Hatarĩ nganja nĩ ũkenaga kũigua ũhoro mwega. Na kũrĩ na ũhoro mwega ũrĩa wee na andũ arĩa wendete mũngĩkenera kũigua.

Ũhoro ũcio mwega ũrĩ thĩinĩ wa Bibilia, ibuku rĩrĩa Jehova Ngai, Mũũmbi wa igũrũ na thĩ, aandĩkithirie mĩaka mĩingĩ mĩhĩtũku. Ibuku-inĩ rĩrĩ, tũkwarĩrĩria mabuku mana ma Bibilia marĩa makoragwo na ũhoro mwega mũno harĩ andũ othe. Mabuku macio metanĩtio na andũ arĩa Ngai aahũthĩrire kũmaandĩka, nĩo Mathayo, Mariko, Luka, na Johana.

Andũ aingĩ metaga mabuku macio Injiri iria inya. Mothe mana maheanĩte injiri, kana ũhoro mwega wĩgiĩ Jesu atĩ nĩwe Ngai ahũthagĩra kũhonokania na atĩ arĩ Mũthamaki wa Ũthamaki wa Ngai kũrĩa igũrũ, Jesu nĩ akaarehera arĩa othe mamwĩtĩkagia irathimo cia gũtũũra.​—Mariko 10:​17, 30; 13:13.

No gũkorũo nĩ wĩyũragia kĩrĩa gĩatũmire Ngai andĩkithie mabuku mana marĩrĩirie ũtũũro na ũrutani wa Jesu.

Gũkorũo na mabuku macio mana marĩrĩirie ũrĩa Jesu oigire na agĩka nĩ kũrĩ ũguni. Kwa ngerekano-rĩ, ta tua atĩ andũ ana marũgamĩte hakuhĩ na mũrutani ũmwe ũrĩ igweta. Ũrĩa ũrũgamĩte mbere ya mũrutani ũcio arutaga wĩra wabici-inĩ ya kũrĩhia igooti. Ũrĩa ũrũgamĩte mwena wa ũrĩo nĩ ndagĩtarĩ. Nake ũrĩa ũrathikĩrĩria arĩ mwena wa ũmotho nĩ mũtegi wa thamaki na nĩ mũrata mũnene wa mũrutani ũcio. Nake mũndũ wa kana ũrĩa ũrũgamĩte thutha wa mũrutani nĩ mwĩroreri na nĩ mwĩthĩ akĩringithanio na acio angĩ. Othe ana nĩ andũ ehokeku, na o ũmwe arakenio na agathingata ũndũ ngũrani. O ũmwe wao angĩandĩka maũndũ marĩa mũrutani ũcio aroiga na ageka, ũhoro wao marĩ ana ũgũkorũo ũtaarĩirie maũndũ ngũrani. Twathuthuria ũhoro wao marĩ ana, o tũkĩririkanaga atĩ o mũndũ arĩ na muonere ngũrani, no tũgĩe na mbica ĩ yothe ya maũndũ marĩa moigirũo na mekwo nĩ mũrutani. Ũndũ ũcio ũronania ũrĩa tũgunĩkaga nĩ ũndũ wa gũkorũo na mabuku mana marĩrĩirie ũtũũro wa Jesu, Mũrutani Ũrĩa Mũnene.

Tũgĩcoka ngerekano-inĩ ĩyo, mũrĩhia ũcio wa igooti arenda kũgucĩrĩria Ayahudi, kwoguo akandĩka  ũhoro wake na njĩra ĩgũteithia Ayahudi. Nake ndagĩtarĩ akandĩka ũhoro wĩgiĩ kũhonio kwa andũ arĩa arwaru kana cionje, kwoguo akaga kwandĩka maũndũ mamwe mandĩkirũo nĩ mũrĩhia wa igooti kana akamabanga na njĩra ngũrani. Mũrata ũcio mũnene wa mũrutani nake akandĩka ũhoro wĩgiĩ ngumo cia mũrutani. Nake mũndũ ũcio mwĩthĩ akandĩka ũhoro mũkuhĩ na wa ĩmwe kwa ĩmwe. O na kũrĩ ũguo, ũhoro wao othe ndũrĩ na mahĩtia. Ũguo noguo mabuku macio mothe mana megiĩ ũtũũro wa Jesu matũteithagia gũtaũkĩrũo wega nĩ ciĩko, morutani, na ngumo ciake.

Andũ mamenyerete kuuga ‘Injiri ya Mathayo’ kana ‘Injiri ya Johana.’ Matikoragwo mahĩtĩtie, tondũ o rĩmwe rĩa mabuku macio rĩkoragwo na “ũhoro ũrĩa mwega wĩgiĩ Jesu Kristo.” (Mariko 1:1) O na kũrĩ ũguo, tũngĩrora na njĩra njarariĩ, mabuku macio mana makoragwo na injiri ĩmwe tu, kana ũhoro mwega wĩgiĩ Jesu.

