Nĩ mũthenya wa Thabatũ na Jesu arĩ o Jerusalemu. Arĩ na arutwo ake magĩceeranga itũũra-inĩ, makona mũndũ ũrahoyahoya waciarĩtwo arĩ mũtumumu. Arutwo makoria Jesu: “Rabii, mũndũ ũyũ aaciarirũo arĩ mũtumumu nĩ ũndũ wa mehia make-ĩ kana ma aciari ake?”​—Johana 9:2.

No kũhoteke arutwo nĩ mararigwo kana mũndũ no ehie arĩ o thĩinĩ wa nda ya nyina. Jesu akamacokeria akameera: “Ti mũndũ ũyũ o na kana aciari ake meehirie, no gwathiire ũguo nĩguo ciĩko cia Ngai cionekane ũndũ-inĩ ũyũ.” (Johana 9:3) Kwoguo ti mũndũ ũcio kana aciari ake meekire ihĩtia rĩna rĩgĩtũma aciarũo arĩ mũtumumu. Ithenya rĩa ũguo, nĩ ũndũ wa mehia ma Adamu, andũ othe maciaragwo matarĩ akinyanĩru, na no magĩe mawathe ta ũtumumu. No ũtumumu wa mũndũ ũcio ũrahe Jesu mweke wa kuonania ciĩko cia Ngai, ta ũrĩa anonania mahinda-inĩ mangĩ akĩhonia andũ mĩrimũ yao.

Jesu agatĩtĩrithia atĩ ciĩko icio irabatara gwĩkwo na ihenya. Akoiga: “No mũhaka tũrute mawĩra ma Ũrĩa wandũmire kũrĩ o mũthenya; ũtukũ nĩ ũroka rĩrĩa gũtarĩ mũndũ ũngĩruta wĩra. Hĩndĩ ĩrĩa yothe ndĩ gũkũ thĩ, nĩ niĩ ũtheri wa thĩ.” (Johana 9:​4, 5) Thutha wa kahinda Jesu akua, egũkorũo nduma-inĩ thĩinĩ wa mbĩrĩra kũrĩa atakaahota gwĩka ũndũ. Kwa ihinda rĩrĩ, Jesu nĩ kĩhumo gĩa ũtheri thĩinĩ wa thĩ.

No hihi Jesu nĩ ekũhonia mũndũ ũcio, na ekũmũhonia atĩa? Jesu agatua mata thĩ, akaringia ndoro namo. Akoya ĩmwe akahaka maitho ma mũndũ ũcio mũtumumu na akamwĩra: “Thiĩ ũgethambe karia-inĩ ga Siloamu.” (Johana 9:7) Mũndũ ũcio agathĩka. Ethamba, akambĩrĩria kuona! Ta hũũra mbica gĩkeno kĩrĩa arĩ nakĩo thutha wa kuona riita rĩa mbere kuuma rĩrĩa aaciarirũo!

Andũ a itũũra na arĩa angĩ mamũĩ arĩ mũtumumu makamaka. Makoria: “Na githĩ ũyũ ti mũndũ ũrĩa ũraikaraga thĩ akĩhoyahoyaga?” Amwe makoiga: “Nĩwe ũyũ.” No angĩ makaaga gwĩtĩkia makoiga: “Aca tiwe, no ahaana take.” Mũndũ ũcio we mwene akameera ũũ: “Nĩ niĩ.”​—Johana 9:​8, 9.

Nĩ ũndũ ũcio makamũũria: “Gũkĩrĩ ũguo-rĩ, maitho maku mahingũkire atĩa?” Akamacokeria ũũ: “Mũndũ ũrĩa wĩtagwo Jesu aringirie ndoro ahaka maitho acoka anjĩra atĩrĩ, ‘Thiĩ Siloamu wĩthambe.’ Ndagĩthiĩ na ndethamba ndambĩrĩria kuona.” Magacoka makamũũria: “Mũndũ ũcio arĩ kũ?” Nake akameera: “Niĩ ndiũĩ.”​—Johana 9:​10-12.

Makamũtwara kũrĩ Afarisai, arĩa marenda o nao kũmenya ũrĩa gũthiire ambĩrĩria kuona. Akameera: “Arahakire maitho makwa ndoro, ndĩrethamba, na ndĩrambĩrĩria kuona.” Mũndũ no erĩgĩrĩre atĩ Afarisai nĩ megũkenanĩra hamwe na mũndũ ũcio mũhonu. Handũ ha ũguo, amwe  ao makamenereria Jesu. Makoiga: “Mũndũ ũcio ndoimĩte kwĩ Ngai, tondũ ndarũmagĩrĩra Thabatũ.” Angĩ nao makoiga: “Mũndũ mwĩhia angĩhota atĩa kũringa ciama cia mũthemba ũcio?” (Johana 9:​15, 16) Kwoguo magakorũo na mawoni ngũrani.

Tondũ wa mawoni macio matiganĩte, makagarũrũkĩra mũndũ ũcio makamũũria: “Wee ũkuuga atĩa igũrũ rĩake tondũ nĩwe arahingũrire maitho?” No we ndarĩ na nganja igũrũ rĩgiĩ Jesu, kwoguo akamacokeria ũũ: “Nĩ mũnabii.”​—Johana 9:17.

Afarisai makaaga gwĩtĩkia. No gũkorũo mareciria atĩ Jesu na mũndũ ũcio marĩ na mũbango nĩguo maheenie andũ. Makoiga atĩ ũrĩa megwĩka nĩ kũũria aciari a mũndũ ũcio kana hihi aaciarĩtwo arĩ mũtumumu.