Jesu arĩ Judea, akanyitwo ũgeni nĩ Mũfarisai marĩanĩre nake. Kwahoteka nĩ mathaa ma mũthenya. (Luka 11:​37, 38) Afarisai matanambĩrĩria kũrĩa, makoragwo na mũtugo wa gwĩthamba moko nginya kĩgokora. No Jesu akaaga gwĩka ũguo. (Mathayo 15:​1, 2) Gwĩthamba nginya kĩgokora gũtingiuna Watho wa Ngai, ĩndĩ ti ũndũ Ngai oigĩte wĩkagwo.

Mũfarisai ũcio akamaka kuona atĩ Jesu ndararũmĩrĩra mũtugo ũcio. Jesu amenya ũguo akoiga: “Inyuĩ Afarisai-rĩ, mũthambagia gĩkombe na thani mwena wa na igũrũ, no na thĩinĩ mũiyũirũo nĩ ũkoroku na waganu. Inyuĩ irimũ ici! Githĩ ũrĩa wathondekire mwena wa nja towe wathondekire wa thĩinĩ o naguo?”​—Luka 11:​39, 40.

Thĩna ti gwĩthamba moko mbere ya kũrĩa, no nĩ ũhinga wa ndini. Afarisai na arĩa angĩ marũmagĩrĩra mũtugo ũcio wa gwĩthamba moko matitheragia ngoro ciao kuumana na waganu. Nĩ ũndũ ũcio Jesu akamataara akameera: “Heanagai iheo cia tha ciumĩte thĩinĩ wa ngoro, na hĩndĩ ĩyo maũndũ manyu mothe nĩ marĩkoragwo marĩ matheru.” (Luka 11:41) Na ũcio nĩ ũhoro wa ma! Kũheana kũbatiĩ kuuma ngoro-inĩ, no ti nĩgetha mũndũ eyonanie agĩĩtua nĩ mũthingu.

Ti kuuga atĩ Afarisai acio matiheanaga. Jesu akameera ũũ: “Mũrutaga gĩcunjĩ gĩa ikũmi gĩa terere na gĩa togotia, na kĩa mĩmera ĩrĩa ĩngĩ yothe ya mũgũnda, no mũtitindanagĩra na kĩhooto na wendo harĩ Ngai! Maũndũ maya nĩ mwagĩrĩirũo kũhingia no mũtikahũthie maũndũ macio mangĩ.” (Luka 11:42) Watho wa Ngai nĩ woigĩte andũ marutage gĩcunjĩ gĩa ikũmi kĩa irio cia mũgũnda. (Gũcokerithia Maathani 14:22) Na ciarĩ hamwe na terere na togotia, mĩmera ĩrĩa ĩhũthagĩrũo gũcamia irio. Afarisai nĩ meerutanagĩria mũno kũruta gĩcunjĩ gĩa ikũmi kĩa irio ciao, ĩ ũhoro-inĩ wĩgiĩ maũndũ marĩa ma bata mũno ma Watho, ta kuonania kĩhooto na kwĩnyihĩria Ngai?​—Mika 6:8.

Jesu agathiĩ na mbere kuuga: “Kaĩ mũrĩ na haaro-ĩ, inyuĩ Afarisai, tondũ mwendete gũikarĩra itĩ cia mbere thĩinĩ wa thunagogi na kũgeithio nĩ andũ thoko-inĩ! Kaĩ mũrĩ na haaro-ĩ, tondũ mũtariĩ ta mbĩrĩra iria itonekaga wega, iria andũ mageragĩra igũrũ rĩacio matekũmenya!” (Luka 11:​43, 44) Andũ nĩ mangĩagereire mbĩrĩra-inĩ icio matekũmenya na makorũo marĩ na thahu. Jesu akahũthĩra ũndũ ũcio gũtĩtĩrithia atĩ Afarisai gũkorũo matarĩ atheru nĩ ũndũ ũtangĩoneka na ihenya.​—Mathayo 23:27.

Mũndũ ũmwe mũrutani wa Watho akoiga: “Mũrutani, rĩrĩa woiga maũndũ macio, o na ithuĩ nĩ watũruma.” Ĩndĩ andũ ta acio mabatiĩ kũmenya atĩ matirateithia andũ. Jesu akoiga atĩrĩ: “Kaĩ mũrĩ na haaro o na inyuĩ arutani a Watho-ĩ, tondũ mũtitikithagia andũ mĩrigo mĩritũ, no inyuĩ ene mũtimĩhutagia na kaara! Kaĩ inyuĩ mũrĩ na haaro-ĩ, tondũ mwakaga mbĩrĩra cia anabii, no maithe manyu ma tene nĩo maamoragire!”​—Luka 11:​45-47.

Mĩrigo ĩrĩa Jesu araria ũhoro wayo nĩ morutani ma andũ na ũrĩa Afarisai mataũraga Watho. Matihũthagĩria andũ ũtũũro wao. Handũ ha ũguo, matĩtĩrithagia atĩ no mũhaka andũ othe marũmĩrĩre maũndũ macio maritũ. Maithe mao nĩ mooragire anabii a Ngai, kuuma Habili gũthiĩ na mbere. Rĩu makĩenda kuonania atĩ maratĩa anabii acio na njĩra ya kũmakĩra mbĩrĩra, maregerekania na mĩerekera na mĩtugo ya maithe mao. O na nĩ maracaria mweke wa kũũraga Mũnabii ũrĩa mũnene wa Ngai. Jesu akoiga atĩ Ngai nĩ agaatuĩra rũciaro rũrũ. Na ũndũ ũcio ũgekĩka mĩaka 38 thutha ũcio, mwaka-inĩ wa 70.

Jesu agathiĩ na mbere, akoiga: “Kaĩ mũrĩ na haaro inyuĩ arutani a Watho-ĩ, tondũ nĩ mweeheririe  cabi ya ũmenyo. Inyuĩ ene mũtigana gũtonya, na nĩ mũgiragia arĩa maratonya matonye!” (Luka 11:52) Andũ aya, handũ ha kũrutana ũrĩa Kiugo kĩa Ngai kiugĩte, maratũma andũ mage mweke wa kũmenya na gũtaũkĩrũo nĩkĩo.

Nĩ ũndũ ũrĩkũ Afarisai na andĩki-Watho megwĩka? Jesu ambĩrĩria gũthiĩ, makambĩrĩria kũmũũkĩrĩra marakarĩte na kũmũũria ciũria. Matiramũũria tondũ marenda kũmenya. No marenda gũtega Jesu nĩguo oige ũndũ mangĩhũthĩra kũmũnyitithia.