Andũ aingĩ arĩa mathomeire ũhoro wĩgiĩ Kiugo kĩa Ngai manaringithania maũndũ marĩa marĩ thĩinĩ wa Mathayo, Mariko, Luka, na Johana na makabanga ũrĩa marũmanĩrĩire. Hakuhĩ mwaka-inĩ wa 170 thutha wa Kristo, mwandĩki Mũsiria wetagwo Tatian nĩ aageririe gwĩka ũguo. Nĩ eetĩkĩtie atĩ mabuku macio mana maandĩkirũo kũgerera roho wa Ngai na matirĩ mahĩtia, na akĩandĩka ibuku rĩtagwo Diatessaron, rĩringithanĩtie na rĩkabanga ũhoro wĩgiĩ ũtũũro na ũtungata wa Jesu.

Ũguo noguo ibuku rĩrĩ rĩa Jesu Nĩwe Njĩra, Ma, na Muoyo rĩĩkĩte, o na gũtuĩka rĩo rĩrĩ na ũhoro mũingĩ na ũngĩĩhokeka makĩria. Ũndũ ũcio ũhotekete tondũ rĩu nĩ tũtaũkĩirũo wega makĩria kũhinga kwa morathi maingĩ na ngerekano cia Jesu. Ũtaũku ũcio nĩ ũteithĩtie harĩ gũthererũo nĩ maũndũ marĩa oigire na agĩka, o hamwe na ũrĩa maarũmanĩrĩire. Indo cia tene iria ithikũrĩtio o nacio nĩ iteithĩtie gũtaũkĩrũo nĩ maũndũ mamwe na ũhoro wĩgiĩ muonere wa andĩki. Ũrĩa kũrĩ nĩ atĩ, gũtirĩ mũndũ ũngĩkorũo na ma biũ igũrũ rĩgiĩ ũrĩa maũndũ macio maarũmanĩrĩire. Ĩndĩ ibuku rĩrĩ rĩa Jesu Nĩwe Njĩra, Ma, na Muoyo nĩ rĩgeretie biũ gũtaarĩria maũndũ macio na njĩra njega na ĩtarĩ na nganja.

Ũgĩthoma ibuku rĩrĩ, ririkana ũhoro ũrĩa rĩrĩ naguo wa bata harĩ wee na arĩa wendete. Ririkana atĩ Jesu Kristo we mwene eerire mũtũmwo Toma ũũ: “Nĩ niĩ njĩra na nĩ niĩ ũhoro ũrĩa wa ma na nĩ niĩ muoyo. Gũtirĩ mũndũ ũkaga harĩ Awa atagereire harĩ niĩ.”​—Johana 14:6.

Ibuku rĩrĩ rĩa Jesu Nĩwe Njĩra, Ma, na Muoyo nĩ rĩgũgũteithia kuona na ma atĩ Jesu nĩwe “njĩra.” Nĩ kũgerera harĩ we tu tũhotaga gũkuhĩrĩria Jehova Ngai na njĩra ya mahoya. Ningĩ Jesu nĩwe njĩra ya gũtũiguithania na Ngai. (Johana 16:23; Aroma 5:8) Kwoguo nĩ kũgerera harĩ we tu tũhotaga kũgĩa na ũrata mwega na Ngai.

Jesu nĩwe “ũhoro ũrĩa wa ma.” Maũndũ marĩa aaragia na ageka maatwaranaga na ũhoro wa ma. Nĩ aahingirie morathi maingĩ, marĩa maatuĩkire “‘ĩĩ’ kũgerera harĩ we.” (2 Akorintho 1:20; Johana 1:14) Morathi ta macio nĩ matũteithagia kuona itemi inene rĩrĩa akoragwo narĩo harĩ kũhingia muoroto wa Ngai.​—Kũguũrĩrio 19:10.

Ningĩ Jesu Kristo nĩwe “muoyo.” Kũgerera igongona rĩa ũkũũri, rĩrĩa aarutire muoyo wake mũkinyanĩru na agĩita thakame, nĩ aatũmire kũhoteke tũkona “muoyo ũrĩa wa ma,” nĩguo “muoyo wa tene na tene.” (1 Timotheo 6:​12, 19; Aefeso 1:7; 1 Johana 1:7) Ningĩ nĩ agaatuĩka “muoyo” harĩ andũ milioni nyingĩ arĩa manakua no nĩ makaariũkio marĩ na kĩĩrĩgĩrĩro gĩa gũtũũra Paradiso tene na tene.​—Johana 5:​28, 29.

Ithuothe nĩ tũbatiĩ gũtaũkĩrũo na kuoya na ũritũ itemi rĩa Jesu harĩ kũhinga kwa muoroto wa Ngai. Tũkwĩhoka nĩ ũgũkenera kwĩruta ũhoro makĩria wĩgiĩ Jesu arĩ we ‘njĩra, ma, na muoyo.’