungata ĩyo, akahũthĩra ũndũ ũcio kuonania atĩ andũ matarĩ Ayahudi arĩa monanagia wĩtĩkio nĩ makaarathimwo, akoiga ũũ: “Andũ aingĩ a kuuma mwena wa irathĩro na ithũĩro nĩ magooka na maikare metha-inĩ ĩmwe na Iburahimu na Isaaka na Jakubu Ũthamaki-inĩ wa igũrũ.” Ĩ nao Ayahudi arĩa matetĩkĩtie? Jesu akoiga atĩ “magaaikio nja nduma-inĩ. Kũu nĩkuo makaarĩragĩra na makahagarania magego.”​—Mathayo 8:11, 12.

Kwoguo Ayahudi arĩa maregaga mweke ũrĩa mbere waheanĩtwo kũrĩ o wa gũkorũo Ũthamaki-inĩ hamwe na Kristo nĩ makaaregwo. No arĩa matarĩ Ayahudi nĩ makaaheo mweke wa gũkorũo metha-inĩ yake “Ũthamaki-inĩ wa igũrũ.”