Jesu arathiĩ o na mbere gũtuĩkanĩria Perea erekeire Jerusalemu. Mwanake ũmwe mũtongu agateng’era kũrĩ we na akagwa magũrũ-inĩ make. Mũndũ ũcio nĩ “mũtongoria,” hihi atungataga arĩ mũrũgamĩrĩri wa thunagogi kana thĩinĩ wa igooti rĩa Sanhedrini. Akoria Jesu atĩrĩ: “Mũrutani Mwega, njagĩrĩirũo gwĩka atĩa nĩguo ngaagaya muoyo wa tene na tene?”​—Luka 8:41; 18:18; 24:20.

Jesu akamwĩra: “Wanjĩta mwega nĩkĩ? Gũtirĩ o na ũmwe mwega, tiga Ngai.” (Luka 18:19) No kũhoteke mũndũ ũcio amwĩta “mwega” arĩ ta mũtugo, ta ũrĩa marabii mamenyerete. O na gũtuĩka Jesu nĩ mũrutani mwega, arenda gũteithia mũndũ ũcio amenye atĩ no Ngai tu ũbatiĩ gwĩtwo “Mwega.”

Jesu akamũtaara akamwĩra: “No angĩkorũo nĩ ũkwenda gũkoona muoyo, athĩkagĩra maathani.” Nake mwanake ũcio akoria: “Marĩkũ?” Jesu akagweta maathani matano harĩ marĩa Ikũmi megiĩ kũũragana, ũtharia, kũiya, kũruta ũira wa maheeni, na gũtĩa aciari. Agacoka akongerera rĩathani rĩngĩ rĩa bata makĩria akamwĩra: “Wendage mũndũ ũrĩa ũngĩ o ta ũrĩa wĩyendete.”​—Mathayo 19:17-19.

Mũndũ ũcio agacokia ũũ: “Maũndũ macio mothe ndũire nũmĩtie; ndĩrabatara ũndũ ũngĩ ũrĩkũ?” (Mathayo 19:20) No gũkorũo arona ta harĩ ũndũ ũmwe wa mwanya atigĩtie gwĩka nĩguo agĩrĩre gũkoona muoyo wa tene na tene. Jesu ona ũrĩa arĩ na wendi mũnene wa kũmenya, ‘akaigua amwenda.’ (Mariko 10:21) No mũndũ ũcio arĩ na ũndũ ũramũhĩnga.

Nĩ endete indo ciake mũno, kwoguo Jesu akamwĩra: “Harĩ ũndũ ũmwe ũtigarĩtie: Thiĩ, wendie indo iria ũrĩ nacio ũhe athĩni, na nĩ ũkũgĩa na mũthithũ kũrĩa igũrũ, ũcoke ũũke ũtuĩke mũrũmĩrĩri wakwa.” Mũndũ ũcio no agayanie mbeca ciake kũrĩ athĩni, atekwĩrĩgĩrĩra marĩcoka mamũrĩhe, na atuĩke mũrutwo wa Jesu. Jesu, kwahoteka arĩ na  kĩeha, akamwĩrorera akĩrũgama na agathiĩ akuĩte ngoro. Mũndũ ũcio gũkorũo endete ũtonga wa “indo nyingĩ” iria arĩ nacio, nĩ kũratũma age kuona bata wa mũthithũ wa ma. (Mariko 10:​21, 22) Nĩ ũndũ ũcio Jesu akoiga: “Kaĩ nĩ ũgaakorũo ũrĩ ũndũ mũritũ harĩ andũ arĩa marĩ mbeca gũtonya Ũthamaki-inĩ wa Ngai-ĩ!”​—Luka 18:24.

Arutwo makamakio nĩ ciugo icio o hamwe na ici ingĩ Jesu aracoka kuuga: “Nĩ ũndũ mũhũthũ harĩ ngamĩra gũtonyera karima ga cindano gũkĩra mũndũ mũtongu gũtonya Ũthamaki-inĩ wa Ngai.” Ũndũ ũcio ũgatũma arutwo morie atĩrĩ: “Nũ ũngĩkĩhonokio?” Hihi andũ gũkaahonoka nĩ ũndũ mũritũ ũũ atĩ ndũngĩhotekeka? Jesu akamarora akameera: “Maũndũ marĩa matangĩhoteka harĩ andũ no mahoteke harĩ Ngai.”​—Luka 18:​25-27.

