Thutha wa Jesu gũcemania na Maritha na Mariamu hakuhĩ na Bethania, magathiĩ mbĩrĩra-inĩ ya Lazaro. Nĩ ngurunga ĩhingĩtwo na ihiga. Jesu akoiga, “Eheriai ihiga.” Maritha tondũ ndarataũkĩrũo nĩ ũrĩa Jesu arenda gwĩka, akamwĩra atĩrĩ: “Mwathani, no mũhaka akorũo nĩ aranunga rĩu, tondũ aninĩte thikũ inya.” No Jesu akamwĩra: “Githĩ ndikwĩrire atĩ wetĩkia nĩ ũkuona riri wa Ngai?”​—Johana 11:39, 40.

Kwoguo ihiga rĩkeherio. Jesu agacoka agatiira maitho na igũrũ akahoya akoiga: “Awa, ndĩragũcokeria ngatho tondũ nĩ wanjigua. Nĩ ma, nĩ njũĩ atĩ hĩndĩ ciothe nĩ ũnjiguaga; no ndoiga ũguo nĩ ũndũ wa kĩrĩndĩ gĩkĩ kĩrũgamĩte haha, nĩguo gĩtĩkie atĩ nĩwe wandũmire.”  Kũhoya andũ makĩmuonaga kũramonia atĩ ũndũ ũrĩa akiriĩ gwĩka ekũwĩka akĩhũthĩra hinya kuuma kũrĩ Ngai. Jesu agacoka akanĩrĩra na mũgambo mũnene akoiga: “Lazaro, uma!” Na Lazaro akoima ohetwo na mataama magũrũ na moko, naguo ũthiũ agathaywo na gĩtambaya. Jesu akameera: “Muohorei na mũreke athiĩ.”​—Johana 11:​41-44.

Ayahudi aingĩ arĩa mokĩte kũũmĩrĩria Mariamu na Maritha makona kĩama kĩu na magetĩkia Jesu. No angĩ magathiĩ makeera Afarisai ũrĩa Jesu eka. Afarisai na athĩnjĩri-Ngai arĩa anene mageka mũcemanio wa igooti rĩrĩa inene rĩa Kĩyahudi, rĩa Sanhedrini. Kaiafa, mũthĩnjĩri-Ngai ũrĩa mũnene nĩ ũmwe wa arĩa marĩ igooti-inĩ rĩu. Amwe ao makorania: “Tũgwĩka atĩa, nĩ gũkorũo mũndũ ũyũ nĩ araringa ciama nyingĩ? Tũngĩreka athiĩ na mbere ũguo-rĩ, andũ othe nĩ mekũmwĩtĩkia, nao Aroma moke matũtunye handũ haha haitũ o na bũrũri witũ.” (Johana 11:​47, 48) Matirakena nĩ ũndũ wa maũndũ marĩa Ngai areka kũgerera Jesu, o na gũtuĩka nĩ maiguĩte ũira wa andũ meyoneire Jesu akĩringa “ciama nyingĩ.” Kĩrĩa marĩ na bata mũno nakĩo nĩ igweta na ũnene wao.

Kũriũkio kwa Lazaro kuuma kũrĩ arĩa akuũ nĩ ihũũra inene harĩ Asadukai, arĩa matetĩkĩtie ũhoro wa kũriũka. Kaiafa nĩ Mũsadukai, na rĩu akaria akoiga: “Inyuĩ gũtirĩ ũndũ mũĩ, na mũtiramenya atĩ nĩ inyuĩ mũkũgunĩka mũndũ ũmwe angĩkua nĩ ũndũ wa andũ handũ ha rũrĩrĩ ruothe rũniinwo.”​—Johana 11:​49, 50; Atũmwo 5:17; 23:8.

Tondũ Kaiafa nĩ mũthĩnjĩri-Ngai mũnene, Ngai nĩwe watũma oige ciugo icio, no ndanoiga ‘eĩrĩte we mwene.’ Kaiafa aroiga atĩ Jesu abatiĩ kũũragwo nĩguo ndagathiĩ na mbere gũtũma andũ mahũthie ũnene wa atongoria acio a ndini a Kĩyahudi. Ĩndĩ ũrathi ũcio wa Kaiafa ũronania ũma wa atĩ Jesu, kũgerera gĩkuũ gĩake, nĩ akaaruta ũkũũri, to kũrĩ Ayahudi, no nĩ nginya kũrĩ ‘ciana cia Ngai iria ihurunjũkĩte.’​—Johana 11:​51, 52.

Kaiafa akahota kũiguithia Sanhedrini ĩbange ũrĩa Jesu ekũũragwo. Hihi Nikodemo ũrĩa wa igooti rĩa Sanhedrini ũkenagio nĩ Jesu nĩ ekũmũguũrĩria mũbango ũcio? Tũtiũĩ, ĩndĩ Jesu akehera gĩcigo-inĩ kĩu kĩa Jerusalemu, na njĩra ĩyo agethema kũũragwo mbere ya ihinda rĩrĩa Ngai aigĩte.