Jesu arathiĩ na mbere kũrutana thĩinĩ wa Judea, rĩu akaria ũhoro wa kĩndũ athikĩrĩria ake mangĩtaũkĩrũo na ihenya​—ng’ondu na ciugũ. Ĩndĩ araria na njĩra ya ngerekano. No kũhoteke Ayahudi nĩ mararirikana ciugo ici cia Daudi: “Jehova nĩwe mũrĩithi wakwa; ndirĩ kĩndũ ingĩkĩaga. Atũmaga njarahe cieni-inĩ iria ii nyeki nduru.” (Thaburi 23:​1, 2) Thĩinĩ wa Thaburi ĩngĩ, Daudi eerire rũrĩrĩ rwa Isiraeli ũũ: “Nĩtũturĩrie Jehova ndu, o ũcio mũtũũmbi. Nĩ gũkorũo we nĩwe Ngai witũ, na nĩ ithuĩ kĩrĩndĩ gĩake kwĩrĩithĩria.” (Thaburi 95:​6, 7) Kwa ihinda iraihu, Aisiraeli arĩa maarĩ rungu rwa Watho maahananagio na rũũru rwa ng’ondu.

“Ng’ondu” icio ciarĩ thĩinĩ wa “kiugũ” na njĩra ya atĩ ciaciarĩirũo rũrĩrĩ-inĩ rwarĩ rungu rwa Watho wa Musa. Watho warĩ ta rũgiri rwa kũmagitĩra kuumana na mĩtugo mĩũru ya andũ arĩa mataarĩ rungu rwa Watho ũcio. Ĩndĩ Aisiraeli amwe nĩ maanyariraga rũũru rwa Ngai. Nĩkĩo Jesu aroiga ũũ: “Ngũmwĩra atĩrĩ o ma o ma, mũndũ o wothe ũtonyaga kiugũ kĩa ng’ondu atagereire kĩhingo-inĩ no akahaica agatonyera handũ hangĩ, ũcio nĩ mũici na nĩ mũtunyani. No ũrĩa ũtonyagĩra mũrango-inĩ nĩwe mũrĩithi wa ng’ondu.”​—Johana 10:​1, 2.

Arĩa marathikĩrĩria kwahoteka mageciria ũhoro wa arĩa makoretwo makiuga atĩ nĩo Mesia kana Kristo. Acio matariĩ ta aici na atunyani. Kwoguo andũ matiagĩrĩirũo kũrũmĩrĩra acio maretua arĩithi. Magĩrĩirũo kũrũmĩrĩra “mũrĩithi wa ng’ondu,” ũrĩa Jesu aroiga ũũ igũrũ rĩake:

“Ũcio nĩ ahingũragĩrũo nĩ mũrangĩri, nacio ng’ondu nĩ ithikagĩrĩria mũgambo wake. Etaga ng’ondu ciake na rĩĩtwa agaciruta kiugũ. Rĩrĩa arĩkia gũciruta ciothe nja, athiaga mbere yacio, nacio ikamũrũmĩrĩra tondũ nĩ ciũĩ mũgambo wake. Gũtirĩ hĩndĩ ingĩrũmĩrĩra mũgeni no nĩ kũmũũrĩra ingĩmũũrĩra, tondũ itiũĩ mũgambo wa ageni.”​—Johana 10:​3-5.

Hau kabere, Johana Mũbatithania atariĩ ta mũrangĩri, nĩ onanirie atĩ ng’ondu icio cia mũhaano ciarĩ rungu rwa Watho ciagĩrĩirũo kũrũmĩrĩra Jesu. Na ng’ondu imwe thĩinĩ wa Galili na ingĩ gũkũ Judea, nĩ imenyete mũgambo wa Jesu. Hihi ‘angĩgaciruta kiugũ’ acitware kũ? Na moimĩrĩro ma kũmũrũmĩrĩra mangĩarĩ marĩkũ? Amwe maigua ngerekano ĩyo hihi makeyũria ciũria icio tondũ ‘matirataũkĩrũo nĩ ũrĩa aramera.’​—Johana 10:6.