Petero akonania atĩ o matuĩte itua ngũrani na rĩa mũndũ ũcio mũtongu, akoiga: “Atĩrĩrĩ, ithuĩ nĩ tũtigĩte indo ciothe na tũgakũrũmĩrĩra; tũkaaheo kĩĩ?” Jesu akonania ũguni ũrĩa ũkoimana na itua rĩu rĩao rĩega akoiga: “Hĩndĩ ĩrĩa maũndũ makerũhio, rĩrĩa Mũrũ wa mũndũ agaikarĩra gĩtĩ gĩake kĩa ũnene, inyuĩ mũnũmĩrĩire mũgaikarĩra itĩ ikũmi na igĩrĩ cia ũnene mũtuagĩre mĩhĩrĩga ĩrĩa ikũmi na ĩĩrĩ ya Isiraeli cira.”​—Mathayo 19:​27, 28.

Hatarĩ nganja, Jesu araria ũhoro wa ihinda rĩũkĩte thĩinĩ wa thĩ rĩrĩa maũndũ makerũhio mahaane ta ũrĩa maarĩ mũgũnda-inĩ wa Edeni. Petero na arutwo arĩa angĩ nĩ makaaheo mweke wa gwathana na Jesu igũrũ rĩa thĩ ĩyo ĩrĩ Paradiso, mweke wa goro gũkĩra ũndũ o wothe mangĩkorũo meimĩte.

Ĩndĩ matikaagunĩka o ihinda rĩrĩa rĩũkĩte tu. O na ihinda rĩrĩ arutwo nĩ maragunĩka. Jesu akoiga: “Ngũmwĩra na ma atĩ, gũtirĩ mũndũ ũtigĩte nyũmba kana mũtumia kana ariũ a nyina kana aciari kana ciana nĩ ũndũ wa Ũthamaki wa Ngai ũtekwamũkĩra maita maingĩ makĩria ihinda-inĩ rĩrĩ, na aheo muoyo wa tene na tene mũtabarĩre-inĩ wa maũndũ ũrĩa ũroka.”​—Luka 18:​29, 30.

Kũrĩa guothe arutwo ake marĩthiaga, no makenere gũkorũo hamwe na andũ arĩa angĩ mathathayagia nao, marĩ na ũrũmwe ũkĩrĩte ũrĩa maarĩ naguo hamwe na andũ ao a famĩlĩ. Ũndũ wa kĩeha nĩ atĩ, kũroneka ta mũndũ ũcio mũtongu ekũrũo nĩ kĩrathimo kĩu, o hamwe na kĩheo kĩa muoyo Ũthamaki-inĩ wa Ngai.

Jesu agathiĩ na mbere kuuga: “No andũ aingĩ arĩa marĩ mbere magaatuĩka a thutha, nao arĩa marĩ thutha matuĩke a mbere.” (Mathayo 19:30) Hihi arenda kuuga atĩa?

Mwanake ũcio mũtongu arĩ gatagatĩ-inĩ ka arĩa marĩ “mbere,” tondũ nĩ ũmwe wa atongoria a Kĩyahudi. Tondũ nĩ arũmagĩrĩra maathani ma Ngai, no atuĩke mũrutwo mwega na ateithie andũ mũno. Ĩndĩ maũndũ marĩa we arona marĩ ma bata ũtũũro-inĩ nĩ indo na ũtonga. Ngũrani nake, andũ a kĩrathi gĩa thĩ nĩ monaga atĩ ũrutani wa Jesu nĩ wa ma na no ũtũme makoona muoyo. No merũo makoretwo marĩ “a thutha,” no rĩu makiriĩ gũtuĩka “a mbere.” Marĩ na kĩĩrĩgĩrĩro gĩa gũgaikarĩra itĩ cia ũnene kũrĩa igũrũ hamwe na Jesu na maathane igũrũ rĩa thĩ Paradiso.