Jesu akamataarĩria akoiga: “Ngũmwĩra atĩrĩ o ma o ma, niĩ nĩ niĩ kĩhingo kĩa ng’ondu. Arĩa othe mokĩte magĩĩtuaga atĩ nĩo niĩ nĩ aici na atunyani; no ng’ondu itimathikagĩrĩria. Niĩ nĩ niĩ mũrango; mũndũ o wothe ũtonyagĩra harĩ niĩ nĩ akaahonokio, ũcio arĩtonyaga na akoima na akona gĩa kũrĩa.”​—Johana 10:​7-9.

Hatarĩ nganja Jesu ararutana ũndũ mwerũ. Arĩa maramũthikĩrĩria nĩ moĩ atĩ tiwe mũrango wa kwerekeria harĩ Watho, tondũ Watho ũcio ũkoretwo kuo ihinda iraihu. Kwoguo arenda kuonania atĩ ng’ondu iria ‘araruta kiugũ’ aracitwara kiugũ kĩngĩ. Hihi araciruta nĩkĩ?

Jesu agathiĩ na mbere gũtaarĩria itemi rĩake akoiga: “Niĩ njũkĩte nĩguo ng’ondu igĩe na muoyo wa tene na tene. Niĩ nĩ niĩ mũrĩithi ũrĩa mwega; mũrĩithi ũrĩa mwega nĩ arutaga muoyo wake nĩ ũndũ wa ng’ondu.” (Johana 10:​10, 11) Hau kabere Jesu nĩ omĩrĩirie arutwo ake akĩmeera: “Mũtigetigĩre inyuĩ karũũru kanini, tondũ Ithe wanyu nĩ onete arĩ wega kũmũhe Ũthamaki.” (Luka 12:32) Kwoguo acio a “karũũru kanini” nĩo Jesu egũtwara thĩinĩ wa kiugũ kĩngĩ kĩerũ nĩguo ‘magĩe na muoyo wa tene na tene.’ Githĩ ti kĩrathimo gũkorũo thĩinĩ wa rũũru rũu!

 No Jesu ndaratigĩra ũhoro ũcio hau. Akoiga: “Ndĩ na ng’ondu ingĩ, itarĩ cia kiugũ gĩkĩ; icio nacio no mũhaka ndĩcirehe, na nĩ igaathikagĩrĩria mũgambo wakwa, nacio nĩ igaatuĩka rũũru rũmwe, na ikorũo na mũrĩithi ũmwe.” (Johana 10:16) Tondũ ‘ng’ondu icio ingĩ’ ti cia “kiugũ gĩkĩ,” no mũhaka ikorũo nĩ cia kiugũ kĩngĩ ngũrani na gĩa “karũũru kanini” ka arĩa makaagaya Ũthamaki. Ng’ondu cia ciugũ icio igĩrĩ irĩ na ciĩrĩgĩrĩro ngũrani. O na kũrĩ ũguo, ciothe nĩ ikaagunĩka nĩ itemi rĩa Jesu. Agacoka akoiga: “Awa anyendete tondũ nĩ ngũruta muoyo wakwa.”​—Johana 10:17.

Andũ aingĩ arĩa maramũthikĩrĩria makoiga: “Arĩ na ndaimono na nĩ athũkĩte kĩongo.” No angĩ makonania atĩ nĩ marathikĩrĩria na kinyi na nĩ marenda kũrũmĩrĩra Mũrĩithi Ũrĩa Mwega. Makoiga: “Icio ti ciugo cia mũndũ ũrĩ na ndaimono. Kaĩ ndaimono ĩngĩhota kũhingũra maitho ma atumumu?” (Johana 10:​20, 21) No kũhoteke mararia ũhoro wa ũrĩa Jesu erĩga kũhonia mũndũ waciarĩtwo arĩ mũtumumu.